ខេត្ដបន្ទាយមានជ័យ៖ នៅថ្ងៃ២៤ ខែមេសា ឆ្នាំ២០២៣នេះប្រជាពលរដ្ឋជាច្រើនគ្រួសារ រស់នៅក្នុងភូមិសាមគ្គីមានជយ័ ក្រុងប៉ោយប៉ែត កំពុងមានការព្រួយបារម្ភ ជាមួយអាគារសាងសង់កំពស់១០ជាន់ ដោយសាងសង់គ្មានការគ្របស្បៃបិទបាំង ធ្វើឲ្យធ្លាក់ថ្មធ្លុះធ្លាយលើដំបូលផ្ទះ របស់ពួកគាត់ នៅក្នុងបុរីដួងចន្ទ ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
ប្រជាពលរដ្ឋនៅក្បែរខាងសំណង់កំពស់១០ជាន់នេះ បានរៀបរាប់ប្រាប់អ្នកសារព័ត៌មានយើងថា នៅពេលដែលអគារសាងសង់កាន់តែខ្ពស់ ពួកគាត់កាន់តែមានការភ័យខ្លាច ខណៈអគារខាងលើនេះសាងសង់ជាប់របងនិងបន្ទប់ និងផ្ទះរបស់ពួកគាត់ស្នាក់នៅ និងចំផ្លូវកាច់កែងទៀត ដែលជាការព្រួយបារម្ភ ពីសុវត្ថិភាពរាល់ការធ្វើដំណើរ និងអ្នកជិតខាង សំរាន្តមិនលក់ ព្រោះមានអាចម៌ស៊ីម៉ង់ត៍ធ្លាក់លើដំបូល និងមានដុំថ្ម និងឥដ្ឋធ្លាក់មកលើដំបូងបណ្តាលឲ្យធ្លុះធ្លាយ និងជ្រៀបទឹកពេលមានភ្លៀងធ្លាក់ម្តងៗ។
ពួកគាត់ទាំងអស់បានសំណូមពរដល់អាជ្ញាធរក្រុងប៉ោយប៉ែតនិងលោក វ៉ា ជឹមណារ៉េត ចៅសង្កាត់អូរជ្រៅ មន្ត្រីជំនាញពាក់ព័ន្ធ សូមមេត្តាចុះមកពិនិត្យសំណង់ខាងលើនេះផង ដែលបង្កភាពរំខានដល់ការរស់នៅប្រចាំថ្ងៃដល់ប្រជាពលរដ្ឋរស់នៅក្បែរខាង និងខ្លាចមានគ្រោះថ្នាក់ជាដើម។ម្យ៉ាងវិញទៀត សំណង់ខាងលើនេះ បានដាក់សម្ភារៈថ្ម ឥដ្ឋបិទបាំងអស់មួយចំហៀងផ្លូវ ដែលបង្កការលំបាកដល់ការធ្វើដំណើររបស់ពួកគាត់ និងប្រជាពលរដ្ឋផ្សេងទៀត ដែរធ្វើដំណើរឆ្លងកាត់ផ្លូវនោះ។
មន្ត្រីសាសាសង្កាត់អូរជ្រៅ បានចុះមកពិនិត្យ និងបានប្រាប់ឲ្យដឹងថា ប្រសិនបើម្ចាស់សំណង់ដែលសាងសង់ខាងលើនេះ ធ្វើឲ្យប៉ះពាល់ដល់អ្នកជិតខាង បន្តទៀត បើសិនមិនធ្វើការហ៊ុំព័ន្ធស្បៃឲ្យបានត្រឹមត្រូវនោះទេ អាជ្ញាធរមិនអនុញ្ញាតិឲ្យសាងសង់បន្តនោះទេ៕
