ភ្នំពេញ៖ យោងតាមសេចក្តីរាយការណ៍បានឲ្យថា មានក្រុមហ៊ុនចិនឈ្មោះ Discover New City (DNC) បាននិងកំពុងធ្វើសកម្មភាពជីក និងដឹកដី ចេញពីការដ្ឋានសំណង់គ្មានច្បាប់មួយកន្លែង នៅចំណុចអតីតមណ្ឈមណ្ឌលទួលគោក ស្ថិតនៅតាម៣១៥ សង្កាត់បឹងកក់២ ខណ្ឌទួលគោក រាជធានីភ្នំពេញ។
សេចក្តីរាយការណ៍បន្ថែមថា ក្រុមហ៊ុនចិន ដែលមានម្ចាស់ឈ្មោះ LIAO JUNNA ភេទស្រី កំពុង បើកការដ្ឋានសាងសង់អគារ DNC Mall មានកំពស់ច្រើនជាន់ លើផ្ទៃដីទំហំជាង ៦០០០ម៉ែត្រការ៉េ ដោយពុំទាន់មានលិខិតអនុញ្ញាតឲ្យសាងសង់ពីអាជ្ញាធរខណ្ឌទួលគោក អាជ្ញាធររាជធានីភ្នំពេញ និងក្រសួង រៀបចំដែនដីនគរូបនីយកម្មនិងសំណង់ នៅឡើយទេ។
ប្រភពសុំមិនបញ្ចេញឈ្មោះ បានឲ្យដឹងថា មូលហេតុដែលក្រុមហ៊ុនចិនឈ្មោះ Discover New City (DNC) អាចសាងសង់សំណង់ដោយគ្មានច្បាប់បែបនេះបាន ដោយសារតែ ម្ចាស់ក្រុមហ៊ុនមានខ្នងបង្អែកធំ និងបានចំណាយប្រាក់ជាង ១ម៉ឺនដុល្លារ និងរថយន្តកូរ៉េមួយគ្រឿង ក្រោមរូបភាពឧបត្ថម្ភ ឲ្យទៅអាជ្ញាធរខណ្ឌទួលគោក ដើម្បីឲ្យជួយសម្រួលកិច្ចការងាររបស់ពួកគេ នៅគ្រាដែលក្រុមហ៊ុនរត់ច្បាប់សាងសង់មិនទាន់បាន។
ប្រភពពីប្រជាពលរដ្ឋដែលរស់នៅក្បែរការដ្ឋាន សំណង់របស់ក្រុមហ៊ុនចិននោះ បានឲ្យអ្នកសារព័ត៌មានដឹងថា ពួកគាត់ធ្លាប់ប្តឹងទៅ អាជ្ញាធរចំនួន៣លើកផងដែរ អំពីការរំខាន និង ហានិភ័យ ដែលកើតចេញពីការសាងសង់សំណង់គ្មានច្បាប់នេះ ប៉ុន្តែក្រុមហ៊ុន នៅតែអាចបន្តសកម្មភាពយ៉ាងរលូនដដែល។
ជុំវិញករណីនេះ លោក ឯក ឃុនដឿន អភិបាលខណ្ឌទួលគោក បានប្រាប់សារព័ត៌មាន មួយថា តាមទូរស័ព្ទថា «ក្រុមហ៊ុនគ្រាន់តែ ជីកដីពិសោធបណ្តើរៗប៉ុណ្ណោះ ចំណែកច្បាប់សាងសង់ អាចសប្តាហ៍ក្រោយគេរត់បានហើយ។ រឿងរថយន្តកូរ៉េ តម្លៃ ប្រហែល ៧០០០ដុល្លារ គឺក្រុមហ៊ុនឧបត្ថម្ភដោយស្ម័គ្រចិត្តដល់ខណ្ឌដើម្បីដឹកប្រជាការពារខណ្ឌ និងដឹកទឹកស្រោចដើមឈើ»។
លោក ឯក ឃុនដឿន បន្ថែមថា «រឿងលុយ ជាង ១ម៉ឺនដុល្លារ ដែលគេអះអាងថា ប្រគល់ឲ្យខណ្ឌនោះ មិនពិតទេ។ ខ្ញុំចង់បានការសហការជាមួយបងប្អូនកាសែត រកមុខអ្នកណាដែលបង្កើតពាក្យចចាមអារាមនេះឡើង? ហើយអ្នកណាជាអ្នកយកលុយពីក្រុមហ៊ុន? វាមានក្រុមចុះទៅគោះក្រុមហ៊ុនគេ តែមិនបានលុយពីគេ បែរជានាំគ្នាដើរបង្កើតពាក្យចចាមអារាមនេះឡើង»។
