ភ្នំពេញ ៖ ក្រុមជនសង្ស័យចំនួន១០នាក់ កំពុងតែនាំគ្នាប្រើប្រាស់គ្រឿងញៀននៅក្នុងបន្ទប់ជួល ស្រាប់តែសមត្ថកិច្ចទៅដល់ក្របួចបាន និងដកហូតថ្នាំញៀន ចំនួន២កញ្ចប់តូច នឹងសម្ភារប្រើប្រាស់មួយចំនួន កាលពីវេលាម៉ោង១៣៖០០នាទីរសៀល ថ្ងៃទី១៩ ខែឧសភា ឆ្នាំ២០២០ នៅចំណុចបន្ទប់ជួលលេខB8 ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ប្រតិបត្តិការចុះបង្ក្រាបនេះ ដឹកនាំដោយលោកវរសេនីយ៍ត្រី សៀង សាញ់ អធិការរង, លោកវរសេនីយ៍ត្រី គួច សុភា អធិការរងតំណាងឲ្យលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ, លោក នាង ផល្លី មេប៉ុស្តិ៍អូរបែកក្អម និងមន្ត្រីតុលាកាចូលរួមផងដែ។
លោកវរសេនីយ៍ត្រី សៀង សាញ់ អធិការរងទទួលបន្ទុក បានឲ្យដឹងថា ដោយមានការណែនាំពីលោកអធិការខណ្ឌ បានឱ្យលោកដឹកនាំកម្លាំងធ្វើការស្រាវជ្រាវ ទើបឈានដល់ការឃាត់ខ្លួនបានជនសង្ស័យប្រុសស្រី១០នាក់ និងដកហូតថ្នាំញៀនចំនួន២កញ្ចប់តូច សម្ភារប្រើប្រាស់គ្រឿងញៀនមួយចំនួន។
លោកអធិការរង បានឲ្យដឹងទៀតថា ក្រោយពីនាំខ្លួនពួកគេទៅដល់អធិការនគរបាលខណ្ឌខាងផ្នែកជំនាញបានធ្វើតេស្តទឹកនោមរកសារធាតុញៀនទាំង១០នាក់នោះ ប៉ុន្តែរកឃើញអ្នកប្រើប្រាស់តែ០៨នាក់ទេ ដោយឡែក២នាក់ ដែលមិនមានសារធាតុញៀននោះសមត្ថកិច្ចឲ្យត្រឡប់ទៅផ្ទះវិញ។
បច្ចុប្បន្ន ជនសង្ស័យទាំង៨នាក់ រួមនិងវត្ថុតាងកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាកានៅពេលក្រោយ៕
