ស្វាយរៀង៖ ឈ្មួញទុច្ចរិតលួចនាំជ្រូករស់ពីប្រទេសវៀតណាម ឆ្លងដែនចូលតាមច្រករបៀង មកស្រុកស្វាយជ្រំ ត្រូវក្រុមចល័ត នៃការិយាល័យផលិតកម្ម និងបសុព្យាលមន្ទីរកសិកម្មខេត្ត បង្ក្រាបបានចំនួន២០ក្បាល នៅវេលាម៉ោង៦និង៣០នាទីព្រឹក ថ្ងៃទី៥ ខែមិថុនា ឆ្នាំ២០១៩ ត្រង់ចំណុចភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង។
មន្ត្រីការិយាល័យផលិតកម្ម និងបសុព្យាបាលខេត្តស្វាយរៀង បានឲ្យដឹងថា ក្រុមចល័តត្រួតពិនិត្យទប់ស្កាត់ចរាចរណ៍សត្វខុសច្បាប់ របស់ការិយាល័យផលិតកម្ម និងបសុព្យាបាលខេត្ត ដឹកនាំដោយលោក ប៉ែន ចាន់ធី ប្រធានការិយាល័យផលិតកម្ម និងបសុព្យាបាលខេត្តស្វាយរៀង បានល្បាតស្ទាក់ចាប់រថយន្តមួយគ្រឿង ម៉ាក សាំយ៉ុង ពាក់ស្លាកលេខ កំពង់ចាម 2A-4379 ដឹកជ្រូករស់ខុសច្បាប់ពីប្រទេសវៀតណាម ចំនួន២០ក្បាល នៅត្រង់ចំណុចភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង វត្ថុតាងនឹងសត្វបានរក្សាទុកនៅមន្ទីរកសិកម្ម រុក្ខាប្រមាញ់ និងនេសាទខេត្ត ដើម្បីអនុវត្តតាមនីតិវិធីនៃច្បាប់។
លោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលខេត្តស្វាយរៀង បានឲ្យដឹងថា ក្រុមឈ្មួញបានលួចនាំជ្រូករស់ពីប្រទេសវៀតណាម ចូលមកតាមច្រករបៀងភូមិក្រាំងលាវ ស្រុកកំពង់ត្របែក ខេត្តព្រៃវែង ក៏ប៉ុន្តែត្រូវក្រុមល្បាត នៃអគ្គនាយយកដ្ឋានសុខភាពសត្វ និងផលិតកម្មសត្វ សហការជាមួយមន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មខេត្តព្រៃវែង ស្ទាក់ចាប់ ទើបក្រុមឈ្មួញដឹកជ្រូកគេចចូលមករដ្ឋបាលស្រុកស្វាយជ្រំ ដែលមានព្រំប្រទល់ជាប់គ្នា ទើបសមត្ថកិច្ចពេទ្យសត្វខេត្តស្វាយរៀង តាមបង្ក្រាបឈ្មួញក៏ព្យាមបើករថយន្តគេច រហូតមកដល់ចំណុចកើតហេតុខាងលើ ឈ្មួញបាននាំគ្នាលើកជ្រូកទម្លាក់ នៅមុខផ្ទះប្រជាពលរដ្ឋ ដើម្បីបង្វែងដាន ខណៈកំពុងលើកជ្រូកទម្លាក់ពីលើរថយន្ត បានជាង១០ក្បាល សមត្ថកិច្ចយើងទៅទាន់ក្រុមឈ្មួញ ក៏នាំគ្នារត់ចោលរថយន្ត និងទុកជ្រូកចោលនៅភូមិអង្គាសដីតែម្តង។
លោក ប៉ែន ចន្ធី បន្តទៀតថា ដោយឈ្មួញទុករថយន្ត និងជ្រូកចោលសមត្ថកិច្ច ក៏លើកជ្រូកដាក់លើរថយន្តវិញ និងហៅជាងសោធ្វើសោ រួចយករថយន្ត និងជ្រូកមករក្សាទុកនៅមន្ទីរកសិកម្មខេត្ត និងបូមឈាមជ្រូកទាំង២០ក្បាល យកទៅពិនិត្យនៅមន្ទីរពិសោធន៍រាជធានីភ្នំពេញ បើរកឃើញថា មានជំងឺយើងនិងកម្ទេចចោល បើគ្មានជំងឺត្រូវធ្វើការផាកពិន័យ តាមច្បាប់ពេទ្យសត្វ រួចប្រគល់ឲ្យម្ចាស់វិញ។
