(ឧត្តរមានជ័យ)មានហេតុការមួយបង្កឡើងដោយសារមានបុរសជនជាតិវៀតម្នាក់បានលោតពីលើអាគារស្នាក់មួយកន្លែងដែលមានកម្ពស់ជិត១០ជាន់ក្រោយបញ្ជូនដល់មន្ទីរពេទ្យបាន១យប់ដោយសារស្ថានភាពជំងឺធ្ងន់ធ្ងរពេកក៏បានស្លាប់តែម្តង។ករណីនេះបានកើតឡើងនៅថ្ងៃម្សិលមិញវេលាម៉ោងប្រមាណជា១១ជាងថ្ងៃទី១៥ខែតុលាឆ្នាំ២០២៣ស្ថិតនៅជាប់ព្រំដែនថៃច្រកអន្តរជាតិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ ។
បើតាមប្រភពចេញពីកន្លែងកើតហេតុបានបង្ហើបប្រាប់ឲ្យដឹងនៅថ្ងៃទី១៦ខែតុលាឆ្នាំ២០២៣ថា បុរសជាជនជាតិវៀតណាមដែលលោតសម្លាប់ខ្លួននៅអាគារA ដែលមានកម្ពស់ជិត១០ជាន់កាលពីម្សិលមិញនេះ តាមដែលគាត់ដឹងជាបុគ្គលិកក្រុមហ៊ុនចិនធ្វើការនៅកាសុីណូហើយមុនពេលកើតហេតុមុនដំបូងឡើយគាត់បានឃើញពួកគេឈ្លោះប្រកែកជាមួយបុគ្គលិកជនជាតិចិនហើយបន្ទាប់មកក៏ឃើញលោតពីលើអាគារតែម្តង មួយវិញទៀតឲ្យតែមានរឿងករណីជនជាតិចិននិងជនជាតិវៀតណាមនៅច្រកអូរស្មាច់ ទោះបីរឿងអ្វីក៏ដោយ មានគេហាមមិនឲ្យពួកគាត់ប្រាប់អ្នកណាផ្សេងនោះទេ។
ជុំវិញការស្លាប់របស់ជនជាតិវៀតណាមដែលលោតពីលើអាគារស្នាក់នៅមួយកន្លែងនៅក្បែរមាត់ច្រកអន្តរជាតិអូរស្មាច់នេះផងដែរបើតាមការបញ្ជាក់ពីក្រុមគ្រូពេទ្យបានប្រាប់ឲ្យដឹងថា ជាពត៌មានបឋម ជនរងគ្រោះមានឈ្មោះណាម ជាជនជាតិវៀតណាម ភេទប្រុសអាយុ២៧ឆ្នាំ។
គួររំលឹកថា ពាក់ព័ន្ធទៅនឹងករណីមានបុរសជាជនជាតិវៀតណាមដែលបានលោតពីលើអាគារកម្ពស់ជិត១០ជាន់ហើយបានស្លាប់នៅក្នុងមន្ទីរពេទ្យនេះផ្ទាល់ក្រុមការងារពត៌មានយើងមិនអាចសុំការបញ្ជាក់មូលហេតុនៃករណីការលោតធ្លាក់លើអាគារស្នាក់នៅរបស់ជនជាតិវៀតណាមថារឿងជារឿងអ្វីពីសមត្ថកិច្ចជំនាញផ្នែកពាក់ព័ន្ធបាននៅឡើយទេ ក្រោយពីឃើញពិនិត្យធ្វើកោសល្យវិច្ច័យក្នុងមន្ទីរពេទ្យបង្អែកខេត្តនៅព្រឹកមិញថ្ងៃទី១៦ខែតុលាឆ្នាំ២០២៣នេះរវាងគ្រូពេទ្យនគរបាលជំនាញ ដោយឡែកសមត្ថកិច្ចបានអះអាងយ៉ាងខ្លីមកវិញថារឿងនេះចាំខាងជំនាញគេធ្វើការស្រាវជ្រាវសុើបអង្កេតនៅកន្លែងកើតហេតុបន្តទៀតចប់សព្វគ្រប់សិនទើបផ្តល់ពត៌មានឲ្យច្បាស់ពិតប្រាកដតាមក្រោយ។
