ខេត្តតាកែវ៖ ប្រជាពលរដ្ឋចំនួនបីឃុំនៅ ក្នុងស្រុកទ្រាំង ខេត្តតាកែវ កំពុង ជួបបញ្ហាសុខភាពខណៈការប្រើប្រាស់ទឹកស្អាតប្រែមកជាទឹកខ្វក់អស់រយៈពេលជាច្រើនថ្ងៃមកហើយ។
យោងតាមសម្ដីពលរដ្ឋរស់នៅភូមិកំពង់ជ្រៃ ឃុំស្មោង ស្រុកទ្រាំង បានអោយដឹងថាពួកគាត់បានប្រើប្រាស់ទឹកស្អាតរបស់ក្រុមហ៊ុនស្ថានីយ៍ទឹកស្អាតថ្នល់បែកសន្លុងដោយក្នុង១ម៉ែត្រ គូបទឹក២៥០០រៀល តែជាច្រើនថ្ងៃមកនេះទឹកនេះប្រែជាមិនស្អាតធ្វើអោយពួកគាត់ជួបបញ្ហារសុខភាពធ្ងន់ធ្ងរ។
ពលរដ្ឋបានបន្ដទៀតថាពួកគាត់មិនបានដឹងពីមូលហេតុអីនោះទេបានទឹកស្អាតប្រើរាល់ថ្ងៃឡើងពណ៍ខ្មៅ និងមានសុទ្ធតែភក់ឬកករដែលមិនអាចប្រើប្រាស់បាននោះទេ។
ពាក់ពន្ធ័ករណីខាងលើនេះលោកឡេង សុផល ម្ចាស់ស្ថានីយ៍ទឹកស្អាត ថ្នល់បែកសន្លុងបានអោយអ្នកយកព័ត៌មានយើងដឹងថា ករណីទឹកដែលមានភក់ឬប្រែពណ៍ខ្មៅ ដោយសារតែមានការកាយដីប៉ះរួចមានដីចូលក្នុង បំពង់ទីយូ តែខាងលោកកំពុងរៀបចំការងារនេះជូនពលរដ្ឋ។
លោកបានបញ្ជាក់បន្ថែមថាករណីនេះទើបតែកើតឡើងបាន១ថ្ងៃនោះទេហើយទឹកស្អាតរបស់ក្រុហ៊ុនលោកទទួលបម្រើពលរដ្ឋបីឃុំក្នុងស្រុកទ្រាំង។
ចំណែកលោកកេត ព្រុង ប្រធានមន្ទីឧស្សាហកម្ម និងសិប្បកម្ម ខេត្តតាកែវបានឆ្លើយប្រាប់អ្នកយកព័ត៌មានយើងដូចការលើកឡើងរបស់ប្រធានក្រុមហ៊ុនទឹកស្អាតខាងលើទាំងស្រុងតែលោកមិនបានបញ្ជាក់ថាលោកឬក្រុមការងាររបស់បានចុះទៅត្រួតពិនិត្យហើយឬនៅនោះទេ៕ដោយ៖ម៉េង ហួត