ហើយការផាកពិន័យនេះ គឺគិតជាប្រាក់១៥លានរៀល លើកទី១ បើមិនរាងចាលពិន័យគុណនឹងពីរ ស្មើ៣០លានរៀល។ ហើយចំពោះម្ចាស់ជ្រូកនេះ គឺសង្ស័យជាម្ចាស់ជ្រូក ដែលទើបតែចាប់ផាកពិន័យ កាលពីខែឧសភាកន្លងទៅ ក៏ប៉ុន្តែអ្នកបើកបររថយន្តរត់គេចបាត់ ប្តូរឲ្យអ្នកផ្សេងមកចូលខ្លួនដោះស្រាយ ហើយសារភាពថា ពួកគេប្រមូលទិញតាមផ្ទះ ដែលមានអ្នករកស៊ីដឹកជ្រូកតាមម៉ូតូ ពីប្រទេសវៀតណាមមកលក់ឲ្យ មិនដឹងថា ដឹកចូលតាមច្រកណានោះទេ។
ហើយកាលពីសប្តាហ៍មុន មន្ត្រីជំនាញបានស្ទាក់ចាប់បានកូនជ្រូករស់ចំនួន៥០ក្បាល ដែលឈ្មួញលួចដឹកនាំចូលមកក្នុងស្រុកខ្មែរខុសច្បាប់ យកទៅបូមឈាមពិនិត្យនៅមន្ទីរពិសោធន៍ អគ្គនាយកដ្ឋានសុខភាពសត្វ ក្រសួងកសិកម្ម តែគ្មានជំងឺទេ ហើយមកដល់ថ្ងៃទី៥ ខែមិថុនានេះ ពុំទាន់ឃើញម្ចាស់ជ្រូក ចូលមកដោះស្រាយ និងបង់ប្រាក់ផាកពិន័យទេ។
ចំណែកប្រជាពលរដ្ឋក្នុងខេត្តស្វាយរៀង បានលើកឡើងថា ជារឿយៗគេតែងតែឃើញមន្ត្រីជំនាញ ស្ទាក់ចាប់រថយន្តដឹកសត្វជ្រូករស់ដោយខុសច្បាប់ នាំចូលមកពីប្រទេសជិតខាង ចូលក្នុងភូមិសាស្ត្រទឹកដីខេត្តស្វាយរៀង ហើយការចាប់ឃាត់រថយន្តដឹកសត្វជ្រូករស់ទាំងអស់នោះ គ្រាន់តែបូមឈាមដើម្បីយកទៅពិនិត្យ នៅមន្ទីរពិសោធន៍នៅរាជធានីភ្នំពេញ ហើយរកឃើញថា គ្មានជំងឺនោះគ្រាន់តែផាកពិន័យ ហើយអាចនាំសត្វជ្រូករស់ទាំងអស់ ទៅកាប់សាច់វិញដដែល មិនឃើញមានឃាត់ខ្លួនថៅកែ ឬម្ចាស់នាំសត្វជ្រូកទាំងអស់ ចូលតុលានោះទេ ទើបពួកឈ្មួញមិនរាងចាល។
ប្រភពខាងលើបានបន្តទៀតថា នាពេលថ្មីនេះ មានកើតជំងឺប៉េសអាហ្វ្រិចដ៏កាចសាហាវ សូម្បីតែប្រទេសវៀតណាមផ្ទាល់ សឹងតែលែងហានទទួលទានសាច់ជ្រូក ប៉ុន្តែស្រុកខ្មែរនៅតែមានឈ្មួញ លួចដឹកតាមចិត្តដដែល បើចាប់បានបូមឈាមយកទៅពិសោធន៍ ហើយគ្មានជំងឺធ្វើការផាកពិន័យជាការស្រាច់ គ្មានទោសទាន់អ្វីទាំងអស់ ដូច្នេះហើយបានជាឈ្មួញទាំងអស់ នៅហ៊ានលួចដឹកជ្រូកវៀតណាមចូលដដែល។
ប្រជាពលរដ្ឋ និងមន្ត្រីរាជការ សូមឲ្យក្រសួងកសិកម្ម រុក្ខាប្រមាញ់ និងនេសាទ មេត្តាបង្កើតឲ្យមានច្បាប់ សម្រាប់ដាក់ទោសទាន់ដល់ក្រុមឈ្មួញ ដែលលួចដឹកសត្វជ្រូករស់ខុសច្បាប់ទាំងអស់ ដើម្បីឲ្យរាងចាល។
បើពុំដូច្នោះទេ ឈ្មួញនៅតែលួចនាំសត្វជ្រូក ចូលមកកាប់សាច់លក់ ធ្វើឲ្យមានការព្រួយបារម្មណ៍ពីសុខភាព អ្នកបរិភោគខ្លាំងណាស់ ហើយបើទប់ស្កាត់មិនបាន ធ្លោយប៉ះចំជ្រូកមានជំងឺ តើអ្នកណាទទួលខុសត្រូវ៕