លោក ឯក ឃុនដឿន «អាជ្ញាធរខណ្ឌ បានត្រឹមជួយសម្របសម្រួលការងារដល់អ្នកវិនិយោគទេ។ ដូច្នេះបើបងប្អូនចុះផ្សាយក្រែងវាប៉ះពាល់ដល់ ការវិនិយោគរបស់ក្រុមហ៊ុន នាំខាតប្រយោជន៍ជាតិ»។
សូមជម្រាបជូនថា ក្រសួងរៀបចំដែនដី នគរូបនីយកម្ម និងសំណង់ កាលថ្ងៃទី២៣ ខែកក្កដា ឆ្នាំ២០១៩ ធ្លាប់បានចេញលិខិត ណែនាំឲ្យ ឯកឧត្តម-លោកជំទាវ អភិបាល នៃគណៈអភិបាលរាជធានី-ខេត្ត ចាត់វិធានការចំពោះក្រុមហ៊ុនប្រកបអាជីវកម្មសាងសង់ និងម្ចាស់សំណង់ដែលមិនអនុវត្តតាមកាតព្វកិច្ច និងលក្ខខណ្ឌតម្រូវដោយបទដ្ឋានគតិយុត្ត និងបទដ្ឋានបច្ចេកទេស ឲ្យបានម៉ឺងម៉ាត់។
ដោយឡែក សម្តេចក្រឡាហោម ស ខេង ឧបនាយករដ្ឋមន្ត្រី រដ្នមន្ត្រីក្រសួងមហាផ្ទៃ កាលពៅថ្ងៃទី១៥ ខែកក្កដា ឆ្នាំ២០១៩ កន្លងទៅ ក៏ធ្លាប់បានចេញលិខិតណែនាំដល់អភិបាលរាជធានី-ខេត្ត ឲ្យពង្រឹងប្រសិទ្ធភាពក្នុងការគ្រប់គ្រង និងត្រួតពិនិត្យទៅលើសំណង់ បន្ទាប់ពីបានពិនិត្យឃើញថាសំណង់មួយចំនួននៅតាមរាជធានី-ខេត្ត កំពុងដំណើរការដោយគ្មានលិខិតអនុញ្ញាត និងច្បាប់ត្រឹមត្រូវ។
សម្តេចក្រឡាហោម ស ខេង បានកត់សម្គាល់ថា មានសំណង់មួយចំនួន បាននឹងកំពុងដំណើរការសាងសង់ ជួសជុល និងកែប្រែទ្រង់ទ្រាយសំណង់ ដោយគ្មានលិខិតអនុញ្ញាត ឬខុសពីលិខិតអនុញ្ញាត និងពុំមានការត្រួតពិនិត្យលក្ខណៈបច្ចេកទេស សំណង់ឲ្យបានត្រឹមត្រូវ ដែលករណីទាំងនេះអាចបណ្តាលឲ្យប៉ះពាល់ដល់សោភ័ណភាព ស្ថាបត្យកម្ម គុណភាព សុវត្ថិភាពសំណង់ សណ្តាប់ធ្នាប់ និងរបៀបរៀបរយសាធារណៈ រហូតបង្កឲ្យមានគ្រោះមហន្តរាយ និងហានិភ័យផ្សេងៗ។
សេចក្តីណែនាំ របស់ រដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ និងរដ្ឋមន្ត្រីក្រសួងមហាផ្ទៃ បានចេញព្រមៗគ្នា បន្ទាប់ពីមានករណីរលំបាក់អគាររបស់ក្រុមហ៊ុនចិន ដែលសាងសង់ដោយគ្មានច្បាប់ បណ្តាលឲ្យពលរដ្ឋខ្មែរស្លាប់អស់ជាច្រើននាក់នៅក្នុងខេត្តព្រះសីហនុកាលពីពេលកន្លងទៅថ្មីៗនេះ៕
អង្គភាពយើងនិងផ្សាយលម្អិតជូនបន្ថែមទៀត ប្រសិនបើមានការបកស្រាយពន្យល់ ពីអាជ្ញាធរ ពាក់ព័ន្ធទាំងអស់ ដើម្បីអោយមហាជនអស់មន្ទិលសង្ស័យ៕
