ភ្នំពេញ ៖ ក្នុងរជ្ជកាលថ្មីនេះគ្រប់ស្ថាប័ននានាក្នុងរាជរដ្ឋាភិបាលកម្ពុជា គឺតែងតែមានអ្នកនាំពាក្យដើម្បីសម្របសម្រួល និងឆ្លើយតបជាមួយអ្នកសារព័ត៌មានជាធម្មតា ប៉ុន្តែអ្វីដែលពិសេស និង ជាភ័ព្វសំណាងជាងគេនោះ គឺរដ្ឋបាលរាជធានីភ្នំពេញមានអ្នកនាំពាក្យវ័យក្មេង១រូបដែលតែងតែមានទំនាក់ទំនងល្អ ,មានឥរិយាបទទន់ភ្លន់ សុភាពរាបសារ និងមានទំនួលខុសត្រូវខ្ពស់លើគ្រប់ភារកិច្ច។
នេះបើតាមការលើកសរសើរពីប្រជាពលរដ្ឋសហគមន៍បន្ទាយស្លឹកដែលបានទៅតាំងទីលំនៅថ្មីនៅតំបន់អភិវឌ្ឍន៍ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ក្រោមការសម្របសម្រួលពីលោក ម៉េត មាសភក្ដី ។
មហាជនទូទៅបានលើកឡើងថា រដ្ឋបាលរាជធានីភ្នំពេញ ពិតជាមានមោទនភាពណាស់ដែលមានសេនាធិការល្អៗ ពិសេសមានអ្នកនាំពាក្យវ័យក្មេងពោរពេញដោយសមត្ថភាព ចេះសម្របសម្រួលដោះស្រាយការងារ និង ផ្ដល់ព័ត៌មានប្រកបដោយវិជ្ជាជីវៈ និងមានតម្លាភាព ដែលនាពេលកន្លងមកមានការទទួលស្គាល់ ពីគ្រប់មជ្ឈដ្ឋាន ។
ជាការពិតណាស់ លោក ម៉េត មាសភក្ដី បច្ចុប្បន្នគឺជាអ្នកនាំពាក្យរដ្ឋបាលរាជធានីភ្នំពេញ ដែលឈ្លាសវៃ មានសមត្ថភាពក្នុងការដោះស្រាយបញ្ហាជូនប្រជាពលរដ្ឋ ធ្វើឲ្យរដ្ឋបាលរាជធានីភ្នំពេញ ក្រោមការដឹកនាំដ៏ប៉ិនប្រសប់ និងម៉ឺងម៉ាត់របស់ ឯកឧត្តម ឃួង ស្រេង កាន់តែទទួលបានការគាំទ្រខ្លាំងពីគ្រប់ទិសទី ប៉ុន្តែ អ្នកនាំពាក្យវ័យក្មេង ដែលដឹកនាំការងារនេះបានបញ្ជាក់ថា ភាពជោគជ័យនេះមិនមែនជាសិទ្ធិផលរបស់លោកម្នាក់ឯងទេ ពោលគឺបានមកពីការរួមចំណែកទទួលខុសត្រូវខ្ពស់របស់មន្ត្រីរដ្ឋបាលរាជធានីភ្នំពេញគ្រប់លំដាប់ថ្នាក់ ពិសេសស្មារតីភ្ញាក់រឭក ទទួលស្គាល់ ទទួលយក និងសហការរបស់បងប្អូនប្រជាពលរដ្ឋ ដោយសង្ឃឹមថាវប្បធម៌បែបនេះនឹងស្ថិតនៅជាប់ក្នុងក្រអៅបេះដូងរបស់ភាគីពាក់ព័ន្ធគ្រប់ៗគ្នា ។
ជាមួយគ្នានឹងផ្លែផ្កាដ៏ល្អនេះ លោក ម៉េត មាសភក្ដី ក៏បានរំលេចសារនៅលើបណ្ដាញសង្គមហ្វេសប៊ុកផ្ទាល់ខ្លួនកាលពីព្រឹកថ្ងៃទី១៧ ខែកក្កដា ឆ្នាំ២០២០ ថា ” ម៉ាត់ណា ម៉ាត់ហ្នឹង! សន្យា ធ្វើ ។
សន្យា ១អាទិត្យ ចឹងទើបតែ ៦ថ្ងៃ តែធ្វើមុនសន្យា” ។ សារនេះបានធ្វើឲ្យមហាជនមានការភ្ញាក់ផ្អើលខ្លាំង ដោយបានភ្ជាប់ជាមួយនូវរូបថតជាច្រើនសន្លឹក របស់បងប្អូនប្រជាពលរដ្ឋទាំង៨៧ខ្នងផ្ទះ បង្ហាញទឹកមុខរីករាយស្រស់ស្រាយ នៅពេលបានទទួលលិខិតផ្ទេរសិទិ្ធកាន់កាប់ដី ដែលជាអំណោយដ៏ថ្លៃថ្លារបស់សម្ដេចតេជោ នាយករដ្ឋមន្ត្រីប្រទានដីទំហំ ៤ម៉ែត្រ គុណ ១៥ម៉ែត្រ ក្នុងតំបន់អភិវឌ្ឍន៍ ស្ថិតក្នុង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ។
គួរំឭកថា កាលពីព្រឹកថ្ងៃទី១១ ខែកក្កដា ឆ្នាំ២០២០ កន្លងទៅនេះ លោក ម៉េត មាសភក្ដី បានដឹកនាំមន្ត្រីក្រោមឱវាទចុះសម្របសម្រួលបញ្ចប់ដំណោះស្រាយជូនបងប្អូនប្រជាពលរដ្ឋក្នុងសហគមន៍បន្ទាយស្លឹកចំនួន ៨៧ខ្នងផ្ទះ ដែលរស់នៅលើផ្លូវសាធារណៈជាច្រើនឆ្នាំឲ្យព្រមរុះរើ និងទទួលយកដំណោះស្រាយសមរម្យពីរដ្ឋបាលរាជធានីភ្នំពេញដោយគ្មានហឹង្សា ។ អ្វីដែលពិសេស និងធ្វើឲ្យមហាជនមានការសាទរ គឺប្រើពេលមិនដល់មួយអាទិត្យផង អ្នកនាំពាក្យរូបនេះបាននាំលាភ នាំជ័យ នាំសិរីសួស្តី ជូនដល់ឲ្យបងប្អូនប្រជាពលរដ្ឋដែលបានទៅតាំងទីលំនៅថ្មី កាន់តែមានក្ដីសង្ឃឹម បូករួមនឹងស្នាមញញឹមបិទមាត់ជិតគឺការទទួលបានលិខិតផ្ទេរសិទិ្ធកាន់កាប់ដី តបតាមការសន្យា។
ពួកគាត់ទាំងអស់គ្នា បានថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុនសែន បិតាសន្ដិភាព ដែលបានធ្វើឲ្យជីវិតរបស់ពួកគាត់ ធ្លាប់តែរស់នៅលើផ្លូវសាធារណៈគ្មានលំនឹង គ្មានបង្អែករឹងមាំជាង២០ឆ្នាំឲ្យមានក្ដីសង្ឃឹមឡើងវិញ ៕
