ក្រុងប៉ោយប៉ែត ៖ នៅរសៀលថ្ងៃអង្គារ ៣ កើត ខែអាសាឍ ឆ្នាំជូត ទោស័ក ពុទ្ធសករាជ ២៥៦៤ត្រូវនឹងថ្ងៃទី២៣ ខែមិថុនា ឆ្នាំ២០២០ នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអញ្ជើញ ជាគណអធិបតី ក្នុងពិធី ចែក អំណោយជូនប្រជាពលរដ្ឋ ចំនួន២០០គ្រួសារ នៅវត្តអណ្ដូងថ្មមាស ដែល បានការឧបត្ថម្ភ ពី លោក អេវិន អេសអឹមប៊ី និងលោកស្រី ស៊ិនឌី ចាន់ត្រា តាមរយៈ ព្រះគ្រូ ឈិន ណារិទ្ធិ ចៅអធិការវយ្ត ពោធិសុវណ្ណសិលារាម ហៅ ( វត្តអណ្តូងថ្មមាស ) ។
ក្នុងពិធីនេះ ដោយមានការអញ្ជើញ ចូលរួម ពី ព្រះធម្មញាណ ប៉ុក ចំរើន ព្រះរាជាគណៈថ្នាក់កិត្តិយស និង ជាព្រះគ្រូអនុគណ ក្រុងប៉ោយប៉ែត លោក លោកស្រីអភិបាលរង លោកនាយករដ្ឋបាល នាយករងរដ្ឋបាល លោក លោក ស្រី ប្រធាន ការិយាល័យ អង្គភាព លោកចៅសង្កាត់ លោកមេភូមិ គណៈកម្មការអាចារ្យវត្ត ប្រជាពលរដ្ឋ ជាច្រើននាក់ផងដែរ ។
សូមជម្រាបថា អំណោយដែលបានការឧបត្ថម្ភ ពី លោក អេវិន អេសអឹមប៊ី និងលោកស្រី ស៊ិនឌី ចាន់ត្រា ជាសប្បុរសជន និងជាម្ចាស់អំណោយ អញ្ជើញមកពីប្រទេស ឥណ្ឌូនេស៊ី សម្រាប់ ចែកជូនប្រជាពលរដ្ឋ នៅរសៀនេះរួមមាន ៖
១ • អង្ករចំនួន ២០គីឡូក្រាម
២ • ព្រេងសណ្ដែក ១ដប
៣ • ស្ករស កន្លះគីឡូក្រាម
៤• ទឹកសុទ្ធមួយថៃ
៥ • មី២០កញ្ចប់
៦ • ថវិការចំនួន២០,០០០រៀល
៧ • ពងមាន់មួយថង
នៅក្នុងឱកាសនោះផងដែរ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ក៏បានមានមតិជួបសំណេះសំណាល សួរសុខទុក្ខ ផ្ដាំផ្ញើរ ពីថ្នាក់ដឹកនាំដោយ យោងតាមប្រសាសន៍ដ៏ខ្ពង់ខ្ពស់ របស់ សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាបាលកម្ពុជា និង អនុសាសន៍ណែនាំ ដ៏ខ្ពង់ខ្ពស់ របស់ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀននិងជា ប្រធានក្រុមការងារ ចុះជួយ ខេត្តបន្ទាយមានជ័យ ឯកឧត្តមនាយឧត្តមសេនីយ៍ ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះជួយក្រុងប៉ោយប៉ែត និងថ្នាក់ដឹកនាំ អាជ្ញាធរខេត្តបន្ទាយមានជ័យបាននិងកំពុងផ្តោត ការយកចិត្តទុកដាក់លើការងារមនុស្សធម៌ ដោយមិនឱ្យប្រជាពលរដ្ឋណាម្នាក់ស្លាប់ដោយអត់បាយ មិនមានអាជ្ញាធយកចិត្តទុក្ខ នោះទេ។
