ខេត្ដស្វាយរៀង៖ពលរដ្ឋមានការព្រួយបារម្ហពីគុណភាពផ្លូវបេតុងមួយខ្សែរដែលកំពុងសាងសង់ប្រើប្រាស់មិនបានយូរស្ថិតនៅក្នុងឃុំសំបួរ ស្រុករមាសហែក ខេត្ដស្វាយរៀង មានប្រវែងសរុបទាំងតគម្រោងប្រវែង៨០៤ម៉ែត្រ ទទឹង ៥ម៉ែត្រ កម្រាស់ ០.១៥ម៉ែត្រ ក្នុងនោះគម្រោងដាក់ដេញថ្លៃមានប្រវែង៣៨៣ម៉ែត្រ ដែលទឹកប្រាក់ប៉ាន់ស្មានតម្លៃសរុបចំនួន២៤២.៤០៦.០៨៧ រៀល ដោយមានក្រុមហ៊ុនចំនួន៨ក្រុមហ៑ុនដែលបានដាក់សំណើរដេញថ្លៃ ក្រុមហ៊ុនដែលដេញថ្លៃបានទទួលម៉ៅការសាងសង់ដែលមានតម្លៃទាបជាងគេអាចទទួលយកបានគឺក្រុមហ៑ុនមានឈ្មោះឈឹម ម៉ាលី ខនស្រាដសិន ក្នងតម្លៃ៩០.៩៦២.៥០០រៀលក្រោម៥០ភាគរយ ហើយការដាក់ដេញថ្លៃនេះប្រព្រឹត្តទៅនៅក្នុងសាលាឃុំសំបួរ ស្រុករមាសហែក ខេត្ដស្វាយរៀង ។
ពលរដ្ឋឆ្ងល់ថាតើការសាងសង់ផ្លួវមេតុងអាមេមួយខ្សែរនេះតាមស្តង់ដាលក្ខណៈបច្ចេកទេសដែរឬទេដោយពួកគាត់ឃើញថា៖
១.ការសាងសង់ផ្លូវបេតុងនេះ ខ្នងអណ្ដើកខ្ពស់ ចាក់សុីម៉ង់ស្ដើង ទំនងកម្រាស់មិនគ្រប់០.១៥ម៉ែត្រ ផងនៅចំណ្ដាលផ្លូវ
២.ដែកដាក់ផ្ទាល់ដោយមិនមានកំណល់កល់
ធ្វើឲ្យសាច់សុីម៉ង់ចូលមិនបានល្អ
៣.ដែកមើលទៅចងរង្វើល ។
ជុំវិញករណីនេះដែរលោកមេឃុំសំបួរ បានប្រាប់មកអង្គភាពសារព័ត៌មានយើងនៅថ្ងៃទី៣១ខែសីហាឆ្នាំ២០២៣នេះ ថាលោកបានដាក់មន្ត្រីឲ្យចុះត្រួតពិនិត្យជាប្រចាំរាល់ពេលសាងសង់ ដោយត្រួតពិនិត្យឃើញថាអាចទទួលយកបាន។
បើតាមមន្ត្រីបច្ចេកទេសបានឲ្យដឹងថាការសាងសង់ផ្លូវបេតុងអាមេគឺ ដែកចងការេ ០.២០ម៉ែត្រ ហើយដែកត្រូវគ្រប់ទំហំ ត្រូវមានកំណល់កល់ដែកដោយចងភ្ជាប់ជាមួយដែកលួសឲ្យបានត្រឹមត្រូវ ដើម្បីកុំឲ្យពេលចាក់ស៊ីម៉ង់ទៅកំណល់កល់មិនរត់ចេញនិងដើម្បីឲ្យស៊ីម៉ង់ចូលបានល្អ។
តែទិដ្ឋភាពជាក់ស្ដែងគឺក្រុមហ៊ុនដែលទទួលម៉ៅការសាងសង់ផ្លូវបេតុងអាមេនេះគឺមិនមានកំណល់កល់ដែកនោះទេនៅពេលចាក់បេតុងតែម្ចាស់ក្រុមហ៊ុនថា ការសាងសង់ផ្លូវបេតុងនេះមិនមានកំណល់កល់គឺនៅពេលចាក់បេតុងរលាក់សរសៃដែកដើម្បីឲ្យសាច់សុីម៉ង់ចូលវាមានគុណភាពដូចតែគ្នាទេ។
ទោះជាយ៉ាងណាក្ដីពលរដ្ឋស្នើរសុំអោយមន្ត្រីជំនាញចុះត្រួតពិនិត្យមន្ថែមទៀត និងតាមដានអោយបានជាប់ជាប្រចាំផង ដើម្បីកុំអោយក្រុមហ៊ុនដែលទទួលបានគម្រោងធ្វើមិនបាន និងធ្វើមិនត្រូវតាមស្តង់ដាបច្ចេកទេស និងមិនមានគុណភាព តាមកិច្ចសន្យានៃគម្រោង។
ពលដ្ឋរស្នើរដល់ម្ចាស់គម្រោងនិងមន្ត្រីបច្ចេកទេស មន្ត្រីលទ្ធកម្មមេត្តាបង្កើតគណកម្មការវាយតម្លៃគុណភាពផ្លូវឲ្យបានម៉ត់ចត់ត្រូវតាមស្តង់ដានៃគម្រោង ជៀសវាងផ្លូវគ្មានគុណភាព ធ្វើហើយធ្វើទៀត ជួសជុលហើយផ្លូវខូចដដែលៗ ៕
