ភ្នំពេញ៖ លោកចោម្នាក់ ត្រូវបានកម្លាំងល្បាតប៉ុស្តិ៍រដ្ឋបាលភ្នំពេញថ្មី ចាប់ឃាត់ខ្លួន ក្រោយធ្វើសកម្មភាពលួចម៉ូតូ ខណៈម្ចាស់ទើបតែឈប់ចុះបានបន្តិច កាលពីវេលាម៉ោង៤និង៣០នាទីល្ងាច ថ្ងៃទី២៣ កក្កដា ឆ្នាំ២០១៩ នៅចំណុចមុខផ្ទះលេខ១៧៤ ផ្លូវ១៩២៨ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
ប្រភពពីសមត្ថកិច្ចបានអោយដឹងថាជនសង្ស័យដែលចាប់ខ្លួនបាន ឈ្មោះ មីន សាឡេះ ភេទប្រុស អាយុ២៥ឆ្នាំ មុខរបរមិនពិតប្រាកដ ជនជាតិខ្មែរឥស្លាម ស្នាក់នៅបន្ទប់ជួល ផ្លូវលំ ភូមិ២ សង្កាត់ច្រាំងចំរេះ១ ខណ្ឌឬស្សីកែវ (មានសារធាតុញៀន)។
ចំណែកជនរងគ្រោះ ឈ្មោះ សោម សោភា ភេទស្រី អាយុ៤១ឆ្នាំ មុខរបរនៅផ្ទះ ជនជាតិខ្មែរ ស្នាក់នៅផ្ទះលេខ៣០EO ផ្លូវ៥៦៦ ភូមិ៩ សង្កាត់បឹងកក់២ ខណ្ឌទួលគោក។
សម្ភារៈបន្សល់ទុក មានម៉ូតូ១គ្រឿង ម៉ាកនិច ផលិតឆ្នាំ២០១៧ ពណ៌ទឹកប្រាក់ ពាក់ស្លាកលេខ ភ្នំពេញ 1HF-9185 ប្រគល់ឲ្យជនរងគ្រោះវិញ និងដែកច្នៃកាច់កម៉ូតូ១។
សមត្ថកិច្ច បានបន្ដថា មុនពេលកើតហេតុ ជនរងគ្រោះបានជិះម៉ូតូរបស់ខ្លួន ចេញពីផ្ទះមកលេងបងប្អូន នៅចំណុចកើតហេតុខាងលើ ពេលជនរងគ្រោះមកដល់បានទុកម៉ូតូរបស់ខ្លួន នៅមុខផ្ទះលេខ១៧៤ ចំណុចកើតហេតុ រួចជនរងគ្រោះបានដើរចូលទៅក្នុងផ្ទះបងប្អូន ស្រាប់តែមានជនសង្ស័យម្នាក់ បានធ្វើសកម្មភាពលួចយកម៉ូតូជិះចេញ ជនរងគ្រោះក្រឡេកឃើញ ស្រែកថាចោរៗ រួចនាំគ្នាដេញតាមជនសង្ស័យ ដល់ចំណុចការ៉ាស់សាំងតេលាផ្លូវ១៩២៨ ភ្លាមនោះកម្លាំងល្បាតរបស់អធិការដ្ឋាន បានធ្វើការល្បាតដល់ចំណុចខាងលើ ឃើញហេតុការណ៍ ក៍បានធ្វើការឃាត់ខ្លួនជនសង្ស័យ យកមកធ្វើការសាកសួរនៅអធិការដ្ឋាននគរបាលខណ្ឌសែនសុខ រួចជនរងគ្រោះបានដាក់ពាក្យបណ្តឹង ចោទប្រកាន់ជនសង្ស័យតែម្តង។
បច្ចុប្បន្ន ជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី ៕
