កោះកុង៖ រថយន្តដឹកដីចុះចំណោទ១គ្រឿងដាច់ហ្វ្រាំងជ្រុលចង្កូតបុករះផ្ទះ ប្រជាពលរដ្ឋ ៥ខ្នង បណ្ដាលឲ្យស្លាប់មនុស្សចំនួន ២នាក់ រងរបួសធ្ងន់ ១ម្នាក់ និងខូចខាតម៉ូតូចំនួន៤ គ្រឿង។
ហេតុការណ៍ដ៏រន្ធត់នេះ បានបង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង ៨និង០០នាទីព្រឹក នៅថ្ងៃទី ២៥ ខែសីហា ឆ្នាំ ២០១៩ នៅចំណុចភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
លោក ជា សារិនអធិការ ស្រុកមណ្ឌលសីមា បានឲ្យដឹងថា ហេតុការណ៍ គ្រោះថ្នាក់ចរាចរណ៍គួរឲ្យរន្ធត់ខាងលើនេះ គឺបង្កឡើងដោយរថយន្តដឹកដីដែលពាក់ស្លាកលេខភ្នំពេញ3D.1227 បើកបរដោយឈ្មោះ អន សុខនី ភេទប្រុស អាយុ ៣០ ឆ្នាំ។
មូលហេតុរថយន្តដាច់ហ្រាំង ចុះចំណោទជ្រុលចង្កូតបើកបុករះផ្ទះប្រជា ពលរដ្ឋចំនួន ៥ខ្នង បណ្ដាលឲ្យស្លាប់មនុស្សចំនួន ២ នាក់ និងរងរបួសធ្ងន់ម្នាក់។
លោកបន្តថា ក្រោយកើតហេតុភ្លាមៗសមត្ថកិច្ចបានបញ្ជូន ជនរងគ្រោះ ទី១.ឈ្មោះស៊ន សុខា ភេទស្រី អាយុ៣៨ឆ្នា បានស្លាប់នោះពេលបញ្ជូនទៅព្យាបាលនៅមន្ទីរពេទ្យ។
ទី២. ឈ្មោះចាន់ សេង ភេទប្រុស អាយុជាង ២ឆ្នាំ បានស្លាប់ភ្លាមៗនៅនឹងកន្លែងកើតហេតុ ។ ចំណែកអ្នកបើកបររថយន្តបង្ក ឈ្មោះ អន សុខនី ភេទប្រុស អាយុ៣០ ឆ្នាំ បានរងរបួសធ្ងន់ ។ សូមបញ្ជាក់ថាអ្នករងគ្រោះ ស្លាប់បាត់បង់ជីវិតទាំងពីរនាក់ខាងលើនេះ ត្រូវជាម្ដាយនិងកូន។
បច្ចុប្បន្ន ករណីគ្រោះថ្នាក់ចរាចរណ៍ខាងលើនេះ កម្លាំងជំនាញបានស្ទូចរថយន្តនិងម៉ូតូយកមករក្សាទុកនៅអធិការរដ្ឋាននគបាល ស្រុកមណ្ឌលសីមា ដើម្បីរង់ចាំធ្វើការដោះ ស្រាយនៅពេលក្រោយ៕
