ព្រះវិហារ៖ នៅវេលាម៉ោង៧និង០០នាទីយប់ថ្ងៃទី០៣ ខែកញ្ញា ឆ្នាំ២០១៩ម្សិលមិញ មានករណីរគ្រោះថ្នាក់មួយបានកើតឡើង ធ្វើឲ្យក្មេងប្រុសម្នាក់បានបាត់ខ្លួនហូរទៅតាមខ្សែទឹក នៅខណៈពេលរួមដំណើរជាមួយឳពុកម្តាយជិះឆ្លងទឹកលូបង្ហាភូមិតេជោបុស្សស្បូវ នេះបើតាមប្រភពពីលោក ជា គឹមសេង អភិបាលស្រុកជាំក្សាន្ត បញ្ជាក់ឱ្យដឹងនៅថ្ងៃពុធ ទី០៤កញ្ញានេះ។
ប្រភពដដែលបានបញ្ជាក់ឱ្យដឹងថា នៅមុនពេលកើតហេតុ លោកពលបាលឯក គង់ សុវណ្ណថារី មានមុខងារនាយក្រុម (ខ2.គ1) ផ្នែកសឹករងជាំក្សាន្ត និងប្រពន្ធឈ្មោះឡៃ ផៃ ភេទស្រី អាយុ២៧ឆ្នាំ នៅភូមិតេជោបុស្សស្បូវជិះ បានជិះម៉ូតូមួយគ្រឿងម៉ាកវេវ ពណ៌ខ្មៅ មកដល់ចំណុចទឹកលូបង្ហាភូមិតេជោបុស្សស្បូវ ក៏បានជិះឆ្លងតែត្រូវបានទឹកបោកធ្លាក់ជ្រោះ ហើយបណ្ដាលឱ្យកូនប្រុសម្នាក់ អាយុជាង២ឆ្នាំ របូតចេញពីដៃ គួចទៅតាមខ្សែទឹកហូរបាត់ ព្រមជាមួយនិងម៉ូតូមួយគ្រឿង។
ប្រភពបានបន្តទៀតថា ក្មេងប្រុសដែលបាត់ខ្លួនហូរទៅតាមខ្សែទឹកនោះមានឈ្មោះ គង់រតនៈ កាន់តា មានអាយុ២ឆ្នាំ រស់នៅជាមួយឳពុកម្តាយ ហើយរហូតមកដល់ពេលនេះ សាកសពក្មេងរងគ្រោះ នៅរកមិនទាន់ឃើញនោះឡើយ មូលហេតុទឹកកំពង់ជន់ឡើងខ្លាំង រីឯកំលាំងក៏កំពង់ខិតខំរុករកបន្តរផងដែរ៕
