ខេត្តព្រះសីហនុ៖ ការប្រើប្រាស់ឧបករណ៍នេសាទខុសច្បាប់ និងការទន្ទ្រានដីព្រៃកោងកាង ព្រៃលិចទឹក,ការចាក់ដីលប់បឹង និងលុបដែននេសាទយកធ្វើជាកម្មសិទ្ធិ គឺជាសកម្មភាពបំផ្លិចបំផ្លាញធ្ងន់ធ្ងរនាំអោយហិនហោចធនធានធម្មជាតិ និងមច្ឆា។
ដើម្បីដោះស្រាយបញ្ហានេះឯកឧត្តម គួច ចំរើន អភិបាលខេត្តព្រះសីហនុ ជម្រុញ ស្ថាប័នពាក់ព័ន្ធ រួមគ្នាយកចិត្តទុក ដាក់ក្នុងការចុះបង្ក្រាបទប់ស្កាត់អោយបានទាន់ពេលវេលា។
នេះបើយោងតាមប្រសាសន៍របស់ឯកឧត្តមគួចចំរើនអភិបាលខេត្តព្រះសីហនុក្នុងឱកាសនីពិធីប្រលែងកូនត្រីទឹកសាបនិងមេត្រីពូជទទៅក្នុងបឹងធម្មជាតិមួយកន្លែងនៅស្រុកព្រៃនប់ខេត្តព្រះសីហនុកាលពីព្រឹកថ្ងៃសុក្រថ្ងៃទី២៦ ខែកក្កដា ឆ្នាំ២០១៩។
ឯកឧត្តម គួច ចំរើន គូសបញ្ជាក់ថាតាមរយៈ ទិវាមច្ឆជាតិ ០១ កក្កដា ឆ្នាំ២០១៩ នេះនឹងបានបំផុសស្មារតីប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងវិស័យឯកជន ចូលរួមថែរក្សា ការពារអភិរក្ស និងបង្កើនផលស្តុកធនធានជលផល ធម្មជាតិឱ្យកាន់តែសម្បូរបែប ដើម្បីលើកកម្ពស់ជីវភាពរស់នៅរបស់ប្រជាពលរដ្ឋនៅមូលដ្ឋាន។
ឯកឧត្តមបន្តថា ទន្ទឹមនឹងការថែរក្សាត្រីធម្មជាតិឱ្យមាននិរន្តរភាព ការអភិវឌ្ឍវារីវប្បកម្ម ត្រូវតែជំរុញឱ្យបានខ្លាំងក្លាទាំងខ្នាតតូច មធ្យម និងធំ ស្របតាមតម្រូវ ការទីផ្សារស្បៀងអាហារ និងសក្តានុពល នៃការអភិវឌ្ឍរបស់ខេត្តព្រះសីហនុ នាពេលបច្ចុប្បន្ន ។
ឯកឧត្តម បានស្នើអោយមានការលើកទឹកចិត្ត និងបង្កលក្ខណៈងាយស្រួល ដល់ កសិករវិស័យ ឯកជន ដើម្បីចូលរួមវិនិយោគលើការចិញ្ចឹមបង្គា ក្តាម ត្រីសមុទ្រ ឲ្យបានច្រើន រួមទាំងការកែឆ្នៃផលិតផលសមុទ្រប្រកបដោយគុណភាព សុវត្ថិភាព និងកាត់បន្ថយការនាំចូលពីប្រទេសជិតខាង។
ទន្ទឹមនេះដែរ ឯកឧត្តម គួច ចំរើន ក៏បានស្នើស្ថាប័នពាក់ព័ន្ធ រដ្ឋបាលមូលដ្ឋាន រួមគ្នាយកចិត្តទុក ដាក់បង្ក្រាបបទល្មើសជលផល ទប់ស្កាត់ការ ប្រើប្រាស់ឧបករណ៍នេសាទខុសច្បាប់ គ្រប់ប្រភេទ ដែលបំផ្លិចបំផ្លាញធ្ងន់ធ្ងរដល់ធនធានមច្ឆាជាតិ និងការទន្ទ្រានដីព្រៃកោងកាង ជាកម្មសិទ្ធិ ការចាក់ដីលប់បឹង និងលុបដែននេសាទជាដើម។ខិតខំពង្រឹងសមត្ថភាពរបស់ សហគមន៍នេសាទ ដែលបានបង្កើតឡើងរួចហើយឱ្យបានរឹងមាំប្រកបដោយភាពជាម្ចាស់ការ ក្លាយជាសហគមន៍នេសាទគ្មានបទល្មើសជលផល ។
ព្រមទាំងបានសំណូមពរឱ្យប្រជាពលរដ្ឋក្នុង សហគមន៍ចូលរួមថែរក្សា អភិរក្សធនធានធម្មជាតិជលផលឱ្យកាន់តែសម្បូរបែប ដើម្បីពង្រឹងការគ្រប់គ្រង សហគមន៍នេសាទ ថែរក្សាព្រៃលិចទឹក និងព្រៃកោងកាងឱ្យបានគង់វង្ស ដែលជាជម្រកមច្ឆាជាតិពង កូន។
បើតាម លោក នេន ចំរើន ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុ ឲ្យដឹងថា ទិវាមច្ឆជាតិ ០១ កក្កដា ឆ្នាំ២០១៩នេះ បានរៀបចំលែងកូនត្រីចំនួន ៥០.០០០ក្បាល និងមេត្រីពូជចំនួន ២០គីឡូក្រាម ដើម្បីអភិរក្ស ការថែទាំមច្ឆាជាតិឱ្យកាន់តែសម្បូរបែបថែមទៀត។
ជាមួយគ្នានេះលោក នេន ចំរើន បានសំណូមពរឲ្យអ្នកនេសាទកុំប្រើស្បៃមុងចាប់ត្រីឬប្រើឧបករណ៍ឆក់ កុំកាប់បំផ្លាញព្រៃលិចទឹកដែលជាជម្រកមច្ឆា និងបានអំពាវនាវដោយទទូចចំពោះប្រជាពលរដ្ឋ អាជ្ញាធរដែនដី មន្ត្រីជំនាញ អង្គការដៃគូអភិវឌ្ឍន៍ សូមចូលរួមថែរក្សាការពារអភិរក្សធនធានមច្ឆាជាតិធម្មជាតិជាតិទាំងអស់នេះដើម្បីធានានិរន្តរភាពនិងលើកកម្ពស់ដល់ជីវភាពរបស់ប្រជាពលរដ្ឋដែលជាប្រជាកសិករនៅតាមមូលដ្ឋាន។
គួរបញ្ជាក់ផងដែរថា,ជារៀងរាល់ឆ្នាំ រដ្ឋបាលខេត្តព្រះសីហនុ សហការជាមួយមន្ទីរកសិកម្មរុក្ខាប្រមាញ់និងនេសាទ តែងធ្វើពិធីប្រលែងកូនត្រីនិងត្រីពូជនេះនៅតាមអាងទឹកធម្មជាតិនៅខេត្តព្រះសីហនុជាបន្តបន្ទាប់ផងដែរ៕លោកប៉ែន ឡា
