ព្រះសីហនុ ៖ មិនសរសើរគឺពិតជាមិនបានមែន លោកអភិបាលខេត្តព្រះសីហនុរូបនេះប្រិយមិត្តធ្លាប់បានស្គាល់រួចមកហើយ ឯកឧត្តម គួច ចំរើន អតីតអភិបាលខេត្តកំពង់ចាមដែលអ្នកខេត្តកំពង់ចាមតែងតែគោរពស្រលាញ់គាំទ្រហើយក៏ជាអភិបាលខេត្តមួយរូបដែលមានសមត្ថភាពខ្ពស់រហូតធ្វើឲ្យសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសរសើរថាអភិបាលខ្លាំងទើបសម្ដេចតេជោបានធ្វើការផ្ទេរភារកិច្ច និងតែងតាំងលោកជាអភិបាលខេត្តព្រះសីហនុជំនួសលោក យន្ត មីន។
ហើយមិនតែប៉ុណ្ណោះ លោក គួច ចំរើន ក៏ធ្លាប់បានថ្លែងយ៉ាងម៉ឺងម៉ាត់ នៅក្នុងពិធីប្រកាសចូល កាន់តំណែងដោយផ្ទាល់របស់ខ្លួនជាអភិបាលខេត្តព្រះសីហនុកាលពីព្រឹកថ្ងៃទី២៩ ខែមិថុនា ឆ្នាំ២០១៩កន្លងទៅនេះថា ដើម្បីជាសក្ខីភាពឆ្លើយតប នឹងការផ្តល់នូវការគាំទ្រ និងជំនឿជឿជាក់ ប្រកបដោយទំនុកចិត្តពីប្រមុខរាជរដ្ឋាភិបាលកម្ពុជា និងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ខ្ញុំបាទសូមអនុញ្ញាត ធ្វើការប្តេជ្ញាចិត្តនូវចំណុចសំខាន់ ១៣ចំណុចដូចខាងក្រោម៖
១-ប្តេជ្ញាខិតខំអនុវត្តឲ្យ បានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តិជាធរមាន និងគោលការណ៍ណែនាំនានា របស់រាជរដ្ឋាភិបាលដែលបានដាក់ចេញឲ្យ មានប្រសិទ្ធភាពខ្ពស់។
២-ប្តេជ្ញាគោរពគាំទ្រ និងអនុវត្តឱ្យបានខ្ជាប់ខ្ជួន នូវកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៤របស់រាជរដ្ឋាភិបាលក្រោមការដឹកនាំប្រកបដោយ គតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
៣-ខិតខំគោរព និងអនុវត្តតាមគោលការណ៍ ដឹកនាំចង្អុលបង្ហាញ និងរាល់ការផ្តល់នូវអនុសាសន៍ ដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ដូចជាថ្នាក់ដឹកនាំ ក្រសួងស្ថាប័ននានាឲ្យបានល្អ ដើម្បីពង្រឹងការគ្រប់គ្រងដឹកនាំ ប្រកបដោយប្រសិទ្ធភាព តម្លាភាពក្នុងការបំពេញភារកិច្ច នៅរដ្ឋបាលថ្នាក់ក្រោមជាតិ។
៤-បន្តការខិតខំទប់ស្កាត់ លុបបំបាត់រាល់បាតុភាពអសកម្មនានា ទាំងឡាយដែលធ្វើឲ្យប៉ះពាល់ បង្កការថ្នាំងថ្នាក់ដល់ប្រជាពលរដ្ឋ ចូលរួមចំណែកលើកកំពស់ជីវភាព រស់នៅ សុខមាលភាពការ កាត់បន្ថយភាពក្រីក្ររបស់ប្រជាជន ស្របតាមគោលនយោបាយ របស់រាជរដ្ឋាភិបាលកម្ពុជា និងជាពិសេសអនុវត្តន៍តាមអនុសាសន៍សម្តេចតេជោដោយពង្រឹងការអនុវត្តច្បាប់ គ្មានការលើកលែង។
