ភ្នំពេញ៖ ស្ត្រីម្នាក់មិនស្រួលខ្លួនត្រូវបានកូនស្រីដឹកជូនកង់បីឥណ្ឌាយកទៅពេទ្យតែជាអកុសល មិនទាន់ចូលដល់មន្ទីរពេទ្យផង ស្រាប់តែដាច់ខ្យល់ស្លាប់ ត្រូវបានម៉ូតូកង់បី ទម្លាក់ដាក់ចុះហើយគេចខ្លួនទៅបាត់បង្កការភ្ញាក់ផ្អើល កាលពីម៉ោង១១និង៣៥នាទីព្រឹក ថ្ងៃទី១៧ ខែកក្កដា ឆ្នាំ២០១៩នៅ តាមផ្លូវហាណូយ ភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
តាមប្រភពពីកូនស្រីសពឲ្យដឹងថាមុនកើតហេតុគាត់ចេញពីធ្វើការរោងចក្រមកហូបបាយនៅបន្ទប់ជួលពេលមកដល់ម្តាយបានប្រាប់ថាមានអាការៈ មិនស្រួលពេលនោះនាងបានហៅកង់បីឥណ្ឌាមកដឹកគោលបំណងទៅពេទ្យដោយនាងជិះមកជាមួយផងខណៈមកដល់ស្តុបផ្សារដីហ៊ុយម្តាយនាងក៍បានដាច់ខ្យល់ស្លាប់លើកង់បីទៅពេលនោះ អ្នកបើកកង់បីភ័យក៍ទម្លាក់ម្តាយនាងតាមដងផ្លូវហើយអ្នកបើកកង់បីបានកគេចបាត់តែម្តង ។
ប្រភពដដែលអោយដឹងថាម្តាយនាងគាត់មានជម្ងឺប្រចាំកាយ(កើតហឺត)ចេះតែថប់ដង្ហើម ហើយរយះពេល២ថ្ងៃចុងក្រោយនេះគាត់មានអាការៈធ្វើទុក្ខ មិនបានទៅធ្វើការទេដោយសម្រាកនៅបន្ទប់ជួលលុះនាងចេញពីធ្វើការមកហូបបាយគាត់ប្រាប់អោយជូនមកពេទ្យស្រាប់តែជួបរឿងអកុសល់បែបនេះទៅ ។
សពស្ត្រីខាងលើឈ្មោះ ហន ពិសី អាយុ៤០ឆ្នាំ មុខរបរកម្មការនីរោងចក្រ ស្នាក់នៅបន្ទប់ជួលភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ មានស្រុកកំណើត នៅភូមិអំពិល ឃុំអំពិលលើ ស្រុកកំពង់សៀម ខេត្តកំពង់ចាម ។
ក្រោយពីសមត្ថកិច្ចមូលដ្ឋានចុះមកពិនិត្យជាក់ស្តែងហើយសាច់ញាតិឯកភាពសុំយកទៅធ្វើបុណ្យហើយសមត្ថកិច្ចក៍រៀបចំឯកសារនិងប្រគល់អោយសាច់ញាតិយកទៅធ្វើបុណ្យតាមប្រពៃណីនៅស្រុកកំណើត ៕
