ភ្នំពេញ ៖ បើគ្រាន់លឺតែឈ្មោះ អ្នកសារព័ត៌មាន មិនថា ជាតិ អន្តរជាតិ តែងតែសរសើរមិនដាច់ពីមាត់ ពីសកម្មភាព និងការឆ្លើយតបយ៉ាងឆាប់រហ័សពីបញ្ហានានាក្នុងរាជធានីភ្នំពេញនោះគឺលោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ ដែលមានទឹកដមសម្លេងទន់ភ្លន់ សុភាពរាបសារ និងមានទំនួលខុសត្រូវខ្ពស់ ក្នុងការឆ្លងឆ្លើយជាមួយអ្នកសារព័ត៌មាននោះនៅព្រឹកថ្ងៃទី១១ ខែកក្ដដា ឆ្នាំ២០២០នេះដែរលោក ម៉េត មាសភក្ដី បានបង្ហាញអារម្មណ៍សប្បាយរីករាយជាមួយនឹងជីវភាពជាមន្រ្តីរាជការរាល់ថ្ងៃ។
ជាមួយនឹងភាពសប្បាយចិត្តនេះដែរ លោកបញ្ជាក់ថា មិនមែនសប្បាយដោយការបំពាក់គ្រឿងឥស្សរិយយស មិនមែនសប្បាយចិត្តដោយទទួលបានការតំឡើងបុណ្យស័ក្ដិតួនាទីនោះទេ ពោលគឺលោកសប្បាយដោយបានជួយសម្របសម្រួលដោះស្រាយ រួមនឹងការផ្លាស់ប្តូរជីវិតរស់នៅថ្មី ជីវភាពប្រចាំថ្ងៃថ្មី និងក្តីសង្ឃឹមជាថ្មីជូនបងប្អូនប្រជាពលរដ្ឋរាប់រយគ្រួសារ ដែលកំពុងរស់នៅលើផ្លូវសាធារណៈជាង ២០ឆ្នាំកន្លងមកហើយនោះ។
អ្នកនាំពាក្យរដ្ឋបាលរាជធានីភ្នំពេញរូបនេះ បញ្ជាក់ទៀតថា លទ្ធផលបែបនេះ ពិតជាកើតឡើងក្រោមការដឹកនាំដ៏ប៉ិនប្រសព្វ និងម៉ឺងម៉ាត់របស់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងការអនុវត្តដោយភាពទទួលខុសត្រូវខ្ពស់ របស់មន្ត្រីក្រោមឱវាទគ្រប់លំដាប់ថ្នាក់ ពិសេសស្មារតីភ្ញាក់រលឹក ទទួលស្គាល់ ទទួលយក និងសហការរបស់បងប្អូនប្រជាពលរដ្ឋយើង។ លោក សង្ឃឹមថា វប្បធម៌បែបនេះនឹងស្ថិតនៅជាប់គ្រប់ក្រអៅបេះដូងរបស់ភាគីពាក់ព័ន្ធគ្រប់គ្នា។
សូមបញ្ជាក់ថា ក្រោយទទួលបានការយល់ព្រមផ្តល់ជូនដីឡូតិ៍ទំហំ ៤ម៉ែត្រ គុណ ១៥ម៉ែត្រ ក្នុងមួយខ្នងផ្ទះ ពីសម្តេចតេជោនាយករដ្ឋមន្ត្រីតាមរយៈសំណើរបស់បងប្អូនប្រជាពលរដ្ឋសហគមន៍បន្ទាយស្លឹកចំនួន ៨៧ខ្នងផ្ទះ រស់នៅលើផ្លូវសាធារណៈលេខ៤៣៤ ភូមិ៤ សង្កាត់ទំនប់ទឹក ខណ្ឌបឹងកេងកងរួចមក នៅព្រឹកថ្ងៃទី១១ ខែកក្កដា ឆ្នាំ២០២០ បងប្អូនដែលជាម្ចាស់ផ្ទះទាំងអស់បានស្ម័គ្រចិត្តចូលរួមរុះរើសំណង់របស់ខ្លួនជាមួយអាជ្ញាធរដោយស្មារតីសហការ និងសប្បាយរីករាយ ដើម្បីរៀបចំសម្ភារ និងដឹកជញ្ជូនទៅនៅទីតាំងដីឡូតិ៍ថ្មីដែលអាជ្ញាធររាជធានីភ្នំពេញបានរៀបចំផ្តល់ជូនបងប្អូន ដែលស្ថិតនៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល ដោយស្នាក់នៅបណ្តោះអាសន្នមួយរយៈក្នុងផ្ទះដែលអាជ្ញាធរបានរៀបចំទុកជូន។
ក្រោមនយោបាយ ឈ្នះ ឈ្នះ របស់សម្តេចតេជោហ៊ុន សែន នាយករដ្ឋមន្ត្រី និងអនុវត្តតាមអនុសាសន៍ដ៏ខ្ពង់ខ្ពស់របស់សម្តេចក្នុងការផ្តល់កម្មសិទ្ធិជូនប្រជាពលរដ្ឋក្រីក្រពិតប្រាកដ ក្នុងនោះ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានដឹកនាំ រៀបចំ ចាត់ចែងការអនុវត្តប្រកបដោយប្រសិទ្ធភាពខ្ពស់តាំងពីដំណាក់កាលចាប់ផ្តើម រៀបចំនីតិវិធី រហូតឈានដល់ការរុះរើដោយស្ម័គ្រចិត្តដែលបងប្អូនប្រជាពលរដ្ឋពេញចិត្តទទួលយក។
ជាមួយគ្នានេះលោកអ្នកនាំពាក្យរូបនេះ និងតាងនាមថ្នាក់ដឹកនាំរដ្ឋបាលរាជធានីភ្នំពេញ មានក្តីរីករាយយ៉ាងខ្លាំងដែលឃើញបងប្អូនទាំងអស់នេះផ្លាស់ប្តីជីវភាពថ្មី និងប្រកបរបរសមរម្យ ស្របតាមគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋយើង៕
