(ភ្នំពេញ)៖ ទំនងជាមិនមែនមានតែលោកឧត្តមសេនីយ៍ឯក កឹម ជាតិ អនុប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ និងជាអតីត អនុរដ្ឋលេខាធិការ ក្រសួងមហាផ្ទៃ ម្នាក់ទេដែលជាប់ពាក់ព័ន្ធក្នុងសំណុំរឿងជម្រិតទារប្រាក់ និងស្រា ពីម្ចាស់ក្រុមហ៊ុន ឈីវ ទីម៉ិច គ្រុប។
បើតាមការបញ្ជាក់របស់ ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌ សមត្ថកិច្ច កំពុងធ្វើការស្រាវជ្រាវ ស៊ើបអង្កេត និងចាត់ការតាមនីតិវិធី លើបណ្ដឹងមេធាវីតំណាងក្រុមហ៊ុន ឈីវ ទីម៉ិន គ្រុប ពាក់ព័ន្ធនឹងលោកឧត្តមសេនីយ៍ កឹម ជាតិ។
អ្នកនាំពាក្យដដែលបាន បន្ថែមថា ចំពោះការជាប់ពាក់ព័ន្ធនឹងអ្នកណាៗទៀតនោះ នៅមិនទាន់ដឹងនៅឡើយទេ ព្រោះសមត្ថកិច្ចកំពុងធ្វើការស៊ើបអង្កេត។ បើរកឃើញអ្នកពាក់ព័ន្ធផ្សេងទៀតសមត្ថកិច្ចនឹងចាត់ការតាមផ្លូវច្បាប់។
ការបើកការស៊ើបអង្កេតយ៉ាងស៊ីជម្រៅលើសំណុំរឿងនេះ អាចដោយតែ ករណីដ៏រសើបមួយនេះ មានការជាប់ពាក់ព័ន្ធគ្នាជាប្រព័ន្ធ។ នេះបើយោងតាមរបស់ការណ៍កម្រាស់ ៣ទំព័រ របស់លោកឧត្តមសេនីយ៍ឯក កឹម ជាតិ ដាក់ជូនលោកនាយឧត្តមសេនីយ៍ មៀច សុផាន់ណា រដ្ឋលេខាធិការ និងប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ ដើម្បីឆ្លើយតបនឹងបណ្ដឹងរបស់មេធាវីតំណាងក្រុមហ៊ុន ឈីវ ទីម៉ិច គ្រុប។
របាយការណ៍របស់លោកឧត្តមសេនីយ៍ឯក កឹម ជាតិ ចុះថ្ងៃទី២៣ ខែវិច្ឆិកា ឆ្នាំ២០៣ បានលាតត្រដាង និងបញ្ជាក់ចំនួន ១៥ចំណុចយ៉ាងច្បាស់ថា ទាំងនៅក្នុងនីតិវិធីការចុះបង្ក្រាប បិទ និងបើកក្រុមហ៊ុន ឈីវ ទីម៉ិច គ្រុប គឺសុទ្ធតែមានការដឹងលឺ និងឯកភាព ពីនាយកឧត្តមសេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ,លោកឧត្តមឯក តាន់ សុវិជ្ជា ប្រធានលេខាធិការដ្ឋាន គណៈកម្មាធិការប្រយុទ្ធប្រឆាំងផលិតផលក្លែងក្លាយ, លោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងលោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។
ប៉ុន្តែរហូតមកដល់ពេលនេះ មានតែលោកឧត្តមសេនីយ៍ឯក កឹម ជាតិ ម្នាក់គត់ដែលត្រូវបានដាក់ទណ្ឌកម្មដោយដកតំណែងពី អនុរដ្ឋលេខាធិការ ក្រសួងមហាផ្ទៃ តាមព្រះរាជក្រឹត្យចុះថ្ងៃទី១៤ ខែធ្នូ ឆ្នាំ២០២៣។
បន្ទាប់ពីរបូតតំណែងពីអនុរដ្ឋលេខាធិការក្រសួងមហាផ្ទៃ លោក កឹម ជាតិ ត្រូវបានប្រធាននាយកដ្ឋានព្រហ្មទណ្ឌក្រសួងមហាផ្ទៃ កោះហៅឱ្យចូលបំភ្លឺ នៅព្រឹកថ្ងៃទី២៨ ខែធ្នូ ឆ្នាំ២០២៣ ខាងមុខពាក់ព័ន្ធនឹងករណីយកលុយ ១០ម៉ឺនដុល្លារ និងស្រាវីស្គី ៤៨ ជាថ្នូរនឹងការបើកផ្លូវឱ្យក្រុមហ៊ុន ឈីវ ទីម៉ិច គ្រុប អាចបើករកស៊ីវិញបាន។
ការកោះហៅលោក កឹម ជាតិ ឱ្យចូលឆ្លើយនៅមុខនគរបាលយុត្តិធម៌ អាចជំហ៊ានបឋមនៃការស៊ើបអង្កេត ក្នុងការប្រមូលព័ត៌មានពីការជាប់ពាក់ព័ន្ធរបស់ក្រុមមន្ត្រីផ្សេងៗទៀត ដែលបានទទួលចំណែក នៃលុយ ១០ម៉ឺនដុល្លារ និងស្រា ៤៨ដប របស់ក្រុមហ៊ុន ឈីវ ទីម៉ិច គ្រុប។
មហាជនកំពុងបានចាប់អារម្មណ៍ខ្លាំង និងសង្ឃឹមថា លោកឧត្តមសេនីយ៍ កឹម ជាតិ នឹងមានសេចក្តីក្លាហាន ក្នុងការចូលទៅបំភ្លឺចំពោះមុខកម្លាំងនគរបាលព្រហ្មទណ្ឌ និងហ៊ាននិយាយការពិត លាតត្រដាងឱ្យអស់ពីអ្នកដែលបានទទួលផលប្រយោជន៍ពីករណីនេះ ដើម្បីឱ្យមន្ត្រីទាំងអស់នោះទទួលបានទណ្ឌកម្មដូចរូបលោកដែរ។
សូមជម្រាបជូនថា មេធាវីតំណាងឱ្យក្រុមហ៊ុន ឈីវទីម៉ិចគ្រុប កាលពីថ្ងៃទី០៦ ខែតុលា ឆ្នាំ២០២៣ បានដាក់ពាក្យប្ដឹងក្រុមការងាររបស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលដឹកនាំដោយលោក កឹម ជាតិ ទៅអគ្គាធិការដ្ឋាន ក្រសួងមហាផ្ទៃ ដើម្បីឱ្យជួយរកយុត្តិធម៌។
បណ្ដឹងរបស់លោកមេធាវី អ៊ូច សុភត្រា បានចោទប្រកាន់ថា នៅពេលចុះបង្ក្រាបក្រុមហ៊ុន ឈីវទីម៉ិចគ្រុប ក្រុមការងារបស់លោក កឹម ជាតិ បានទាមទារប្រាក់ចំនួន ១០ម៉ឺនដុល្លារ និងស្រាវីស្គីចំនួន ៤៨ដប ដើម្បីជាថ្នូរនឹងការអនុញ្ញាតិឱ្យក្រុមហ៊ុនរបស់កូនក្ដីលោកអាចបើកដំណើរការវិញបាន៕
