ព្រះវិហារ៖ កម្លាំងអធិការដ្ឋាន នគរបាលស្រុកជាំក្សាន្ត នៃខេត្តព្រះវិហារ បើកប្រតិបត្តិការចុះបង្ក្រាបករណីរក្សាទុក្ខ និងប្រើប្រាស់ដោយខុសច្បាស់ នូវសារធាតុញៀន ឃាត់ខ្លួុនជនសង្ស័យម្នាក់ និងដកហូតបានថ្នាំញៀនចំនួន១៧កញ្ចប់ធំ ត្រង់ចំណុចផ្លូវជាតិលេខ ៦២បេ ជាប់នឹងព្រំប្រទល់ស្រុកត្រពាំងប្រាសាទ ខេត្តឧត្តរមានជ័យ។
យោងតាមរបាយការណ៍របស់នគរបាលស្រុកជាំក្សាន្ត បានសរសេរបញ្ជាក់ឲ្យដឹងថា កាលពីវេលាម៉ោង១៣.៤៩នាទី រសៀលថ្ងៃអាទិត្យ ទី២៥ ខែមិថុនា ឆ្នាំ២០១៩ម្សិលមិញ កម្លាំងអធិការនគរបាលស្រុកជាំក្សាន្ត បានធ្វើការឃាត់ខ្លួនជនសង្ស័យម្នាក់ ឈ្មោះ អៀត វ៉ាន់ថា ភេទប្រុស អាយុ២៤ឆ្នាំ មុខរបរមិនពិតប្រាកដ រស់នៅភូមិទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។
ចំពោះប្រតិបត្តិការចុះបង្ក្រាបទីតាំងខាងលើនេះ ឋិតក្រោមការដឹកនាំបញ្ជាផ្ទាល់ ដោយលោកវរសេនីយ៍ត្រី ជិន សារុំ អធិការរងនគរបាលស្រុកជាំក្សាន្ត ទទួលបន្ទុកផែនព្រហ្មទណ្ឌគ្រឿងញៀន រួមនឹងលោកអនុសេនីយ៍ទោ ស្រ៊ុន ពិសិដ្ឋ ប្រធានផ្នែកប្រឆាំងបទល្មើសគ្រឿងញៀន អធិការរដ្ឋាននគរបាលស្រុកជាំក្សាន្ត នៃខេត្តព្រះវិហារ។
ជាលទ្ធផលកម្លាំងបានធ្វើឆែកឆេដោយរកឃើញ ថ្នាំញៀនចំនួន១៧កញ្ចប់ធំ ប្រភេទម្សៅក្រាមពណ៌សថ្លា ម៉ូតូសេ១២៥មួយគ្រឿង សេរី០១៨ ទូរស័ព្ទដៃ១គ្រឿង និងប្រាក់ខ្មែរចំនួនបីលានរៀល។
លោកអនុសេនីយ៍ទោ ស្រ៊ុន ពិសិដ្ឋ ប្រធានផ្នែកប្រឆាំងបទល្មើសគ្រឿងញៀន បន្តថាបច្ចុប្បន្ន បច្ចុប្បន្នជនសង្ស័យ ព្រមជាមួយនិងវត្ថុតាង ត្រូវបានកម្លាំងជំនាញអធិការនគរបាលស្រុកជាំក្សាន្ត បានធ្វើការបញ្ជូនបន្ត ទៅកាន់ស្នងការដ្ឋាននគរបាលខេត្តព្រះវិហារហើយ ដើម្បីចាត់ការតាមនិត្តិវិធីច្បាប់ស្តីពីគ្រឿងញៀនផងដែរ៕
