បន្ទាយមានជ័យ៖ នៅព្រឹកថ្ងៃពុធ ៧ រោច ខែពិសាខ ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃទី១៣ ខែឧសភា ឆ្នាំ២០២០ នេះ សាខាកាកបាទក្រហមកម្ពុជា ខេត្តបន្ទាយមានជ័យ បានរៀបចំពិធី ជួបសំណេះសំណាល ជាមួយ ពាណិជ្ជករ ក្រុងប៉ោយប៉ែត ដើម្បីកៀរគរមូលនិធិគាំទ្រសកម្មភាពមនុស្សធម៌ របស់កាកបាទក្រហមកម្ពុជា ខេត្តបន្ទាយមានជ័យ នាឱកាស អបអរខួបទី១៥៧ ទិវាពិភពលោកកាកបាទក្រហម អឍ្ឍចន្ទក្រហម ។
ក្រោមអធិបតីភាព ឯកឧត្ដម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យ ឯកឧត្ដម ខេង ស៊ុម ប្រធានកិត្តិយសគណៈកម្មាធិការសាខាខេត្តបន្ទាយមានជ័យ និងមានការអញ្ជើញចូលរូលរួមពីថ្នាក់ដឹកនាំ-មន្ត្រី ទីស្នាក់ការកណ្តាល គណ:កិត្តិយសសាខា គណៈកម្មាធិការសាខា លោក គាត ហ៊ុល ប្រធានគណ:កម្មាធិការ អនុសាខាកាកបាទក្រហមកម្ពុជាក្រុងប៉ោយប៉ែត មន្ត្រីសាខា អនុសាខា អ្នកស្ម័គ្រចិត្ត យុវជនកាកបាទក្រហមកម្ពុជា ពាណិជ្ជករ ក្រុងប៉ោយប៉ែត ។
ក្នុងឱកាសនោះផងដែរ ឯកឧត្ដម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យ ព្រមទាំងសមាជិក សមាជិកាគណៈកម្មាធិការសាខា សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម លោកជំទាវ អ្នកឧកញ៉ា លោក លោកស្រី ប្រធានមន្ទីរអង្គភាព មន្ត្រីរាជការ គ្រប់ស្ថាប័នរដ្ឋ ឯកជន និងសប្បុរសជន ទាំងអស់ ដែល បានឧបត្ថម្ភ ថវិកាក្នុងន័យចូលរួមការងារមនុស្សធម៌ ដល់សាខាកាកបាទក្រហមកម្ពុជា ខេត្តបន្ទាយមានជ័យ ដើម្បីចូលរួមអបអរសាទរខួប ទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ។
មូលនិធិដែលសាខាកាកបាទក្រហមកម្ពុជា ខេត្តបន្ទាយមានជ័យ ទទួល បានពីសប្បុរសជនគ្រប់មជ្ឈដ្ឋានទាំងនៅថ្នាក់ជាតិ និងថ្នាក់ក្រោមជាតិ បានជួយឱ្យសាខាកក្រក ខេត្តបន្ទាយមានជ័យ មានធនធានអាចធ្វើប្រតិបត្តិ ការសប្បុរសធម៌របស់ខ្លួន ដោយពុំមានការរើសអើង សំដៅចូលរួមចំណែកក្នុងការជួយសង្រ្គោះជីវិត ការកសាងភាពធន់ទៅនឹងគ្រោះមហន្តរាយផ្សេងៗ ការកាត់បន្ថយអត្រាឈឺ និងស្លាប់នៃមាតា និងកុមារការលើកម្ពស់គោលការណ៍គ្រឹះនៃតម្លៃមនុស្សធម៌ សេចក្តីថ្លៃថ្នូររបស់មនុស្សជាតិ និងវប្បធម៌អហិង្សា។ល៕ 