ចាប់តាំងពីការរីករាលដាលនៃវីរុសកូវីដ១៩ រដ្ឋបាលក្រុងប៉ោយប៉ែតយើង បាន សហការជាមួយរដ្ឋបាលសង្កាត់ និង មានការចូលរួមពីសប្បុរសជននៅគ្រប់ទិសទី រដ្ឋបាលក្រុង បានកៀរគរ ជាសម្ភារៈ ថវិកា ច្រើនសន្ធឹកសន្ធាប់ និង បានចែកជូនដល់បងប្អូនប្រជាពលរដ្ឋមានជីវភាពខ្វះខាត បានចំនួនជាង៧០០០គ្រួសារមកហើយ ទោះបីជា ខំចែកជូនយ៉ាងណាក្តី នៅតែមាន ប្រជាពលរដ្ឋជា ច្រើនគ្រួសារជួបប្រទះនឹងការខ្វះខាតបន្តទៀត។
ដូច្នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានសូមអំពាវនាវដល់សប្បុរសជន ទាំងក្នុងនិងក្រៅប្រទេស មេត្តាជួយឧបត្ថម្ភជាសម្ភារៈ ថវិកាបន្ថែមទៀត ដើម្បីយកទៅចែកជូនបងប្អូនប្រជាពលរដ្ឋដែលកំពុងជួបប្រទះនឹងការខ្វះខាតនៅពេលក្រោយៗទៀត ។
ជាមួយគ្នានេះ ផងដែរ លោក អភិបាលក្រុងប៉ោយប៉ែត ក្នុងនាមជាអាជ្ញាធរក្រុង និងក្នុងនាមរូបលោកផ្ទាល់ សូមស្នើដល់ ព្រះតេជគុណជាម្ចាស់គ្រប់ព្រះអង្គ លោក លោកស្រី និងបងប្អូនប្រជាពលរដ្ឋទាំងអស់ បន្តយកចិត្តទុកដាក់ លើការងារសំខាន់ៗ មួយចំនួនដូចខាងក្រោម៖
១ • បញ្ហាជំងឺកូវីដ១៩
២ • បញ្ហាការបិទច្រកព្រំដែន
៣ • ជម្រុញឱ្យកូនរៀនសូត្រតាមប្រព័ន្ធអនឡាញ
៤ • ដាំដំណាំកសិកម្ម ចិញ្ចឹមសត្វ ជាលក្ខណៈគ្រួសារ
ដោយ លោក អភិបាល នៃគណៈអភិបាលក្រុងប៉ោយប៉ែត គិតថា ការចែកអំណោយនាពេលនេះ គឺជាការរួមចំណែកកាត់បន្ថយទុក្ខលំបាករបស់បងប្អូនប្រជាពលរដ្ឋមានជីវភាពខ្វះខាតបានមួយរយៈពេលខ្លីតែប៉ុណ្ណោះ ចំពោះអំណោយដែលយើងត្រូវចែកជូននាពេលនេះ ក្នុងមួយគ្រួសារទទួលបានអង្ករ ២០គីឡូក្រាម មី១កេស ត្រីខ១យួរ ស្ករស១គីឡូ ពងមាន់១បន្ទះ ខ្លាញ់១ដប និងថវិកា២ម៉ឺនរៀល ។ ដូច្នេះ សូមបងប្អូន ចូលរួម ដាំដំណាំកសិកម្ម ចិញ្ចឹមសត្វ ជាលក្ខណៈគ្រួសារ ដើម្បី ជួយដោះស្រាយ ជីវភាព យើង ក្នុងកាលៈទេសៈចាំបាច់ ស្ថានភាពជំងឺកូវីដ១៩ ដែលកំពង់រាតត្បាត នាបច្ចុប្បន្ននេះ ។
ជាចុងក្រោយ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បាន ថ្លែងអំណរគុណដល់លោក អេវិន អេសអឹមប៊ី និងលោកស្រី ស៊ិនឌី ចាន់ត្រា ព្រះគ្រូចៅអធិការ និងគណៈកម្មការវត្តពោធិសុវណ្ណសិលារាម ហៅវត្តអណ្តូងថ្មមាស ដែលបានបរិច្ចាកថវិកានិង គ្រឿងឧបភោគបរិភោគ សម្រាប់ចែកជូនបងប្អូនប្រជាពលរដ្ឋនាឱកាសនេះ និងពេលកន្លងមក ហើយជាពិសេស នៅថ្ងៃនេះ ដែលបានកៀរគរជាសម្ភារៈ ថវិកាពីសប្បុរសជន រហូតដល់រៀបបានជា ពិធីចែកអំណោយដ៏អធិកអធម នាឱកាសនេះ សូមជូនពរដល់លោក លោកស្រី មន្ត្រីរាជការ សប្បុរសជន និងបងប្អូនប្រជាពលរដ្ឋទាំងអស់ ដែលមានវត្តមានក្នុងពិធីនេះ សូមជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ ។ ដោយ ៖ចាន់ពុធ
