ស្វាយរៀង៖ព្រឹកថ្ងៃអាទិត្យ៧រោច ខែអាសាឍ ឆ្នាំជូត ទោស័កព.ស២៥៦៤ ត្រូវនិងថ្ងៃទី១២ ខែកក្កដាឆ្នាំ២០២០ លោក ធឿន រដ្ឋា ប្រធានការិយាល័យនិតិកម្ម និងសម្រុះសម្រួលវិវាទមូលដ្ឋានស្រុក និងជាសមាជិកក្រុមការងារថ្នាក់ស្រុកចុះជួយឃុំព្រៃគគីរ បានសហការជាមួយលោកមេឃុំ ក្រុមប្រឹក្សាឃុំព្រៃគគីរ លោកមេភូមិត្រពាំងបុណ្យ ចុះសួរសុខទុក្ខនិងនាំយកសម្ភារៈថវិកាជូនដល់លោកយាយ ថោង ហៀប អាយុ៨៣ឆ្នាំចាស់ជរាក្រីក្រគ្មានទីពឹង រស់នៅភូមិត្រពាំងបុណ្យឃុំព្រៃគគីរស្រុកចន្ទ្រាខេត្តស្វាយរៀង។
ក្នុងពិធីចុះសួរសុខទុក្ខលោក ធឿន រដ្ឋា សមាជិកក្រុមការងារថ្នាក់ស្រុកចុះជួយឃុំព្រៃគគីរ
បានពាំនាំការផ្តាំផ្ញើសួរសុខទុក្ខដោយក្តីនឹករលឹក ពីសំណាក់ លោក ថន ថាវុទ្ធា អភិបាលស្រុក និងជាប្រធានក្រុមការងារថ្នាក់ស្រុកចុះជួយឃុំព្រៃគគីរ ជូនលោកយាយលោកតាបងប្អូន ប្រជាពលរដ្ឋទាំងអស់ក្នុងឃុំព្រៃគគីរ ដោយលោក អភិបាលស្រុកចន្ទ្រា តែងតែគិតគូរជានិច្ចអំពីសុខទុក្ខ និងចំពោះជីវភាពប្រចាំថ្ងៃរបស់ប្រជាពលរដ្ឋក្នុងស្រុកចន្ទ្រា ដោយសារប្រទេសជាតិមានសុខសន្តិភាព ជាពិសេសបង្ហាញពីទឹកចិត្ត របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុនសែន ធ្វើឲ្យប្រទេសជាតិយើងមានការរីកចម្រើនទៅមុខជានិច្ច។
ឆ្លៀតក្នុងឱកាសនោះដែរ លោក ធឿន រដ្ឋា ក៏បានសំណុំពរឱ្យប្រជាពលរដ្ឋគ្រប់រូប ត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការ ឆ្លងរីករាលដាលនៃជំងឺកូវីដ១៩ នៃរលកទី២ ដោយគោរព និងអនុវត្តឱ្យ បានខ្ជាប់ខ្ជួន នូវគោលការណ៍ រក្សាគម្លាតសង្គម និងវិធានការនានា តាមការនែនាំរបស់ក្រសួងសុខាភិបាល និងសូមឱ្យប្រជាពលរដ្ឋ ទាំងអស់គ្នា ត្រូវបង្កើនការផលិតផ្នែកកសិកម្ម តាមរយៈការដាំដុះ ការ ចិញ្ចឹមសត្វ ជាដើម។
សូមបញ្ជាក់ថា សម្ភារៈថវិការត្រូវជូនលោកយាយ ថោង ហៀប រួមមាន៖អង្ករ ២៥ គីឡូក្រាម មី១កេស ទឹកត្រី ២ដប ទឹកស៊ីអ៊ីវ ២ដប ខ្លាញ់១ដប ត្រីខកំប៉ុង១យូរ អំបិល១គីឡូ ប៊ីចេង១គីឡូ ស្កសរ១គីឡូ តែ១គីឡូ និងថវិការ៤០,០០០រៀល (ជាអំណោយរបស់លោក ធឿន រដ្ឋា និងលោកស្រី ពៅ ស្រីញឹប ព្រមទាំងបុត្រ)៕
