បន្ទាយមានជ័យ ៖ នៅព្រឹកថ្ងៃសៅរ៍ ២ កើត ខែជេស្ឋ ឆ្នាំជូត ទោស័ក ពុទ្ធសករាជ ២៥៦៤ត្រូវនឹងថ្ងៃទី២៣ ខែឧសភា ឆ្នាំ២០២០ នេះ រដ្ឋបាលក្រុងប៉ោយប៉ែត ក្រោមការ ដឹកនាំដោយផ្ទាល់ពី លោក គាត ហ៊ុល អភិបាល នៃគណៈភិបាលក្រុងប៉ោយប៉ែត និងជាប្រធានគណៈបញ្ជារការឯកភាពក្រុងប៉ោយប៉ែត បានប្រារព្ធពិធី យុទ្ធនាការអប់រំផ្សព្វផ្សាយអនាម័យបរិស្ថាន នៅក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ តាមបណ្ដោយផ្លូវជាតិលេខ៥ និងផ្លូវជាតិលេខ៥៩។
កម្មពិធីនៅថ្ងែនេះ ក្រោមប្រធានបទ ” អប់រំផ្សព្វផ្សាយអនាម័យបរិស្ថាន ក្រុងប៉ោយប៉ែត ” ដែលរៀបចំដោយ រដ្ឋបាលក្រុងប៉ោយប៉ែត សហការជាមួយ ការិយាល័យបរិស្ថានក្រុង កម្លាំងសម្ថកិច្ចប៉ុស្តិ៍រដ្ឋបាលសង្កាត់និមិត្ត អាជ្ញាធរមូលដ្ឋាន សង្កាត់និមិត្ត ~ ភូមិ ប្រជាការពារ ក្នុងគោលបំណងធ្វើឲ្យកាន់តែមានការយល់ដឹងពីបរិស្ថានស្អាត ទីក្រុងស្អាត សុខភាពល្អ សម្រាប់ការរស់ ។
ថ្លែងក្នុងឱកាសនោះ លោក គាត ហ៊ុល អភិបាលនៃគណៈភិបាលក្រុងប៉ោយប៉ែត សូមអំពាវនាវឲ្យបងប្អូនជនរួមជាតិយើង ទោះជាប្រជាពលរដ្ឋក្តី មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស ព្រះសង្ឃ សូមចូលរួមក្នុងកិច្ចគាំពារបរិស្ថាន តាមសមត្ថភាព លទ្ធភាព និងភារកិច្ចជំនាញរបស់ខ្លួន ហើយសូមស្វែងយល់អំពីបញ្ហាបរិស្ថានឲ្យបានស៊ីជម្រៅ និងចូលរួមក្នុងការងារបរិស្ថានទាំងអស់គ្នា សូមមានការយល់ដឹង ប្រកបដោយវិចារណញ្ញាណ និងមនសិការខ្ពស់ ឈប់បំផ្លាញ់បរិស្ថាន ទោះដោយចេតនាក្តី ឬអចេតនាក្តី ក្នុងក្តីរំពឹងរបស់អ្នកជំនាន់ក្រោយ រស់នៅដោយផាសុកភាព សំបូរសប្បាយរុងរឿង និងសុភមង្គល ដើម្បីមុខមាត់ការរីកចំរើនក្រុងរបស់យើងទាំងអស់គ្នា ៕ ដោយ៖ លោក ចាន់ពុធ
