ស្វាយរៀង ៖ លោក អ៊ុំ បាក់ស និងភរិយា រួមនឹងក្រុមគ្រួសារ ព្រមទាំងក្រុមការងារ អង្គភាពសារព័ត៌មានរស្មីគោកធ្លក បាននាំយកនូវទៀនវស្សា គ្រឿងឧបភោគបរិភោគ និងបច្ច័យទៅវេរប្រគេនព្រះសង្ឃដែលគង់ចាំព្រះវស្សានៅវត្តថ្មី ដែលស្ថិតនៅក្នុង ភូមិទួលចំបក់ ឃុំសង្កែ ស្រុករំដួល ខេត្តស្វាយរៀង កាលពីព្រឹកថ្ងៃសៅរ៍ ១៣រោច ខែអាសាឍ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៨ ខែកក្កដា ឆ្នាំ២០២០។
គួររំលឹកផងដែរថា ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំចាប់ពីថ្ងៃ១រោច ខែអាសាឍ ដល់ថ្ងៃ១៥ កើត ខែអស្សុជ តែពិធីត្រូវបានចាប់ផ្តើមនៅល្ងាចថ្ងៃ១៥កើត ខែអាសាឍ ដោយមានការចូលរួមពីសំណាក់បងប្អូនពុទ្ធបរិស័ទ និងចាស់ទុំចំណុះជើងវត្ត នាំគ្នាហែរទៀនវស្សា សំពត់ ស្លាដក និងសម្ភារៈប្រើប្រាស់ផ្សេងៗ ហែរជុំវិញព្រះវិហារ និងបន្ទាប់មកសម្តែងធម៌ទេសនា និងវេរទៀនវស្សា និងសម្ភារៈប្រគេនព្រះសង្ឃ។
បន្ទាប់ពីបញ្ចប់ពិធីបុណ្យ ហែរទៀនវស្សាខាងលើនៅគេហដ្ឋានរបស់លោកក៏បានធ្វើពិធីចែកជូនជាអំណោយ និងថវិកាមួយចំនួនដល់លោកតា លោកយាយ ចាស់ជរា ក្នុងភូមិដែលមានជីវភាពខ្វះខាត ដោយមានការអញ្ជើញចូលរួមពីសំណាក់ លោក ធឹម ពៅ ប្រធានផ្នែកទទួលពាក្យបណ្ដឹង និងកិច្ចការរដ្ឋបាល នៃការិយាល័យប្រជាពលរដ្ឋខេត្តស្វាយរៀង និងលោក ពៅ សាមឿន មេឃុំសង្កែ លោកមេភូមិ រួមនឹងប្រជាការពារជាច្រើននាក់ទៀត។
លោក មេឃុំសង្កែ បានលើកឡើងថា ក្រោមការដឹកនាំដ៏ឈ្លាសវៃនៃប្រមុខរាជរដ្ឋាភិបាលបានធ្វើអោយប្រទេសជាតិមានការរីកចម្រើនលើគ្រប់វិស័យ ក្នុងនោះទាំងអាណាចក្រ និងពុទ្ធចក្រដែលមានការីកចម្រើនខ្លាំលើគ្រប់វិស័យ ដោយបុណ្យចូលវស្សាគឺ ជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួន។
ក្នុងឳកាសនោះ លោកមេឃុំ ក៏បានថ្លែងអំណរគុណដល់ លោក អ៊ុំ បាក់ស និងភរិយា ដែលជានិច្ចកាលលោកតែងតែឧបត្ថម្ភដល់សាលាឃុំសង្កែ និងបងប្អូនប្រជាពលរដ្ឋដែលមានជីវភាពខ្វះខាតផងដែរ។
លោកមេឃុំក៏បានផ្ដាំផ្ញើដល់បងប្អូនប្រជាពលរដ្ឋក្នុងឃុំសង្កែទាំងអស់ ចូលរួមទប់ស្កាត់នៃជំងឺឆ្លងកូវីដ ១៩ ដោយការនៅជិតគ្នាត្រូវរក្សាគំលាត ឧស្សាហ៍លាងដៃជាមួយសាប៊ូ អាល់កុល ឬជែល និងត្រូវធ្វើតាមការណែនាំរបស់ក្រសួងសុខាភិបាល។
បន្ទាប់ពីចែកជូនអំណោយរួច លោក អ៊ុំ បាក់ស និងភរិយា បានរៀបចំពិធីជួបជុំបងប្អូន ញាតិមិត្ត ជិតឆ្ងាយដែលបែកជាយូរ និងបានពិសារអាហារសាមគ្គីរួមគ្នា ស្ថិតក្នុងបរិយាកាសសប្បាយរីករាយ។ លោកបញ្ជាក់ថា មិត្តភាពនេះហើយ គឺជាផ្នែកដ៏សំខាន់មួយជួយឲ្យជីវិតយើងម្នាក់ៗ រស់នៅប្រកបដោយភាពស្រស់ស្រាយ ដែលជាឥទ្ធិពលជួយដល់សុខភាព និងសុខុមាលភាពរបស់យើងគ្រប់គ្នាផងដែរ៕
