ភ្នំពេញ៖ប្រជាពលរដ្ឋបាននាំគ្នាធ្វើការ ចោទប្រកាន់ទៅលើលោកសយ សុិន ចៅសង្កាត់គោករការដែលបានដាក់កម្លាំងប្រជាការពារយកលុយពីរថយន្តដឹកទំនិញគ្រប់ប្រភេទដែលធ្វើដំណើរតាមបណ្តោយផ្លូវនៅត្រង់ចំណុចផ្លូវបេតុង ភូមិគោករកា សង្កាត់គោករការ ខណ្ឌ ព្រែកព្នៅ(ខាងមុខសាលាសង្កាត់តែម្តង)។
ប្រជាពលរដ្ឋបានខ្សិបប្រាប់អោយដឹងថារាល់ថ្ងៃកម្លាំងប្រជាការពារបានដាក់គោលដៅនោះចំនួន០២ទីតាំងចាំយកលុយគឺទីតាំងទី១ត្រង់ចំនុចផ្លូវបេតុងចេញពីសង្កាត់គោករការកែងផ្លូវមហាវិថីឈ្នះៗមុខវត្តអង្គក្រពើ។
ចំនុចទីតាំងទី០២ត្រង់ផ្លូវបំបែកជា៣មុខសាលាសង្កាត់តែម្តង នៅពេលរថយន្តដឹកទំនិញឆ្លងកាត់គឺយកប្រាក់ចំនួន១០០០០រៀលទៅ២០០០០រៀលក្នុងរថយន្តមួយគ្រឿងហើយឲ្យជិះចេញទៅ ដោយឡែករថយន្តមួួយចំនួនដែលមិនបានអោយលុយនោះកម្លាំងប្រជាការពារមិនអោយទៅទេ ដូច្នេះហើយគ្រប់រថយន្តដឹកទំនិញត្រូវតែបង់លុយ។
ចំពោះករណីនេះផងដែរអ្នកយកព័ត៌មានបានសួរនាំលោកសន សុិន ចៅសង្កាត់គោករការបានប្រាប់អោយដឹងថាការដាក់កម្លាំងប្រជាការពារចំនួន០២ទីតាំងខាងលើនេះគឺលោកបានធ្វើឡើងតាមសាលារាជធានីភ្នំពេញអោយហាមឃាត់មិនអោយរថយន្តដឹកទំនិញធន់ធំគ្រប់ប្រភេទឆ្លងកាត់ តែចំពោះរឿងដាក់កម្លាំងយកលុយលើកឡើងរបស់ប្រជាពលរដ្ឋមិនត្រឹមត្រូវនោះទេ។
ដោយឡែកលោក ផល ឡឹម ប្រធានដឹកនាំកម្លាំងប្រជាការពារបានប្រាប់អោយដឹងដែរថាចំពោះរថយន្តដឹកទំនិញដែលធ្វើដំណើរឆ្លងកាត់ចេញពីផ្សារឈូកមាសបត់ចូលតាមវត្តជុំតាមផ្លូវបេតុងរហូតមកដល់មុខសាលាសង្កាត់គោករការកម្លាំងបានឃាត់តែបើអោយរថយន្តអោយត្រឡប់ទៅក្រោយខ្លាចខូចផ្លូវដូចនេះត្រូវអោយរថយន្តបន្តដំណើរទៅមុខទៀតតែមុននឹងទៅត្រូវបង់លុយកាក់ខ្លះ។
ដោយសារតែឃើញទង្វើមិនប្រក្រតីបែបនេះប្រជាពលរដ្ឋដែលធ្វើដំណើរឆ្លងកាត់ទីនោះមានការមិនពេញចិត្ត ចំពោះការយកលុយបែបនេះហើយប្រជាពលរដ្ឋបានសូមសំណូមពរដល់លោកឯកឧត្តមឃួងស្រេង មានចំណាត់ការទៅលើលោកចៅសង្កាត់រួមទាំងកម្លាំងប្រជការពារដែលយកលុយពីរថយន្តមិនគិតពីការខូចខាតផ្លូវរដ្ឋខុសពីគោលការដែលលោកដាក់អោយឃាត់រថយន្តមិនអោយធ្វើដំណើរនោះទេ ជាពិសេសលោក សុខ សម្បត្តិ អភិបាលនៃគណៈអភិបាលខណ្ឌព្រែកព្នៅមេត្តាចុះពិនិត្យមើលកូនចៅដែលដាក់កម្លាំងយកលុយពីរថយន្តដឹកទំនិញគ្រប់ប្រភេទតាមដងផ្លូវខាងលើនេះយកលុយចែកគ្នាមិនគិតពីការខូចខាតផ្លូវដែលជាសម្បត្តិរដ្ឋ៕
