ភ្នំពេញ៖ ទីតាំងទីស្នាក់ការសាលាខណ្ឌចំការមន ត្រូវបានចេញសេចក្តីប្រកាស់ផ្លូាស់ប្តូរ នៅរសៀលថ្ងៃទី២០ មិថុនា ឆ្នាំ២០១៩ នេះ។
យោងតាមទំព័រហ្វេសប៊ុកផ្លូវរបស់ រដ្ឋបាលខណ្ឌចំការមន បានឲ្យដឹងថា រដ្ឋបាលខណ្ឌចំការមន មានកិត្តិយសសូមជម្រាបជូនដំណឹងដល់សាធារណជន ស្ថាប័នរដ្ឋ និងឯកជនទាំងអស់ឱ្យបានជ្រាបថា ដោយបច្ចុប្បន្នភូមិសាស្ត្រខណ្ឌចំការមន ត្រូវបានរាជរដ្ឋាភិបាលចេញអនុក្រឹត្យបំបែកជា២ ខណ្ឌ គឺ ខណ្ឌចំការមន(មានចំនួន៥សង្កាត់គឺ សង្កាត់ទន្លេបាសាក់, ទួលទំពូងទី២, ទួលទំពូងទី១, បឹងត្របែក និងផ្សារដើមថ្កូវ) និងខណ្ឌបឹងកេងកង (មានចំនួន៧សង្កាត់គឺ សង្កាត់បឹងកេងកងទី១, បឹងកេងកងទី២, បឹងកេងកងទី៣, អូឡាំពិក, ទួលស្វាយព្រៃទី១, ទួលស្វាយព្រៃទី២ និងទំនប់ទឹក)។
ចំពោះទីស្នាក់ការសាលាខណ្ឌចំការមន ដែលស្ថិតនៅ ផ្ទះលេខ ១៦៨ មហាវិថីម៉ៅសេទុង ភូមិ ០១ សង្កាត់បឹងកេងកងទី៣ ត្រូវបានប្ដូរទៅជាទីស្នាក់ការរបស់សាលាខណ្ឌបឹងកេងកងវិញ។
ចំណែកសាលាខណ្ឌចំការមន ត្រូវបានផ្លាស់ប្ដូរមកទីស្នាក់ការថ្មី ជាបណ្ដោះអាសន្នដែលស្ថិតនៅ អគារ Sales Center (ជាប់ស្ថានីយ៍ពន្លត់អគ្គីភ័យកោះពេជ្រ) ក្នុងទីក្រុងកោះពេជ្រ វិថីកោះពេជ្រ ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ចាប់ពីថ្ងៃទី ២០ ខែ មិថុនា ឆ្នាំ ២០១៩ នេះតទៅ។
អាស្រ័យហេតុនេះ សូមសាធារណជន ស្ថាប័នរដ្ឋ និងឯកជនមេត្តាជ្រាបជាព័ត៌មាន៕
