(ឧត្តរមានជ័យ)មានហេតុការណ៏ដ៏គួរឲ្យភ្ញាក់ផ្អើលទាំងព្រឹកព្រលឹមខណ:នៅពេលដែលអ្នកគ្រូបង្រៀនម្នាក់ត្រូវក្រុមចោរមានគ្នា២នាក់ស្ទាក់កាក់ផ្លូវប្លន់យកម៉ូតូបានដោយសុវត្ថិភាព ដែលករណីនេះបានកើតឡើងនៅ ថ្ងៃទី០៨ ខែកក្កដា ឆ្នាំ២០២៣ វេលាម៉ោង ០៧និង១០នាទីស្ថិតនៅត្រង់ចំណុចផ្លូវលំមួយកន្លែងដង្កោតាប៉ុក ឃុំបេង ស្រុកបន្ទាយអំពិល ខេត្តឧត្តរមានជ័យ។
ប្រភពពីលោក ឆាងសារុនមេឃុំបេងបានបញ្ជាក់ប្រាប់ឲ្យដឹងនៅថ្ងៃ០៨ខែកក្កដាឆ្នាំ២០២៣ម្សិលមិញនេះថា នៅក្នុងឃុំរបស់លោកពិតជាមានករណីបាត់ម៉ូតូរបស់គ្រូបង្រៀនម្នាក់ក្នុងភូមិដង្កោតាប៉ុកប្រាកដមែន ជាក់ស្តែងក្រោយពីទទួលបានពត៌មានលោកដឹកនាំលោកប្រធានក្រុមប្រឹក្សាឃុំ និងសហការណ៏ជាមួយសមត្ថកិច្ចពាក់ព័ន្ធចុះទៅពិនិត្យត្រង់កន្លែងកើតហេតុនិងបន្តស្រាវជ្រាវស្ទាក់គ្រប់ផ្លូវក្នុងភូមិសាស្ត្រដើម្បីស្វែងរកមុខសញ្ញាជនសង្ស័យដែលបានធ្វើសកម្មភាពប្លន់យកម៉ូតូ១គ្រឿងពីគ្រូបង្រៀននោះ តែចំពោះលទ្ធផលយ៉ាងណានោះក៏ពុំទាន់ដឹងច្បាស់ដែរ។
សមត្ថកិច្ចមូលដ្ធានបានឲ្យដឹងថា មានករណីស្ទាក់ប្លន់គ្រូបង្រៀនម្នាក់យក (ម៉ូតូ០១គ្រឿង) ម៉ាកហុងដាឌ្រីម ពណ៌ខ្មៅ សេរីឆ្នាំ២០២២ ពាក់ស្លាកលេខ ឧត្តរមានជ័យ 1F-3709 បានកើត ត្រង់ចំណុច វាលព្រលឹត ខាងត្បូងភូមិវល្លិ៍យាវប្រហែល១៥០០ម៉ែត្រ ស្ថិតនៅភូមិវលិ៍្លយាវ ឃុំបេង ស្រុកបន្ទាយអំពិល ខេត្តឧត្តរមានជ័យ បង្កឡេីងដោយជនសង្ស័យពុំស្គាល់អត្តសញ្ញាណបានធ្វេីសកម្មភាព ស្ទាក់ផ្លូវកំហែងប្លន់យកម៉ូតូ ជនរងគ្រោះឈ្មោះ តង់ សាឡាត់ ភេទស្រី អាយុ២៤ឆ្នាំ រស់នៅភូមិតាម៉ា ឃុំបេង ស្រុកបន្ទាយអំពិល មុខរបរគ្រូបង្រៀន ជិះទៅទិសខាងជេីងបាត់តែម្តង ។
សមត្ថកិច្ចមូលដ្ធានដដែលបានបញ្ជាក់បន្ថែមថាតាមការបំភ្លឺរបស់ជនរងគ្រោះបានឲ្យដឹងថាៈ នៅថ្ងៃទី០៨ ខែកក្កដា ឆ្នាំ២០២៣ វេលាម៉ោង០៦និង២៥នាទី ខ្ញុំបានជិះទៅបង្រៀននៅសាលាដង្កោតាប៉ុក ស្ថិតនៅភូមិដង្កោតាប៉ុក ឃុំបេង ស្រុកបន្ទាយអំពិល ពេលជិះដល់ចំណុច កើតហេតុខាងលើ ស្រាប់តែមានជនពុំស្គាល់អត្តសញ្ញាណ០២នាក់ ជិះម៉ូតូ០១គ្រឿង ម៉ាកហុងដាឌ្រីម ពណ៌ខ្មៅ មានភិនភាគ ពាក់អាវពណ៌ខ្មៅដៃវែងទាំង០២នាក់ពាក់មួកសុវត្ថិភាពពណ៌ខ្មៅ ឃាត់ឲ្យខ្ញុំឈប់ ពេលនោះជនដែលជិះខាងក្រោយ ចុះពីលេីម៉ូតូមកទាញដៃខ្ញុំ ចេញពីម៉ូតូ ទៅវាលស្រែចម្ងាយ១០ម៉ែត្រ រួចទាញកាបូបខ្ញុំ ស្រែកគំរាមថានឹងបាញ់សម្លាប់ ចំណែកម៉ូតូរបស់ខ្ញុំជនម្នាក់ទៀតបានជិះទៅទិសខាងជើង មួយសន្ទុះ ស្រាប់តែមានម៉ូតូបងប្រុសម្នាក់ដឹកប្រពន្ធនិងកូនតូចមកដល់ ហើយខ្ញុំស្រែកឲ្យគាត់ជួយ រួចខ្ញុំបានទៅឆក់យកកាបូបខ្ញុំវិញ ហើយពជននោះ បានជិះម៉ូតូទៅទិសខាងជើងតាមគ្នាវាបាត់ទៅ។
សូមបញ្ជាក់ថា ក្រោយកើតហេតុរួចភ្លាមៗកម្លាំងជំនាញទាំងប៉ូលីសនិងមន្ត្រីកងរាជអាវុធហត្ថស្រុក ខេត្តជាច្រើននាក់បានកំពុងស្រាវជ្រាវស៊េីបអង្កេតយ៉ាងសស្រាក់សស្រាំដើម្បីកំណត់មុខសញ្ញាជនសង្ស័យទាំងពីនាក់ខាងលើនិងឈានដល់ការឃាត់ខ្លួនយកមកចាត់ការបន្តតាមនីតិវិធីច្បាប់។ដោយ ប៊ុន ថេត.ឧត្តរមានជ័យ
