ខេត្ដស្វាយរៀង៖ កម្លាំងអធិការដ្ឋាននគរបាលក្រុងបាវិត បានចាប់ខ្លួនជនសង្ស័យជនជាតិវៀតណាម៥នាក់ ដែលពាក់ព័ន្ធករណីកាច់កម៉ូតូនៅក្រុងបាវិត ខេត្ដស្វាយរៀង ។
ជនសង្ស័យដែលត្រូវបានសមត្ថកិច្ចឃាត់ខ្លួនរួមមាន៖
ទី១៖ឈ្មោះ ហ្វាមវាំង ថាំង អាយុ៣៦ឆ្នាំ
ទី២៖ឈ្មោះ វៀង ថាន់យិន អាយុ៣៥ឆ្នាំ
ទី៣៖ឈ្មោះ ទឹក្ខា សា អាយុ៤២ឆ្នាំ
ទី៤៖ឈ្មោះ បួយ វ៉ាន់ហយ អាយុ៣៤ឆ្នាំ និងទី៥៖ឈ្មោះ ឡេ ធីហុងយៀង ភេទស្រី អាយុ៣៣ឆ្នាំ។
សមត្ថកិច្ចបានឲ្យដឹងថា ផ្អែកតាមប្រព័ន្ធកាម៉ារ៉ាសុវត្ថិភាព នៅតាមបណ្តាលបន្ទប់ជួល ដែលម្ចាស់ផ្ទះ បានផ្តល់មកសមត្ថកិច្ច អំពីភិនភាគជនសង្ស័យ ដែលតែងតែធ្វើសកម្មភាពលួចកាច់សោរករម៉ូតូយ៉ាងសកម្ម នៅក្នុងក្រុងបាវិត ។
ក្រោយពីទទួលបានរូបភាពពីកាម៉ារ៉ាសុវត្ថិភាព សមត្ថកិច្ចយើងធ្វើការស្រាវជ្រាវកាលពីថ្ងៃទី០៨ ខែកញ្ញា ឆ្នាំ២០២៣ សមត្ថកិច្ចក៏ប្រទះឃើញជនសង្ស័យ ដែលមានភិនភាគដូចរូបភាពក្នុងប្រព័ន្ធកាម៉ារ៉ាសុវត្ថិភាព ចំនួន២នាក់ កំពុងជិះម៉ូតូលើផ្លូវជាតិលេខ១ នៅចំណុចខាងមុខផ្សារអន្តរជាតិ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ភ្លាមនោះសមត្ថកិច្ចបានធ្វើការឃាត់ និងនាំជនសង្ស័យទាំង២នាក់ខាងលើ មកកាន់ប៉ុស្តិ៍នគរបាលរដ្ឋបាលបាវិត ដើម្បីធ្វើការសាកសួរ។ ក្រោយពីសាកសួរជនសង្ស័យខាងលើរួច សមត្ថកិច្ចបានបន្តស្រាវជ្រាវឃាត់ខ្លួន ជនសង្ស័យចំនួន០៣នាក់បន្ថែមទៀត ខណៈនៅចំពោះមុខសមត្ថកិច្ចជនសង្ស័យបានឆ្លើយសារភាពថា ពួកខ្លួនពិតជាបានធ្វើសកម្មភាពលួចកាច់កម៉ូតូគេប្រាកដមែន។
ផ្អែកតាមចម្លើយសារភាពរបស់ជនសង្ស័យទាំង៥នាក់ សមត្ថកិច្ចបានឃាត់ខ្លួន និងកសាងសុំណុំរឿងបញ្ជួនទៅការិយាល័យជំនាញខេត្តចាត់ការបន្តតាមច្បាប់៕