៥-យកចិត្តទុកដាក់រៀបចំកសាង និងអភិវឌ្ឍន៍លើវិស័យនានាក្នុងខេត្ត ពិសេសការរៀបចំកែលំអរ សោភ័ណភាពទីក្រុងឆ្នេរសមុទ្រ និងទីប្រជុំជនក្នុងការចូលរួម ប្រលងប្រណាំង ទីក្រុងស្អាត ធានាបាននូវបរិស្ថានល្អ ប្រកបដោយសក្តានុពលសេដ្ឋកិច្ចសង្គម លើកស្ទួយជីវភាពរស់នៅ ប្រកបដោយវិបុលភាព ផាសុកភាព សុខុមាលភាព ជូនប្រជាជនទូទាំងខេត្ត ប្រកបដោយចីរភាព និងបរិយាប័ន្ន។
៦-ជំរុញការអនុវត្តគោលនយោបាយភូមិ-ឃុំ មានសុវត្ថិភាព ឲ្យកាន់តែមានប្រសិទ្ធភាពខ្ពស់ ដើម្បីបន្តរក្សាសន្តិសុខ សណ្តាប់ធ្នាប់សង្គម រក្សាស្ថេរភាពនយោបាយ និងភាពសុខដុមនីយកម្ម ជូនប្រជាពលរដ្ឋឲ្យកាន់តែ ល្អប្រសើរឡើងថែមទៀត។
៧-យកចិត្តទុកដាក់ អនុវត្តគោលនយោបាយកំណែទម្រង់ស៊ីជម្រៅមុតស្រួច ជាពិសេសគោលនយោបាយវិមជ្ឈការ និងវិសហមជ្ឈការដើម្បីការអភិវឌ្ឍន៍ តាមបែបប្រជាធិបតេយ្យ នៅថ្នាក់ក្រោមជាតិ ស្របតាមកម្មវិធីជាតិ រយៈពេល១០ឆ្នាំ និងផែនការយុទ្ធសាស្រ្ត រយៈពេល ៥ឆ្នាំ និងកម្មវិធីវិនិយោគ ៣ឆ្នាំរំកិល ក្នុងតំណាក់កាលបន្តបន្ទាប់ឲ្យទទួលបាន លទ្ធផលជាវិជ្ជមាន។
៨-ពង្រឹងថែរក្សាស្មារតីសាមគ្គី ឯកភាពផ្ទៃក្នុង ជួរគណៈអភិបាល បង្កើតទំនាក់ទំនងល្អ ជាមួយក្រុមប្រឹក្សា រួមទាំងក្រសួង ស្ថាប័នអង្គភាពពាក់ព័ន្ធ អង្គការដៃគូរអភិវឌ្ឍ លើកកំពស់សមត្ថភាពមន្ត្រីរាជការស៊ីវិល មន្ត្រីជំនាញ កងកម្លាំងប្រដាប់អាវុធ ដើម្បីធានាឱ្យរដ្ឋបាលខេត្ត អនុវត្តមានភាពរលូន។
៩-ពង្រឹងការគ្រប់គ្រងស្ថិតិប្រជាពលរដ្ឋ គ្រប់គ្រងស្ថិតិជនអន្តោប្រវេសន៍ កម្មករចំណាកស្រុកឱ្យ បានច្បាស់លាស់។
១០-ចូលរួមសហប្រត្តិការអនុវត្ត សេចក្តីសម្រេចស្តីពីការបង្កើត គណៈកម្មាការត្រួតពិនិត្យ គុណភាពសំណង់ នៅខេត្តព្រះសីហនុ សំដៅត្រួតពិនិត្យបទដ្ឋាន បច្ចេកទេស បទដ្ឋានគតិយុត្តិ ស្តង់ដារសំណង់ ស្តង់ដារសុវត្ថិភាព និងគុណភាពសំណង់ ព្រមទាំងត្រួតពិនិត្យលក្ខណៈសម្បត្តិ របស់ក្រុមទទួលម៉ៅការសាងសង់។
១១-ដឹកនាំមន្ត្រីរាជការ មន្ត្រីជំនាញ ដើម្បីធ្វើការអភិវឌ្ឍន៍មូលដ្ឋាន និងបម្រើសេវាសាធារណៈជូន បងប្អូនប្រជាពលរដ្ឋឱ្យបានល្អប្រសើរ។
