ភ្នំពេញ៖បុរសម្នាក់ដែលគេស្គាល់ថាជាមន្ត្រី យោធាបានជិះម៉ូតូ១គ្រឿងសង្ស័ យស្រវឹងស្រាក៏ជ្រុលទៅបុកទ្រូងផ្លូវ បណ្តាលអោយរងរបួសធ្ងន់ខ្លួនឯង ហើយត្រូវបានបញ្ជូនទៅមន្ទីពេទ្យភ្លាមៗ។
ហេតុការណ៍នេះបានកើតឡើង នៅវេលាម៉ោង១២និង ៤៥នាទី រំលងអាធ្រាត្រ ឈានចូលថ្ងៃទី១២ ខែឧសភា ឆ្នាំ២០១៩ ចំនុចផ្លូវ ១៩៣ កែងនិងផ្លូវ ម៉ៅសេងទុង សង្កាត់ទំនប់ទឹក ខណ្ឌចំការមន ។
បុរសរងគ្រោះមានឈ្មោះ សេង ចាន់ធារី ភេទប្រុស អាយុ៣៣ឆ្នាំ មុខរបរ យោធា មានស្រុកកំណើត ភូមិធម្មជាតិសម្តេចតេជោ ឃុំកន្តួត ស្រុកជាំក្សាន្ត ខេត្តព្រះវិហារ ជិះម៉ូតូម៉ាក TODAY ពណ៌ស អត់មានស្លាកលេខ ។
តាមប្រភពពត៌មាន ពីន្លែងកើតហេតុបានអោយដឹងថា មុនពេលកើតហេតុ គេបានឃើញ បុរសខាងលើ មិនដឹងថាគោលបំណងទៅណានោះទេ គឺបានជិះម៉ូតូម៉ាក TODAY ពណ៌ស អត់មាន ស្លាកលេខ ធ្វើដំណើរតាមផ្លូវ ម៉ៅសេងទុង ក្នុងទិសដៅ ពីជើងទៅត្បូង ក្នុងល្បឿនលឿន ខណះមកដល់ចំនុចកើត ដោយសង្ស័យអ្នកបើកម៉ូតូ ស្រវឹងផងនោះ ទើបបណ្ដាលអោយម៉ូតូ រេចង្កូត ជ្រុលទៅបុកនិង របាំងថ្មពុះចែកផ្លូវពេញទំហឹង បណ្តាលបុរសរូបនោះ ហោះផ្លោង ទៅផ្លូវម្ខាងទៀត បែកមាត់សន្លប់ស្តូកបាត់មាត់បាត់កតែម្តង ហើយភ្លាមៗនោះដែរ ជនរងគ្រោះត្រូវរថយន្តសង្គ្រោះ របស់គ្លិនិក ឯកជន បានដឹកយកទៅធ្វើការសង្គ្រោះ ។
ក្រោយពេលកើតហេតុ នៅសល់តែម៉ូតូរបស់ជនរងគ្រោះ ដែលរងការខូចខាត តិចតួច ត្រូវបានសមត្ថកិច្ចយកទៅរក្សាទុកនៅ ប៉ុស្តិនគបាលទំនប់ទឹក រងចាំប្រគល់អោយម្ចាស់វិញ៕
