ភ្នំពេញ៖ មានហេតុការណ៍ភ្ញាក់ផ្អើលមួយកើតឡើង ក្រោយពីមានបងប្អូនកម្មកររោងចក្រ ប្រទះឃើញបុរសម្នាក់ ដេកស្លាប់ក្រោមម៉ូតូ នៅចិញ្ចើមផ្លូវ ហើយត្រូវបាននគរបាលបញ្ជាក់ថា គាត់ស្រវឹងស្រា និងជិះម៉ូតូធ្លាក់ផ្លូវដួលស្លាប់ខ្លួនឯង។
សាកសពខាងលើ ត្រូវបានកម្មកររោងចក្រ ប្រទះឃើញកាលពីវេលាម៉ោង៦៖១៥នាទីព្រឹក ថ្ងៃទី២២ ខែសីហា ឆ្នាំ២០១៩ នៅតាមផ្លូវបេតុង ត្រង់ចំណុចផ្លូវកោងភូមិអំពិល សង្កាត់កំបូល ខណ្ឌកំបូល រាជធានីភ្នំពេញ។
បុរសរងគ្រោះមានឈ្មោះ ធី អាយុ៣៧ឆ្នាំ មុខរបរកម្មករសំណង់ មានទីលំនៅក្នុងភូមិអង្គស្លែង សង្កាត់ឪឡោក ខណ្ឌកំបូល មានប្រពន្ធឈ្មោះ សាន សុភី អាយុ៣៤ឆ្នាំ មានផ្ទៃពោះ៨ខែទៅហើយ។ បុរសនេះ ជិះម៉ូតូ១គ្រឿងម៉ាក ហុងដាឌ្រីម សេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ 1BU-2840 ។
ស្រ្តីម្នាក់ត្រូវជាម្ដាយក្មេក បាននិយាយថា ជនរងគ្រោះគឺជាកូនប្រសារគាត់ ដែលទើបតែរៀបការជាមួយកូនស្រីគាត់ បានរយៈពេលជាង១ឆ្នាំតែប៉ុណ្ណោះ ហើយពេលនេះកូនស្រីគាត់ មានផ្ទៃពោះ៨ខែទៅហើយ។ ដោយឡែកនៅវេលាល្ងាថ្ងៃទី២១ ខែសីហា ជនរងគ្រោះបានប្រាប់គាត់ និងប្រពន្ធរបស់ខ្លួនថា ទៅយកស្មៅគោនៅឯផ្ទះម្ដាយបង្កើត នៅក្នុងភូមិអង្គស្នួល ឃុំពើក ស្រុកអង្គស្នួល ខេត្តកណ្ដាល។ ពេលនោះ ពួកគាត់បានឃាត់មិនឲ្យទៅទេ ព្រោះយប់ទៅហើយ ប៉ុន្តែជនរងគ្រោះមិនព្រម ហើយបានចាកចេញទៅបាត់ រហូតមិនឃើញត្រឡប់ទៅផ្ទះវិញទេ។ ខណៈនោះ ពួកគាត់មានការព្រួយបារម្ភខ្លាំងណាស់ បានព្យាយាមខលរករហូតដែរ ប៉ុន្តែខលចូលមិនមានអ្នកលើក ហើយក៏គិតថា ជនរងគ្រោះដេកនៅផ្ទះម្ដាយបង្កើតទេ ទើបអត់បានតាមរក តែអ្វីដែលនឹកស្មានមិនដល់ ស្រាប់តែព្រឹកឡើង ប្រទះឃើញស្លាប់ក្រោមម៉ូតូ បែបនេះទៅវិញ។
នគរបាលបានឲ្យដឹងថា នៅវេលាយប់ថ្ងៃទី២១ ខែសីហា បុរសរងគ្រោះ បានផឹកសុីជុំគ្នាជាមួយមិត្តភក្ដិរួមការងារ រហូតដល់វេលាម៉ោង៧យប់ ទើបចាកចេញទៅផ្ទះម្ដាយ នៅភូមិអង្គស្នួល ហើយសង្ស័យថា ស្រវឹងស្រាទើបជិះម៉ូតូលឿន ដល់ផ្លូវកោងបត់មិនទាន់ ក៏ធ្លាក់ផ្លូវស្លាប់ដោយខ្លួនឯង ។
ពេលនេះក្រុមគ្រួសារ មិនមានការប្ដឹងផ្ដល់ទេ ហើយបានយកសាកសព ធ្វើបុណ្យតាមប្រពៃណី៕
