ភ្នំពេញ៖ទេីបចេញពីខារ៉ាអូខេ បើករថយន្តហាយឡែនឌ័រមួយគ្រឿង ក្នុងល្បឿនលឿន ស្ថិតក្នុងទាំងស្ថានភាពស្រវឹង និងខ្វះការប្រុងប្រយ័ត្ន បានរេចង្កូតមកខាងស្ដាំដៃ ទៅបុកកន្ទុយរ៉ឺម៉កដឹកអេតចាយ ខ្ទាតជិត១០ម៉ែត្រ ទៅកល់ជាប់ពំនូកដីមុខផ្ទះប្រជាពលរដ្ឋ បណ្ដាលឱ្យបុរសស្រ្តីពីរនាក់ប្ដីប្រពន្ធ កំពុងរេីសអេតចាយ រងរបួសស្រាលទាំងពីរនាក់ ចំណែករថយន្តបង្ករងការខូចខាតយ៉ាងដំណំនិងធ្លាក់កាងខាងមុខ ហុយផ្សែងទ្រលោម សំណាងល្អចេះម្ចាស់កាច់សោរពន្លត់ទាន់ បង្កការភ្ញាក់ផ្អើលដល់អ្នកជិតខាង រាយការណ៍ប្រាប់សមត្ថកិច្ច ចុះមកពិនិត្យមើលទាំងយប់។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០០:៣០នាទីយប់ រំលងអាធ្រាត្រឈានចូលថ្ងៃទី០៣ ខែមិថុនា ឆ្នាំ២០១៩នេះ ត្រង់ចំណុចខាងមុខអាជ្ញាធរទន្លេសាប (មុខផ្ទះលក់ចាប់ហួយជាប់ហាងនំចាក់អង្រែ) លេីកំណាត់ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញ បុរសស្ត្រី២នាក់ប្ដីប្រពន្ធ ជាអ្នករេីសអេតចាយ បានបើកម៉ូតូសណ្ដោងរ៉ឺម៉កដឹកអេតចាយ ដើររើសសំបកដប និងកំប៉ុងអេតចាយ ដែលបន្សល់ពីការប្រេីប្រាស់ហូបចុករបស់បងប្អូនប្រជាពលរដ្ឋ ដែលបោះចោលតាមផ្លូវ និងនៅតាមគំនរសំរាមតាមបណ្ដោយផ្លូវជាតិលេខ២ ។
ដោយប្ដីជាអ្នកបេីកម៉ូតូសណ្ដោងរ៉ឺម៉ក ប្រពន្ធជាអ្នករេីស ទិសដៅពីជើងទៅត្បូង លុះមកដល់ចំណុចកើតហេតុខាងលើ ខណៈពេលដែលកំពុងឈប់រ៉ឺម៉ក ចុះទៅរើសសំបកកំប៉ុងអេតចាយក្នុងគំនរសំរាម ដោយមិនដឹងខ្លួន ។
ស្រាប់តែមានរថយន្តមួយគ្រឿង ម៉ាកហាយឡិនឌ័រ ពណ៍ស្ករ ពាក់ស្លាកលេខភ្នំពេញ 2AD-9944 បើកបរដោយបុរសម្នាក់ ក្នុងស្ថានភាពស្រវឹងស្រាជោគជាំ បានរេចង្កូតទៅបុកកន្ទុយរ៉ឺម៉កដឹកអេតចាយ ខ្ទាតជិត១០ម៉ែត្រ ទៅកល់ជាប់ពំនូកដី នៅមុខផ្ទះប្រជាពលរដ្ឋ ទេីបមិនមានការខូចខាតអ្វីច្រេីន គ្រាន់តែរាយបាយសំបកដប សំបកកំប៉ុងអេតចាយរាយប៉ាយពេញផ្លូវ និងបណ្ដាលឱ្យបុរសស្រ្តីពីរនាក់ប្ដីប្រពន្ធ កំពុងរេីសអេតចាយ រងរបួសស្រាលទាំងពីរនាក់ ចំណែករថយន្តបង្ករងការខូចខាតយ៉ាងដំណំ និងធ្លាក់កាងខាងមុខ រួចម្ចាស់រថយន្តចុះមកដោះស្រាយទាំងស្រវឹងទន់ខ្លួន ។
បន្តិចក្រោយមកគេឃេីញរថយន្តហុយផ្សែងទ្រលោម ទេីបនាំគ្នាស្រែកឆោឡោ តែសំណាងល្អ ម្ចាស់រថយន្តស្ទុះរត់ឡេីងរថយន្តកាច់សោរពន្លត់ទាន់ បង្កការភ្ញាក់ផ្អើលដល់អ្នកជិតខាង និងអ្នកដំណេីរតាមផ្លូវ រាយការណ៍ប្រាប់កម្លាំងល្បាតប៉ុស្តិ៍ចាក់អង្រែក្រោម ចុះមកពិនិត្យមើលទាំងយប់។
បន្ទាប់ពីឃេីញសមត្ថកិច្ចចុះមកដល់ ម្ចាស់រថយន្តបង្កបានប្រញាប់ប្រញាល់ និយាយលួងលោម ប្ដីប្រពន្ធ២នាក់ដែលរបួសនោះ ដោយបង្ខំផង លន់តួរផង និងអះអាងថាទេីបចេញពីខារ៉ាអូខេ អស់លុយហេីយ រួចដកលុយ១០ដុល្លារចេញពីកាបូប មកសំពះសុំទោសថែមទៀត ទេីបធ្វេីឲ្យ២នាក់ប្ដីប្រពន្ធ ទន់ចិត្ត និងមិនចង់វែងឆ្ងាយ ហេីយរងរបួសស្រាល តែបុរសជាប្ដីនៅចុកចុងដង្ហេីមទៀត មិនដឹងធ្វេីយ៉ាងម៉េច គេសងប៉ុណ្ណឹង ក៏ព្រមទទួលយកដេីម្បីបញ្ចប់រឿង និងទុកទិញថ្នាំលេប ប្រហែលមិនគ្រាន់ផងមេីលទៅ។
បច្ចប្បន្នក្រោយពេលកេីតហេតុ ម្ចាស់រថយន្តស្រវឹងស្រាទេីបចេញពីខារ៉ាអូខេ សល់លុយតែ១០ដុល្លារ ប្រគល់ឲ្យជនរងគ្រោះទាំងពីរនាក់ប្ដីប្រពន្ធ ដើម្បីបញ្ចប់រឿង រួចប្រញាប់ឡេីងរថយន្តបើកចេញពីកន្លែងកើតហេតុបាត់ទៅ ចំណែកពីរនាក់ប្ដីប្រពន្ធនាំគ្នាប្រមូលសំបកដប សំបកកំប៉ុងដាក់រ៉ឺម៉ក និងទាញចេញពីពំនូកដី រួចអរគុណសមត្ថកិច្ចនិងប្រជាពលរដ្ឋ ដែលបានជួយ រួចបេីករ៉ឺម៉ករេីសអេតចាយតាមផ្លូូវ ដេីម្បីយកទៅលក់យកលុយចិញ្ចិមគ្រួសារដូចសព្វដង៕ដោយ៖លោកសំនៀង
