ភ្នំពេញ ៖ យ៉ាងហោចណាស់មានមនុស្សបីបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងម៉ូតូ និងរថយន្ត កាលពីវេលាម៉ោងជាង១០ យប់ថ្ងៃទី១៧ ខែមិថុនា ឆ្នាំ២០១៩នេះ នៅចំណុចច្រមុះជ្រូកស្ទឹងមានជ័យផ្លូវ២១៧កែងផ្លូវវ៉េងស្រេង ក្នុង ភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
សមត្ថកិច្ចបានបញ្ជាក់ថា ម៉ូតូមួយគ្រឿងគ្មានស្លាកលេខជិះគ្នាបី គឺជាមុខសញ្ញាសង្ស័យ ដែលកម្លាំងសមត្ថកិច្ចខណ្ឌពោធិ៍ប្រដេញមក ខណៈពេលដែលម៉ូតូបើកក្នុងល្បឿនលឿនមកដល់ចំណុចកើតហេតុខាងលើ បានអកសឺជាមួយនឹងរថយន្តកូរ៉េមួយគ្រឿងដែលពាក់ស្លាកលេខ សៀមរាប3A-5440 ក៏បណ្ដាលឲ្យម៉ូតូបុកចូលក្រោយរថយន្តតែម្ដង។
ប្រភពពីកន្លែងកើតហេតុបានឲ្យដឹងថា បន្ទាប់ពីកើតហេតុម្ចាស់រថយន្តបានគេចខ្លួន។ ចំណែកជនរងគ្រោះទាំងបីនាក់ បានរងរបួសធ្ងន់ ហើយត្រូវបានរថយន្តសង្គ្រោះរបស់មន្ទីពេទ្យសួរគ៌ា ដឹកយកទៅសង្គ្រោះភ្លាមៗផងដែរ។
ក្រោយកើតហេតុមធ្យោបាយបង្កទាំងពីរត្រូវបានសមត្ថកិច្ច ធ្វើការវាស់វែង និងយកទៅរក្សាទុករង់ចាំដោះស្រាយពេលក្រោយ៕
