(ឧត្តរមានជ័យ)ទីបំផុតមុខសញ្ញាចោរលួចម៉ូតូ២គ្រឿងជាជនជាតិថៃរួមជាមួយអ្នកទទួលទិញម្នាក់ទៀតចំនួន២នាក់ត្រូវចាប់បានខ្លួនហើយ ក្រោយពីធ្វើសកម្មភាពលួចម៉ូតូបានរយ:ពេល២ថ្ងៃនៅសង្កាត់អូរស្មាច់ ជាប់ព្រំដែនកម្ពុជា ថៃ ដែលការឃាត់ខ្លួននេះផងដែរធ្វើឡើង ដោយមានការណែនាំ ចង្អុលបង្ហាញជាប្រចាំនិងដាក់បទបញ្ជាយ៉ាងដាច់ណាត់ពីសំណាក់ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តឧត្ដរមានជ័យ និងដោយមានការសម្របសម្រួលនិតិវិធីពីឯកឧត្តម តូច សុភក្តី ព្រះរាជអាជ្ញា នៃអយ្យការអមសាលាដំបូងខេត្តឧត្តរមានជ័យ។
ជាក់ស្តែងនៅថ្ងៃទី១២ ខែកញ្ញា ឆ្នាំ២០២៣ វេលាម៉ោង ១៤និង៥០នាទីម្សិលមិញនេះ លោកវរសេនីយ៍ឯក ហម ភិរម្យ អធិការ នៃអធិការដ្ឋាននគរបាលក្រុងសំរោង បានចាត់លោកវរសេនីយ៍ទោ សត្យា រ៉ូម៉េអ៊ូ អធិការរងទទួលផែនការងារនគរបាលយុត្តិធម៌ ចុះដឹកនាំកម្លាំងជំនាញ និងកម្លាំងប៉ុស្ដិ៍រដ្ឋបាលសង្កាត់អូរស្មាច់ ធ្វើការចាប់ឃាត់ខ្លួនជនសង្ស័យម្នាក់ឈ្មោះ អភិឆាត អៃថា ភេទប្រុស អាយុ ២៦ឆ្នាំ ជនជាតិថៃ មានទីលំនៅស្រុកឆៃប្រាកាន ខេត្តឈៀងម៉ៃ ប្រទេសថៃ បច្ចុប្បន្នស្នាក់នៅភូមិអូស្មាច់ សង្កាត់អូស្មាច់ ក្រុងសំរោង ខេត្តឧត្តរមានជ័យ មុខរបរ: កម្មករសំណង់ បានធ្វើសកម្មភាពលួចម៉ូតូ ០១គ្រឿង ម៉ាកហុងដាទ្រីម ពណ៌ខ្មៅ ផលិតឆ្នាំ២០២២ ពាក់ផ្លាកលេខ: ឧត្តរមានជ័យ 1F-9718 របស់ជនរងគ្រោះឈ្មោះ ម៉ែន វ៉ាន់នេន ភេទស្រី អាយុ ៦០ឆ្នាំ មានទីលំនៅភូមិកើតហេតុ ដែលបានចតទុកនៅមុខផ្ទះដោយពុំបានដកកូនសោរចេញ ជិះគេចខ្លួនបាត់ ។
គួររំលឹកថា ក្រោយកើតហេតុ ដោយទទួលបានព័ត៌មានពីជនរងគ្រោះ លោកអនុសេនីយ៍ឯក អ៊ុជ ប៊ុនអ៊ុយ នាយប៉ុស្តិ៍នគរបាលរដ្ឋបាលអូរស្មាច់ បានចុះដល់ទីកន្លែងកើតហេតុធ្វើការស្រាវជ្រាវ និងតាមប្រមាញ់ចាប់បានជនសង្ស័យ ព្រមទាំងវត្ថុតាងនៅចំណុចតាមផ្លូវក្រវ៉ាត់ព្រំដែនស្ថិតក្នុងភូមិគោកចាន់រី សង្កាត់កូនគ្រៀល ក្រុងសំរោង ខេត្តឧត្តរមានជ័យ បន្ទាប់ពីសួរចម្លើយរួចមក ឈ្មោះ អភិឆាត អៃថា បានឆ្លើយសារភាព ខ្លួនបានស៊ីដាច់ម៉ូតូ១គ្រឿងទៀត ពីផ្សារឆងចម យកទៅលក់ឲ្យឈ្មោះ ឈឿន ប៊ីប ភេទប្រុស នៅភូមិត្រពាំងទូង សង្កាត់កូនក្រៀល ក្នុងតម្លៃ១៥០,០០០ រៀល ក្នុងពេលនោះដែរលោកនាយប៉ុស្តិ៍ បានបន្តស្រាវជ្រាវ ឃាត់ខ្លួនឈ្មោះ ឈឿន ប៊ីប និងដកហូតវត្ថុតាងម៉ូតូ១គ្រឿងម៉ាកទ្រីម ពណ៌ខ្មៅ សេរីឆ្នាំ២០១៤ ស្លាកលេខ ឧត្តរមានជ័យ 1C-3202 នាំយកទៅកាន់ប៉ុស្តិ៍នគរបាលរដ្ឋបាលអូស្មាច់ ដើម្បីធ្វើការសាកសួរតាមនីតិវិធី និងបានប្រគល់ម៉ូតូទាំង២គ្រឿងខាងលើជូនម្ចាស់ដើមវិញ។
បច្ចុប្បន្ន ជនសង្ស័យខាងលើ ត្រូវបានកម្លាំងជំនាញផែនការងារនគរបាលយុត្តិធម៌ ចាត់នីតិវិធីបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្ត ដើម្បីចាត់ការតាមផ្លូវច្បាប់។
