កំពង់ចាម៖ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អមដំណើរដោយមន្ត្រីពាក់ព័ន្ធ នាព្រឹកថ្ងៃទី១២ ខែមិថុនា ឆ្នាំ២០២០នេះ បាននាំយកអំណោយមនុស្សធម៌ដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ប្រជាពលរដ្ឋងាយរងគ្រោះ ចំនួន៦៣គ្រួសារ នៅស្រុកកងមាស ។
បន្ទាប់ពីបានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម អ៊ុន ចាន់ដា អភិបាលខេត្តកំពង់ចាម បានក្រេីនរំលឹកដល់មន្ត្រីពាក់ព័ន្ធ និងបងប្អូនប្រជាពលរដ្ឋត្រូវបន្តអនុវត្តតាមសារអប់រំនានា របស់ក្រសួងសុខាភិបាល ក៏ដូចជាអនុសាសន៏ដ៏ខ្ពង់ខ្ពស់របស៎សម្តេចតេជោ ហ៊ុន សែន ដែលតែងបានដាស់តឿនអោយជនរួមជាតិ កុំធ្វេសប្រហែស ឬភ្លេច ជម្ងឺកូវីដ១៩ នេះអោយសោះ គឺត្រូវបង្កើនការប្រុងប្រយ័ត្នខ្ពស់ ដោយត្រូវមានម៉ាស់ ទឹកអាល់កុល ឬជែល ដាក់តាមខ្លួនជាប់ជាប្រចា។ និងត្រូវបន្តអនុវត្តគម្លាតសុវត្ថិភាពសង្គម និងគម្លាតសុវត្ថិភាពបុគ្គល បន្តទៀត ព្រមជាមួយ ការថែទាំសុខភាព តាមរយៈការអនុវត្តវិធានការអនាម័យស្អាតផងដែរ។
ជាមួយគ្នានោះ ឯកឧត្តម ប្រធានគណៈកម្មាធិការសាខា ក៏បានអំពាវនាវ ដល់ប្រជាពលរដ្ឋនិងអ្នកប្រើប្រាស់ផ្លូវទាំងអស់ សូមចូលរួមអនុវត្ត និងគោរពច្បាប់ចរាចរណ៍ផ្លូវគោក អោយបានគ្រប់ៗគ្នា ដើម្បី ការពាររក្សាជីវិតខ្លួនឯង និងជីវិតអ្នកដទៃ ស្របតាមទិសស្លោក ” ថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ ” ។
អំណោយដែលចែកជូនមាន ៖ អង្ករ ២៥ គ.ក្រ, ទឹកត្រី ទឹកស៊ីអ៊ីវ ត្រីខ អាវម៉ាស់ និងថវិកា ២០,០០០រៀល ។
ក្រោយបញ្ចប់ពិធីនេះ ឯកឧត្តម អ៊ុន ចាន់ដា និងសហការី បានបន្តអញ្ជើញប្រគល់ផ្ទះ ១ខ្នង រួមជាមួយ គ្រឿងឧបភោគបរិភោគ សម្ភារផ្ទះបាយ និងថវិកាមួយចំនួន ជូនដល់អ្នកស្រី វិត ស្រ៊ាង ជាស្ត្រីមេម៉ាយទ័លលំបាក រស់នៅភូមិ ឃុំ ពាមជីកង ស្រុកកងមាស សម្រាប់ស្នាក់អាស្រ័យ ផងដែរ ៕
