ក្រុងប៉ោយប៉ែត ៖ នារសៀល ថ្ងៃចន្ទ ១០ រោច ខែជេស្ឋឆ្នាំជូតទោស័ក ពុទ្ធសករាជ ២៥៦៤ ត្រូវនឹងរសៀលថ្ងៃទី ១៥ ខែមិថុនាឆ្នាំ ២០២០នេះ ឧបាសិកា តាន់ អ៊ូសឿម ត្រូវជាម្ដាយបង្កើតរបស់ លោក គាត ហ៊ុលអភិបាលនៃគណៈអភិបាលក្រុងប៉ោយប៉ែតនិងភរិយា ព្រមទាំងបុត្របានបរិច្ចានូវអំណោយជាគ្រឿងឧបភោគបរិភោគជូនដល់ប្រជាពលរដ្ឋដែលមានការខ្វះខាតមកពីភូមិផ្សេងៗនៅក្នុងក្រុងប៉ោយប៉ែតចំនួន ១៤០ គ្រួសារ ។
អំណោយទាំងនោះក្នុងម្នាក់ៗទទួលបានអង្ករ១ការ៉ុង២៥ គីឡូក្រាម ទឹកត្រី១យួ ប៊ីចេង១ កញ្ចប់រួមនឹងថវិកាក្នុងម្នាក់ ១មុឺនរៀល
ជម្រាបផងដែរថា អង្ករទាំងអស់នោះគឺជាអង្កររបស់ឧបាសិកាតាន់ អ៊ូសឿម លោកបានធ្វើស្រែជាប្រចាំឆ្នាំហើយប្រមូលផលទុកគ្រាន់សម្រាប់ផ្ដល់ជូនបងប្អូនប្រជាពលរដ្ឋមានការខ្វះខាតហើយឧបាសិកាបានចែកជូនបងប្អូនប្រជាពលរដ្ឋដែលមានការខ្វះខាតចំនួន៤ ឆ្នាំមកហើយ ។
ជាចុងក្រោយនេះ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែតបានមានមតិផ្តាំផ្ញើដល់បងប្អូនប្រជាពលរដ្ឋសុំឲ្យរក្សាអនាម័យឱ្យបានល្អពាក់ម៉ាសសម្អាតដៃនិងជៀលឬសាប៊ូ ជៀសវាងការឆ្លងរាលដាលនៃវីរុស កូវីដ១៩ ទោះបី វីរុសកូរ៉ូណា មានការធូរស្បើយយ៉ាងណាក៏ដោយយើងត្រូវតែប្រយ័ត្នបន្ថែមទៀតនិងសូមជូនពរបងប្អូនទាំងអស់ឲ្យជៀសផុតពីកូវីដ ១៩ទាំងអស់គ្នានឹងទទួលយកពរទាំងបួនប្រការអាយុវណ្ណៈសុខៈពលៈកុំបីឃ្លៀងឃ្លាតឡើយ។ ដោយ៖លោកចាន់ពុធ
