តាកែវ៖ នាវេលាម៉ោង១៤និង២០នាទី រសៀលថ្ងៃសុក្រ ៤រោច ខែជេស្ឋ ឆ្នាំកុរ ឯកស័ក ពុទ្ធសករាជ២៥៦៣ ត្រូវនឹងថ្ងៃទី២១ ខែមិថុនា ឆ្នាំ២០១៩ មានប្រជាពលរដ្ឋចំនួន២៨នាក់ ស្ថិតនៅភូមិត្នោតជ្រុំ និងរកាពក ឃុំត្រពាំងក្រសាំង ស្រុកបាទី បានពុលនំបញ្ចុក។
យោងតាមរបាយការណ៍របស់ប៉ុស្តិ៍ឃុំ បានឱ្យដឹងថាម្ចាស់ផ្ទះលក់ឈ្មោះ នៅ អឿន ភេទស្រីអាយុ៥៨ រស់នៅភូមិរកាពក ឃុំត្រពាំងក្រសាំង ជាមុខរបរប្រចាំថ្ងៃរបស់គាត់។
ចំពោះនំបញ្ចុក (ម្ចាស់ផ្ទះលក់នំបញ្ចុក)គាត់តែងតែទទួលយកមកលក់ជាប្រចាំថ្ងៃពីភូមិបចាម ឃុំចំបក់ ស្រុកបាទី ខេត្តតាកែវ។ ចំណែកបងប្អូន ពុលនំបញ្ចុក ពួកគាត់តែងតែពិសានំបញ្ចុកជាប្រចាំថ្ងៃដូចអ្នកលក់ដែរ ហើយពុំធ្លាប់មានបញ្ហាអ្វីកើតឡើងនោះទេ។
ក្នុងឱកាសនោះបានអញ្ជើញជួបសុខទុក្ខពីសំណាកលោកជំទាវ រស់ សុភារ៉ាវី សហប្រធានក្រុមការងារថ្នាក់កណ្តាលចុះជួយឃុំត្រពាំងក្រសាំង លោក ហូរ សុជីវណ្ណី សមាជិកក្រុមការងារចុះជួយស្រុកបាទី គណៈអភិបាលស្រុក កម្លាំងទាំង៣ប្រភេទ លោកមេឃុំ មេភូមិអនុប្រធានភូមិ និងបានយកទឹកទុក្ខពីលោកអ្នកគ្រូពេទ្យបង្អែកស្រុកបាទី ខេត្តតាកែវ។
ក្នុងនោះពេលសួរសុខទុក្ខប្រជាពលរដ្ឋរងគ្រោះដោយមានសង្ស័យនំបញ្ចុក លោកជំទាវក្រុមការងារ បានឧបត្ថម្ភថវិកា៣០,០០០រៀល ក្នុងម្នាក់ៗ ដោយឡែកលោកជំទាវរស់ សុភារ៉ាវី ក៏បានឧបត្ថម្ភដល់គ្រូពេទ្យបង្អែកស្រុកបាទី៣០០,០០០រៀល ផងដែរ៕
