កណ្តាល ៖ មានករណីឃាតកម្មដព្រៃផ្សៃបានកើតឡើង បង្កឲ្យមានការភ្ញាក់ផ្អើលយ៉ាងខ្លាំង បន្ទាប់ពីគេដឹងថា ឃាតករជាប្អូនថ្លៃបានយកកណ្ដៀវកាប់ជនរងគ្រោះជាបងថ្លៃស្លាប់ក្នុងថ្លុកឈាម ដោយសាររឿងច្រណែន ហើយបន្ទាប់ពីកើតហេតុ ឃាតករបានរត់គេចខ្លួនចូលព្រៃបាត់ទៅ ដោយមិនដឹងថា ទៅជាន់ខ្សែលួសគេរាយឆក់កណ្តុរ បណ្ដាលឲ្យស្លាប់ឡើយ ទាល់តែព្រឹកមិញនេះ ទើបប្រជាពលរដ្ឋប្រទះឃើញសពបានរាយការណ៍ប្រាប់សមត្ថកិច្ចចុះពិនិត្យមើលផ្អើលទាំងព្រឹកតែម្ដង។
ហេតុការណ៍ខាងលើនេះ បានកើតឡើងវេលាម៉ោង៩និង៣០នាទីយប់ ថ្ងៃទី១ ខែមិថុនា ឆ្នាំ២០១៩ នៅចំណុចផ្ទះរបស់ឈ្មោះ ហម សារេន ស្ថិតក្នុងភូមិពោធិបាន ស្រុកកោះធំ ខេត្តកណ្ដាល។
ជនរងគ្រោះដែលស្លាប់ឈ្មោះ ឡឹង លី ភេទប្រុស អាយុ២៥ឆ្នាំ រស់នៅភូមិពោធិបាន ឃុំពោធិបាន ស្រុកកោះធំ ខេត្តកណ្ដាល ត្រូវជាបងថ្លៃ។ ចំណែក ជនសង្ស័យដែលត្រូវជាប្អូនថ្លៃឈ្មោះ ផាន់ ម៉ៃ ភេទប្រុស អាយុ២៣ឆ្នាំ រស់នៅភូមិឃុំកើតហេតុ។
សមត្ថកិច្ចបានប្រាប់អោយដឹថាមុនពេលកេីតហេតុជនរងគ្រោះកំពុងអង្គុយចុចទូរស័ព្ទ ស្រាប់តែជនសង្ស័យ បានដើរចូលមកពីក្រោយ ហើយយកកណ្ដៀវកាប់ជនរងគ្រោះ បណ្តាលឱ្យស្លាប់ក្នុងថ្លុកឈាមតែម្ដង បន្ទាប់មកជនសង្ស័យ ក៏រត់គេចខ្លួនចូលព្រៃខាងមុខផ្ទះបាត់។
តាមការបំភ្លឺរបស់ឈ្មោះ ផាន់ សារ៉េម ត្រូវជាម្តាយក្មេកជនរងគ្រោះ និងត្រូវម្តាយបង្កើតជនសង្ស័យ បានឲ្យដឹងថា ជនរងគ្រោះ និងជនសង្ស័យត្រូវជាបងថ្លៃ ប្អូនថ្លៃនឹងគ្នា ហើយពុំដែលមានទំនាស់ទាស់គ្នាទេ នៅរួមរស់ក្រោមដំបូលផ្ទះតែមួយ។ លុះនៅថ្ងៃទី១ខែ មិថុនា ឆ្នាំ២០១៩ វេលាម៉ោងប្រហែល១៩និង០០នាទី គាត់បានសំរាកនៅក្នុងផ្ទះ លើឡៅតឿ ឯកូនគាត់ឈ្មោះ ផាន ផាន់នី (ហៅម៉ៃ) នៅសម្រាកជាមួយប្រពន្ធខាងក្រោមផ្ទះ លុះបន្តិចក្រោយមក កូនប្រសារបស់គាត់ឈ្មោះ ឡឹង លី ក៏ជិះម៉ូតូដឹកប្រពន្ធ ឈ្មោះ ផាន់ សារ៉ាយ ជាកូនស្រីបង្កើតរបស់គាត់មកដល់ ពេលនោះគាត់ជាម្តាយ ក៏បើកទូរស័ព្ទមើលរឿងល្ខោនបន្តិច ក្រោយមកឮសំឡេងកូនស្រីគាត់ឈ្មោះ ផាន់ សារ៉ាយ ស្រែកទ្រហ៊ោយំថា ប្តីខ្ញុំដាច់កហើយ បន្ទាន់មកគាត់ក៏ចុះពីលើឡៅតឿ មកខាងក្រោមឃើញឈ្មោះ ឡឹង លី ដេកស្លាប់ក្នុងថ្លុកឈាម ឯកូនបង្កើតគាត់ឈ្មោះ ផាន ផាន់នី (ហៅម៉ៃ) បានរត់គេចខ្លួនបាត់។
