ព្រៃវែង ៖ មានករណីហឹង្សាមួយដោយសារយុវជនឈាមរាវម្នាក់ខឹងគេចុចពិលដាក់មុខទាញកាំបិតផ្គាក់កាប់ប្រហារត្រូវបានជនរងគ្រោះតដៃវិញប្រតាយប្រតប់គ្នារងរបួសទាំងសងខាង។
ករណីខាងលើនេះបានកើតឡើងកាលពីវេលាម៉ោងម៉ោង២១ និង៣០នាទីយប់ថ្ងៃទី១ ខែឧសភា ឆ្នាំ២០២០នៅចំណុចភូមិព្រីង ឃុំសេនារាជឧត្តម ស្រុកព្រះស្តេច ខេត្តព្រៃវែង។
សមត្ថកិច្ចបានឲ្យដឹថាជនរងគ្រោះឈ្មោះ ភុម គុណ ភេទប្រុស អាយុ៥៩ឆ្នាំ នៅភូមិព្រីង ឃុំសេនារាជឧត្តម។ ចំណែកជនបង្ករ ឈ្មោះ ប្រុស ពៅ ភេទប្រុស អាយុ២០រស់នៅភូមិ ឃុំជាមួយគ្នា។
ប្រភពបញ្ជាក់ថា នៅមុនពេលកើតហេតុ ជនបង្ករបានយកកាំបិតផ្គាក់ដើរតាមផ្លូវ ជនរងគ្រោះក៏បានចុចពិលបញ្ចាំងចំមុខស្រាប់តែយុវជនឈាមរាវខាងលើទាញកាំបិតកាប់ទៅលើជនរងគ្រោះខណៈនោះក៏មានការប្រតាយប្រតប់គ្នាទៅវិញទៅមក បណ្តាលអោយរងរបួសទាំងសងខាង។
សមត្ថកិច្ចបានបញ្ជាក់ថា មូលហេតុ ជនរងគ្រោះចុចពិលបញ្ចាំងដាក់មុខពេលជនបង្ករកាន់កាំបិតដើរតាមផ្លូវលំមុខផ្ទះរបស់ខ្លួន។
បច្ចុប្បន្នជនរងគ្រោះយកទៅព្យាបាលនៅមន្ទីពេទ្យ បង្អែកស្រុកកំពង់ត្របែក។ រីឯជនបង្ករយកមកព្យាលនៅមន្ទីពេទ្យបង្អែកស្រុកព្រះស្ដេច។ នគរបាលកំពុងចុះស្រាវជ្រាវកសាងនីតិវិធីច្បាប់៕
