កណ្ដាល៖ បុរសម្នាក់ កំពុងជិះម៉ូតូសុខៗស្រាប់តែមានម៉ូតូមួយគ្រឿងទៀត បើកមិនប្រកាន់ស្ដាំ ដោយល្បឿនលឿន បានរេចង្កូតមកបុកពេញមួយទំហឹង បណ្ដាលឲ្យស្លាប់ភ្លាមៗនៅកន្លែងកើតហេតុ នៅវេលាម៉ោង៥ព្រឹក ថ្ងៃទី២ ខែកក្កដា ឆ្នាំ២០១៩ លើកំណាត់ផ្លូវជាតិលេខ៦ ត្រង់ចន្លោះគីឡូម៉ែត្រលេខ១៣-១៤ ស្ថិតក្នុងភូមិថ្នល់បត់ ឃុំកោះចិន ស្រុកពញាឮ ខេត្តកណ្តាល ។
មន្រ្ដីនគរបាលចរាចរណ៍ស្រុកពញាឮបានឲ្យដឹងថា ម៉ូតូបង្កម៉ាកហុងដាឌ្រីម ធុនសេ១២៥ ស៊េរីឆ្នាំ២០១០ ពាក់ស្លាកលេខ ព្រៃវែង 1C-4747 បើកបរដោយជនមិនស្គាល់អត្ដសញ្ញាណ (រត់គេចខ្លួនក្រោយពេលកើតហេតុ) ។
ចំណែកជនរងគ្រោះស្លាប់បាត់បង់ជីវិតឈ្មោះ សួង វិសាល ភេទប្រុស អាយុ២៤ឆ្នាំ មានទីលំនៅភូមិរំពែងព្រះរៀម ឃុំរំពែងព្រះរៀម ស្រុកសំរោងទង ខេត្តកំពង់ស្ពឺ បើកបរម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខកំពង់ស្ពឺ 1N-1530 ។
ប្រភពដដែលបន្ដថា នៅមុនពេលកើតហេតុ សាក្សីបានឃើញម៉ូតូបង្កម៉ាកហុងដាឌ្រីម ស៊េរីឆ្នាំ២០១០ ធ្វើដំណើរតាមបណ្ដោយផ្លូវជាតិលេខ៦ ក្នុងទិសដៅពីលិចទៅកើត ដោយល្បឿនលឿន លុះដល់ចំណុចកើតហេតុ បានរេចង្កូតមកឆ្វេង ជ្រុលទៅបុកម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០១៨ ពេញមួយទំហឹង ដែលធ្វើដំណើរច្រាស់ទិសគ្នា បណ្ដាលឲ្យជនរងគ្រោះជាអ្នកបើកបរម៉ូតូហុងដាឌ្រីម ស៊េរីឆ្នាំ២០១៨ ដួលបោកក្បាលស្លាប់ភ្លាមៗនៅកន្លែងកើតហេតុ រីជនជាអ្នកបើកបរម៉ូតូបង្កបានរត់គេចខ្លួនបាត់ស្រមោល ។
ក្រោយពីមានហេតុការណ៍កើតឡើង នគរបាលចរាចរណ៍ស្រុកពញាឮ បានចុះមកធ្វើការពិនិត្យ រួចវាស់វែង នៅកន្លែងកើតហេតុ កសាងសំណុំរឿងដកហូតយកមធ្យោបាយពាក់ព័ន្ធម៉ូតូទាំង២គ្រឿង យកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ រីឯសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែង ធ្វើបុណ្យតាមប្រពៃណី ។
ការសន្និដ្ឋានរបស់សមត្ថកិច្ចជំនាញបានឲ្យដឹងថា ករណីខាងលើនេះ គឺបណ្តាលមកពីអ្នកបើកបរម៉ូតូម៉ាកហុងដាឌ្រីម ស៊េរីឆ្នាំ២០១៩ ពាក់ស្លាកលេខ ព្រៃវែង1C.4747 បើកចូលចំណែកផ្លូវនៃយានម្ខាងទៀត មិនប្រកាន់ស្ដាំ ទើបបានជាមានរឿងហេតុកើតឡើង ៕