តាមការបំភ្លឺរបស់ឈ្មោះ ព្រិល រិន ឈ្មោះ ហុក វី និងឈ្មោះ ជី ពិសិដ្ឋ បានឲ្យដឹងថា អ្នកទាំង ៣នាក់ កំពុងអង្គុយហូបស្រាបៀរ នៅក្រោមផ្ទះ ខាងត្បូងជាប់ផ្ទះកើតហេតុ បានឃើញឈ្មោះ ផាន ផាន់នី (ហៅម៉ៃ) ដើរកាត់មុខគាត់ ដោយនៅនឹងដៃមានកាន់កណ្តៀវ ១ផង ដើរឆ្ពោះទៅទិសខាងកើតបាត់ទៅ។
ក្រោយមកទើបឃើញផ្អើលឆោឡោឮសំឡេងស្រែកទ្រហោយំថា ឡឹង លី (ជនរងគ្រោះ) ត្រូវបានគេសម្លាប់។ រួចអ្នកទាំង៣នាក់ បានទៅមើលឃើញឈ្មោះ ឡឹង លី ស្លាប់ក្នុងថ្លុកឈាមនៅក្នុងផ្ទះឈ្មោះ ផាន សារ៉េម ប្រាកដមែន។
បន្ទាប់ពីទទួលបានព័ត៌មាន កម្លាំងជំនាញ នៃអធិការដ្ឋាននគរបាលស្រុកកោះធំ បានចុះមកដល់កន្លែងកើតហេតុ ដោយសហការជាមួយកម្លាំងប៉ុស្តិ៍រដ្ឋបាលអាជ្ញាធរមូលដ្ឋាន លោកគ្រូពេទ្យផ្នែកជំនាញ និងក្រុមគ្រួសារជនរងគ្រោះ ដើម្បីធ្វើការពិនិត្យសាសព។
ការពិនិត្យឃើញមានស្នាមរបួស ចំនួន២កន្លែង ទី១-នៅផ្នែកកខាងមុខ មានស្នាមមុតប្រវែង១៦សង់ទីម៉ែត្រ ដាច់សរសៃ និងបំពង់ក។ ទី២-នៅផ្នែកក្បាលខាងក្រោយមានស្នាមមុតកាត់ទទឹង ប្រវែង៩សង់ទីម៉ែត្រ ជំរៅដល់លលាដ៏។ ក្រៅពីនេះពុំមានស្លាកស្នាមអ្វីទៀតឡើយ។ សន្និដ្ឋានថា៖ ជនរងគ្រោះស្លាប់ ក្នុងអំពើឃាត្តកម្ម។
មូលហេតុ ដោយមានភាពច្រណែនគ្នា ក្រោយពីពិនិត្យចប់សព្វគ្រប់ សមត្ថកិច្ចបានប្រគល់សាកសពជនរងគ្រោះ ជូនក្រុមគ្រួសារដើម្បីយកទៅធ្វើបុណ្យតាមប្រពៃណី។
លុះមកដល់ព្រឹកឡើងថ្ងៃទី២ ខែមិថុនា ឆ្នាំ២០១៩ ក៏មានប្រជាពលរដ្ឋរាយការណ៍ថា បានឃើញជនសង្ស័យ ឈ្មោះ ផាន ផាន់នី (ហៅម៉ៃ) ដើរជាន់ខ្សែលួសរាយឆក់កណ្ដុរស្លាប់បាត់ហើយ នៅចំណុចដីចម្ការពោតរបស់ប្រជាពលរដ្ឋ ស្ថិតនៅខាងកើតភូមិចម្ងាយ២០០០ម៉ែត្រ ក្នុងភូមិពោធិ៍បាន ឃុំពោធិ៍បាន ស្រុកកោះធំ ខេត្តកណ្ដាល ដោយមានដាវចំនួន១ដើម និងកណ្ដៀវ១ដើម នៅជាប់ខ្លួនផងដែរ។
ក្រោយមកសមត្ថកិច្ច បានចុះដល់កន្លែងកើតហេតុពិនិត្យឃើញថា សពជនសង្ស័យ ពិតជាស្លាប់ដោយសារជាន់ខ្សែលួសរាយឆក់កណ្ដុរ ដូចដែលប្រជាពលរដ្ឋបានរាយការណ៍ប្រាកដមែន៕