១២-សម្របសម្រួលស្ថាប័នមានសមត្ថកិច្ច ដើម្បីដោះស្រាយ និងស្វែងរកយុត្តិធម៌ជូនប្រជាពលរដ្ឋ។
១៣-ត្រៀមកម្លាំងអន្តរាគមន៍ សម្រាប់ដោះស្រាយ គ្រោះមហន្តរាយ និងបញ្ហាផ្សេងៗដែលអាចកើតមានឡើងជាយថាហេតុ។
ជាក់ស្ដែងថ្មីៗនៅព្រឹកថ្ងៃទី១៣ ខែកក្កដា ឆ្នាំ២០១៩នេះ លោក គួច ចំរើន អភិបាលនៃគណៈអភិបាលខេត្តព្រះសីហនុបានលើកឡើងតាមបណ្ដាញសង្គមផ្ទាល់ខ្លួនថា សម្រាមមិនមែនករណីគួរអោយស្អប់ខ្ពើមទេ តែអ្នកចោលសម្រាមផ្តេសផ្តាសជារឿងដែរមិនល្អ ថ្ងៃនេះយើងជួបជុំគ្នា គោលដៅយើងគឺប្រមូលសម្រាមចេញ ប៉ុន្តែអ្វីដែលសំខាន់ជាងនេះទៅទៀតពាក់ពន្ធ័នឹងសម្រាមសេសសល់នេះ សុំអោយអ្នកប្រើប្រាស់សម្រាមទាំងអស់ត្រូវមានការយល់ដឹងអោយបានច្បាស់អំពីសម្រាម។
ទោះបីជាមានយុទ្ធនាការប្រមូលសម្រាមចេញពីក្រុងព្រះសីហនុថ្ងៃនេះ ប្រាកដណាស់ថាការគ្រប់គ្រងសម្រាមមិនទាន់បានល្អនៅឡើយទេ តែយើងចាប់ផ្តើមយល់ដឹងអំពីសម្រាមពីពេលនេះតទៅ។
បញ្ហាសម្រាមកំពុងរីកធំហួសពីសមត្ថភាពក្រុមហ៊ុនដឹកជញ្ជូនចេញ តែយ៉ាងណាក៏ដោយយើងខ្ញុំរួមទាំងមន្ត្រីពាក់ព័ន្ធនឹងបន្តការខិតខំគ្រប់គ្រងសម្រាមនេះអោយបានច្បាស់លាស់ ដើម្បីរៀបចំផែនការអោយបានគត់មុតក្នុងការដឹកជញ្ជូនចេញអោយទាន់ អោយបានគ្រប់ចំនួននឹងបរិមាណដែលបានបញ្ជូនចេញ តែក៏សុំអោយមានកិច្ចសហការគ្នាចូលរួមពីគ្រប់មជ្ឍដ្ឋានទាំងអស់ ក្នុងការវេចខ្ជប់ ទុកដាក់សម្រាមអោយបានត្រឹមត្រូវ។
បន្ទាប់ពីការជួបជុំ និងការប្រមូលសម្រាមនេះទៅ ខ្ញុំក៏សុំស្នើសុំអ្នកស្ម័គ្រទាំងអស់ចូលរួមនៅទីនេះ បានរួមគ្នាបន្តការអប់រំផ្សព្វផ្សាយអោយបានទូលំទូលាយទៅកាន់បងប្អូន ប្រជាពលរដ្ឋអ្នកបង្កើតសម្រាមនៅទូទាំងក្រុងព្រះសីហនុយើង និងសូមអោយបងប្អូនអ្នកស្ម័គ្រចិត្តទាំងអស់នៅទីនេះ ធ្វើខ្លួនអោយក្លាយទៅជាចលករសំខាន់នៃអ្នកគ្រប់គ្រងសម្រាមនៅទីក្រុងព្រះសីហនុរបស់យើង ដោយខិតខំផ្សព្វផ្សាយអោយទូលំទូលាយទៅកាន់អ្នកបង្កើតសម្រាមអោយពួកគាត់មានការយល់ដឹង ចូលរួម ដើម្បីយើងមានលទ្ធភាពគ្រប់គ្រងសម្រាមអោយបានល្អ យើងមានលទ្ធភាពថែទាំអនាម័យ បរិស្ថាននៅក្រុងព្រះសីហនុអោយបានល្អចាប់ពីថ្ងៃនេះតទៅ៕
