(ភ្នំពេញ)៖ លោកឧត្តមសេនីយ៍ឯក កឹម ជាតិ អនុរដ្ឋលេខាធិការ និងជាអនុប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ បានបដិសេធថា លោកមិនចូលរួមក្នុងប្រតិបត្តិការចុះបង្ក្រាបក្រុមហ៊ុនឈីវទីម៉ិចគ្រុប កាលពីអំឡុងដើមខែវិច្ឆិកា ឆ្នាំ២០២១នោះទេ។ នេះបើយោងតាមលិខិតចុះថ្ងៃទី២៣ ខែវិច្ឆិកា ឆ្នាំ២០២៣។
លិខិតរបស់លោក កឹម ជាតិ បានគោរពរាយការណ៍ជូននាយឧត្តមសេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ ថាការប្ដឹងរូបលោកពីសំណាក់មេធាវីតំណាងក្រុមហ៊ុន ឈីវទីម៉ិចគ្រុប ពាក់ព័ន្ធករណីទាមទារប្រាក់ ១០ម៉ឺនដុល្លារ និងស្រាវីស្គីចំនួន ៤៨ដប គឺជាការប្ដឹងដោយគ្មានសំអាងច្បាស់លាស់។
លោក កឹម ជាតិ បានបញ្ជាក់ថា ការចុះបង្ក្រាបក្រុមហ៊ុន ឈីវទីម៉ិចគ្រុប កាលពីថ្ងៃទី០៥ ខែវិច្ឆិកា ឆ្នាំ២០២១ គឺធ្វើតាមការឯកភាពពីលោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ និងដឹកនាំសម្របសម្រួលដោយលោកព្រះរាជអាជ្ញារង ម៉ុត ដារ៉ា ដោយរូបលោក ( កឹម ជាតិ) មិនបានចូលរួមនោះទេ។
ទោះជាយ៉ាងណា នៅក្នុងរបាយការណ៍កម្រាស់ ៣ទំព័ររបស់លោក កឹម ជាតិ មិនបានបកស្រាយបញ្ជាក់ពីរឿងរ៉ាវពាក់ព័ន្ធនឹងការទាមទារប្រាក់ ១០ម៉ឺនដុល្លារពីក្រុមហ៊ុនឈីវទីម៉ិចគ្រុប ដើម្បីជាថ្នូរនឹងការអនុញ្ញាតិក្រុមហ៊ុននេះបើករកស៊ីវិញនោះទេ។
លោក កឹម ជាតិ បានព្យាយាមរំលេច និងអះអាងលាងខ្លួនរបស់លោក ដោយលើកឡើងអំពីនីតិវិធីគ្រប់យ៉ាងនៃការចុះបង្ក្រាប ការសម្រេចបិទ និងការសម្រេចបើក ក្រុមហ៊ុន ឈីវទីម៉ិចគ្រុប ឱ្យរកស៊ីវិញ គឺជាការសម្រេចរបស់លោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ និង លោកព្រះរាជអាជ្ញារង ម៉ុត ដារ៉ា ដែលជាស្ថាប័នតំណាងអយ្យការ គឺមិនពាក់ព័ន្ធនឹងរូបលោកឡើយ។
មហាជននៅតែមានការងឿងឆ្ងល់ និងនៅតែលើកជាសំណួរថា៖ បើគ្រប់នីតិវិធី សុទ្ធតែមានការឯកភាពពីតំណាងអយ្យការ ចុះរឿងលុយ ១០ម៉ឺនដុល្លារ អ្នកណាអ្នកយក? ហេតុអ្វីលោក កឹម ជាតិ មិនហ៊ាននិយាយ?
សូមជម្រាបជូនថា មេធាវីតំណាងឱ្យក្រុមហ៊ុន ឈីវទីម៉ិចគ្រុប កាលពីថ្ងៃទី០៦ ខែតុលា ឆ្នាំ២០២៣ បានដាក់ពាក្យប្ដឹងក្រុមការងាររបស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលដឹកនាំដោយលោក កឹម ជាតិ ទៅអគ្គាធិការដ្ឋាន ក្រសួងមហាផ្ទៃ ដើម្បីឱ្យជួយរកយុត្តិធម៌។
បណ្ដឹងរបស់លោកមេធាវី អ៊ូច សុភត្រា បានចោទប្រកាន់ថា នៅពេលចុះបង្ក្រាបក្រុមហ៊ុន ឈីវទីម៉ិចគ្រុប ក្រុមការងារបស់លោក កឹម ជាតិ បានទាមទារប្រាក់ចំនួន ១០ម៉ឺនដុល្លារ និងស្រាវីស្គីចំនួន ៤៨ដប ដើម្បីជាថ្នូរនឹងការអនុញ្ញាតិឱ្យក្រុមហ៊ុនរបស់កូនក្ដីលោកអាចបើកដំណើរវិញបាន។
ចំពោះករណីប្ដឹងលោក កឹម ជាតិ នេះ អ្នកនាំពាក្យក្រសួងមហាផ្ទៃ ធ្លាប់បានបញ្ជាក់ថា លោក ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានឲ្យស្ថាប័នអគ្គស្នងការជាតិជាអ្នកស៊ើបអង្កេត និងស្រាវជ្រាវ ព្រោះវាជាករណីព្រហ្មទណ្ឌពាក់ព័ន្ធនឹងការទាមទារប្រាក់។
អ្នកនាំពាក្យដដែល ថ្លែងថា លទ្ធផលយ៉ាងណានោះ អគ្គស្នងការនគរបាលជាតិនៅពុំទាន់បញ្ចប់ការស៊ើបអង្កេត និងស្រាវជ្រាវនៅឡើយទេ៕
