ភ្នំពេញ៖ អធិការរងខណ្ឌឬស្សីកែវម្នាក់ ដែលជាអ្នកកាន់ច្បាប់ បែរជាល្មើសច្បាប់ទៅវិញ ហ៊ានគំរាមសម្លាប់នាយផ្នែកចរាចរណ៍ម្នាក់គ្រាន់តែរឿងបន្តិចបន្ទួចសោះ។
លោកអធិការរង ដែលអាងអំណាចគំរាមសម្លាប់នាយផ្នែកនោះ មានឈ្មោះ ចាន់ ពៅ ជាអធិការរងខណ្ឌឬស្សីកែវ ទទួលផ្នែកសេនាធិការ ចំណែកជនរងគ្រោះ ដែលត្រូវបានលោកអធិការរងរូបនេះ គំរាមសម្លាប់នោះ ឈ្មោះ លី រ៉ូហ្សាត ជានាយផ្នែកចរាចរណ៍ខណ្ឌឬស្សីកែវ។
បើតាមប្រភពព័ត៌មាន បានអោយដឹងថា មុនពេលកើតហេតុ នៅយប់ថ្ងៃទី២ កញ្ញា ឆ្នាំ២០១៩ នេះ កម្លាំងអធិការដ្ឋាននគរបាលខណ្ឌឬស្សីកែវ បានដាក់គោលដៅត្រួតពិនិត្យអាវុធជាតិផ្ទុះ និងជាតិស្រវឹង នៅតាមបណ្ដោយផ្លូវជាតិលេខ៥ មុខវិទ្យាល័យឬស្សីកែវ ស្ថិតក្នុងភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ដែលមានលោកស្នងការរង និងលោកអធិការរងទទួលផ្នែកចរាចរណ៍ ជាអ្នកដឹកនាំបញ្ជា។
បន្ទាប់ពីអនុវត្ដន៍បានប្រហែលជាកន្លះម៉ោង កម្លាំងសមត្ថកិច្ចខណ្ឌឬស្សីកែវ បានពិនិត្យឃើញ អ្នកមានជាតិស្រវឹងលើសកម្រិត ចំនួន៣នាក់ ដែលជាអ្នកបើកម៉ូតូ ក្នុងនោះ មានម្នាក់មិនបានសហការផ្លុំ បន្ទាប់មកកម្លាំងសមត្ថកិច្ច ក៏បានធ្វើការបញ្ជូនទៅស្នងការ ដើម្បីចាត់ការតាមផ្លូវច្បាប់។
បន្ទាប់ពីបញ្ជូនអ្នកដែលមានជាតិស្រវឹងលើសកំរិត បានមួយសន្ទុះ ស្រាប់តែលោក ចាន់ ពៅ អធិការរងរូបនោះ បានទូរស័ព្ទមកលោកនាយផ្នែក ដោយបញ្ជាអោយដោះលែងមនុស្សម្នាក់ ដែលមានជាតិស្រវឹងលើសកំរិត ក៏ប៉ុន្ដែលោកនាយផ្នែកបានប្រាប់ទៅវិញថា គាត់គ្មានសិទ្ធដោះលែងទេ គាត់គ្រាន់តែជានាយផ្នែក ហើយក៏អោយលោកអធិការរងរូបនោះ ទូរស័ព្ទទៅលោកអធិការងទទួលផ្នែកចរាចរណ៍ ដែលកំពុងដឹកនាំទៅ លោកអធិការរងរូបនោះ ក៏បានបិទទូរស័ព្ទទាំងខឹងយ៉ាងខ្លាំង។
មួយសន្ទុះក្រោយមក ស្រាប់តែឃើញបុរសម្នាក់ ដែលមានជាតិស្រវឹងលើសកម្រិតម្នាក់ ក្នុងចំណោម៣នាក់ ដែលកម្លាំងសមត្ថកិច្ចបញ្ជូនទៅស្នងការនោះ ត្រឡប់មកវិញក្រលើម។
ក្រោយមកលោកអធិការរងរូបនោះ បានផ្ញើរសារសម្លេងគំរាមសម្លាប់ជាច្រើន មកលោកនាយផ្នែក ធ្វើអោយលោកនាយផ្នែកមានការភិតភ័យយ៉ាងខ្លាំង ព្រោះអីធ្លាប់ដឹងហើយថា កន្លងមកអធិការរងរូបនេះ ធ្លាប់បាញ់គំរាមមន្ត្រីប៉ូលិសរួចមកហើយ គ្មាននរណាហ៊ានធ្វើអ្វីលោកអធិការរងរូបនេះឡើយ ធ្វើអោយលោកអធិការរងរូបនេះ ឡើងចាងគំរាមសម្លាប់គេឯងជាបន្តបន្ទាប់។
លោកនាយផ្នែក ដែលជាជនរងគ្រោះ សំណូមពរអោយថ្នាក់ ដឹកនាំជួយរកយុត្តិធម៌ អោយរូបគាត់ផង ព្រោះអធិការរងទំនើងរូបនេះ គំរាមសម្លាប់រូបគាត់ អោយស្លាប់ចោលប្រពន្ធចោលកូន។
ជនរងគ្រោះ សង្ឃឹមថា សម្ដេចក្រឡាហោម ស ខេង នឹងមានវិធានការចាត់ការលើអធិការរងរូបនេះ ប្រសិនជាគ្មានចំណាត់ការទេនោះ មិនដឹងមានមនុស្សប៉ុន្មាននាក់ទេ ដែលស្លាប់ក្រោមកណ្ដាប់ដៃលោកអធិការរងរូបនេះ បើសូម្បីតែមន្ត្រីប៉ូលិសកូនលោកផ្កាយ ក៏លោកអធិការរូបនេះ ហ៊ានបាញ់គម្រាមរួចមកហើយដែរនោះ។
ពាក់ព័ន្ធករណីខាងលើនេះ អង្គភាពសារព័ត៍មាន BPN News មិនអាចស្វែងរកការបំភ្លឺ ពីភាគីពាក់ព័ន្ធបានទេ។
ទោះជាយ៉ាងណា អង្គភាពយើងខ្ញុំ រង់ចាំការបកស្រាយបំភ្លឺ រៀងរាល់ពេលវរលា៕
