ព្រៃវែង ៖ កាលពីព្រឹកថ្ងៃសៅរ៍ ៨រោច ខែជេស្ឋ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៣ ខែមិថុនា ឆ្នាំ២០២០ ឯកឧត្តម ឧកញ៉ា ប៉ែន នួន ប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ និងលោកជំទាវ បានអញ្ជើញជាអធិបតីភាពក្នុងពិធីប្រកាសសមាសភាពក្រុមការងារថ្នាក់កណ្តាលចុះជួយឃុំកំពង់ប្រាសាទ ស្រុកពាមជរ ខេត្តព្រៃវែង។
នៅក្នុងពិធីខាងលើនេះដែរក៏មានការអញ្ជើញចូលរួមពីលោក ផេង ហ៊ួរ ប្រធានគណៈកម្មាធិការគណបក្សប្រជាជនកម្ពុជា ស្រុកពាមជរ និងលោក ហ៊ុន ចាន់ដែន អភិបាលរងស្រុកពាមជរ និងជាអនុប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ និងសមាជិកសមាជិកាបក្ស ប្រជាជនកម្ពុជាឃុំកំពង់ប្រាសាទជាច្រើនរូបទៀត។
គួររំលឹកថា ឯកឧត្តម ឧកញ៉ា ប៉ែន នួន ត្រូវបានប្រមុខរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងារថ្នាក់ជាតិចុះជួយខេត្តព្រៃវែង មានជំនឿទុកចិត្ត តែងតាំងលោកជាប្រធានក្រុមការងារ គណបក្សប្រជាជនកម្ពុជាចុះជួយ ឃុំកំពង់ប្រាសាទ។
នៅពិធីនោះដែរ ឧត្តម ឧកញ៉ា ប៉ែន នួន បានមានប្រសាសន៍ណែនាំឲ្យបងប្អូនសមាជិកសមាជិកាបក្ស ខិតខំប្រឹងប្រែងអនុវត្តតួនាទីឲ្យបានល្អ ដើម្បីបម្រើប្រជាជន ជួយដោះស្រាយបញ្ហានានា ដែលកើតមានឡើងក្នុងមូលដ្ឋាន អោយស្របតាមគោលនយោបាយរបស់គណបក្ស គោលបំណងគឺ កាត់បន្ថយភាពក្រីក្រជូនបងប្អូនប្រជាពលរដ្ឋអោយមានភាពល្អប្រសើរ។
ឯកឧត្តមឧកញ៉ា ប្រធានក្រុមការងារគណបក្សប្រជាជនកម្ពុជាចុះជួយឃុំកំពង់ប្រាសាទ មានប្រសាសន៍ផ្តាំផ្ញើដល់សមាជិកសមាជិកា បក្សទាំងអស់សូមមានការយកចិត្តទុកដាក់ពិនិត្យចំពោះប្រជាពលរដ្ឋដែលមានការខ្វះខាតខ្លាំង និងភាពអវិជ្ជមានទាំងអស់នៅក្នុងមូលដ្ឋានឃុំកំពង់ប្រាសាទដើម្បីរាយការណ៍ឲ្យលោកបើលោកជួយដោះស្រាយបានលោកនឹងជួយ បើលោកជួយមិនបានលោកនឹងរាយការណ៍ទៅថ្នាក់លើបន្តទៀត។ សូមបងប្អូនកុំយករឿងអវិជ្ជមាននៅក្នុងមូលដ្ឋានទៅពិភាក្សានៅរោងកាហ្វេឲ្យសោះត្រូវរាយការណ៍មកថ្នាក់លើដើម្បីរកដំណោះស្រាយជួយឲ្យបានទាន់ពេលវេលា៕
