ខេត្តកណ្តាល ៖ នៅព្រឹកថ្ងៃទី២៩ ខែវិច្ឆិកា ឆ្នាំ២០២០ នេះ លោក ហ៊ាង ប៊ុនថា ប្រធានសកម្មជនហ្វេសប៊ុកកម្ពុជានិង សហការីបាននាំយកអំណោយសប្បុរសជនយ៉ាងច្រើនសន្ធឹកសន្ធាប់ដើម្បីមកចែកជូនបងប្អូនប្រជាពលរដ្ឋក្រីក្រចំនួន៥៧គ្រួសារនៅភូមិត្រើយត្រឹង្ស ឃុំព្រែកអំបិល ស្រុក ស្អាង ខេត្តកណ្តាល។
នៅក្នុងពិធីចែកអំណោយនេះក៏មានការអញ្ជើញចូលរួម ពី លោក រិន ច័ន្ទរិទ្ធិ អគនាយកក្រុមហ៊ុន DNZ Realty លោក ខឿន វណ្ណៈ ហុង ចាន់រ៉ាទី ម្ចាស់ក្រុមហ៊ុន CHDD Beauty Co;Ltd លោកមេឃុំ នាយប៉ុស្តិ៍ មេភូមិទាំង៣ និងលោក-លោកស្រី សប្បុរសជននានា និងបងប្អូនអ្នកសារព័ត៌មានជាច្រើនអ្នក។
អគនាយកក្រុមហ៊ុន DNZ Realty លោក រិន ច័ន្ទរិទ្ធិ បានថ្លែងថា អំណោយថ្ងៃនេះថ្វីត្បិតតែមិនអាចជួយឲ្យបងប្អូនអាចរស់បានមួយជីវិត តែជាទឹកចិត្តដ៏ប្រពៃថ្លៃថ្លានិងជាសកម្មភាពមនុស្សធម៌ហើយក៏ជាការចូលរួមចំណែកក្នុងនាមខ្មែរជួយខ្មែរ យើងចេះជួយគ្នាក្នុងគ្រាលំបាក ដែលនេះក៏ស្របទៅតាមប្រសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។
ក្នុងឱកាសនោះលោក ហ៊ាង ប៊ុនថា ប្រធានសកម្មជនហ្វេសប៊ុកកម្ពុជា និងជាតំណាងសប្បុរសជនបានថ្លែងថា សូមអរគុណសន្តិភាព សូមអរគុណស្ថាបនិកសន្តិភាពគឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា។ លោកបន្តថាយើងមានឱកាស បានជួបជុំគ្នានៅព្រឹកនេះក៏ដោយសារប្រទេសជាតិមានសុខសន្តិភាព មានស្ថេរភាពនយោបាយល្អប្រសើរ មានការអភិវឌ្ឍ ទាំងហេដ្ឋារចនាសម្ព័ន្ធ ធមធានមនុស្ស និង សេដ្ឋកិច្ច ក្រោមនយោបាយ ឈ្នះ ឈ្នះ របស់រាជរដ្ឋាភិបាល ស្របច្បាប់ ក្រោមការដឹកនាំរបស់គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធាននិងជានាយករដ្ឋមន្ត្រីនៃកម្ពុជា។
ប្រធានសកម្មជនហ្វេសប៊ុកកម្ពុជារូបនេះក៏បានថ្លែងបន្តទៀតថា បច្ចុប្បន្នពិភពលោកកំពុងតែរងគ្រោះដោយសារវិបត្តិជំងឺកូវិត-១៩ ក្នុងនោះក៏មានប្រទេសកម្ពុជាយើងផងដែរ។ ជាក់ស្តែងព្រឹត្តិការណ៍<<៣វិច្ឆិកា>>កន្លងទៅថ្មីៗនេះ ត្រូវបានបញ្ចប់ដោយជោគជ័យក្រោមការយកចិត្តទុកដាក់របស់រាជរដ្ឋាភិបាលកម្ពុជា ជាពិសេសក្រសួងសុខាភិបាលនិងស្ថាប័នពាក់ព័ន្ធនានា។ ក៏ប៉ុន្តែថ្មីៗនេះ ក្រសួងសុខាភិបាលបានធ្វើតេស្តរកឃើញករណី<<វិជ្ជមានកូវិត-១៩>>ថ្មី លើស្ត្រីម្នាក់ដែលជាភរិយារបស់មន្ត្រីជាន់ខ្ពស់ក្នុងជួររដ្ឋាភិបាល ហើយស្ត្រីរូបនោះក៏បានដើរកំសាន្តនៅផ្សារអុីអន១ ជាហេតុធ្វើឱ្យក្រសួងសុខាភិបាលសម្រេចបិទផ្សារអុីអន១ជាបណ្ដោះអាសន្ន។ ដូច្នេះសូម ពុក ម៉ែ បងប្អូន លោកយាយ លោកតា ពូ មីង ត្រូវចូលរួមទប់ស្កាត់ឲ្យបានទាំងអស់គ្នាចំពោះជំងឺកូវិត-១៩ គឺត្រូវពាក់ម៉ាស់ លាងដៃជាមួយអាល់កុល សាប៊ូ និងជេលឲ្យបានញឹកញាប់និងត្រឹមត្រូវ។
ប្រធានសកម្មជនហ្វេសប៊ុកកម្ពុជា លោក ហ៊ាង ប៊ុនថា ក៏បានគោរពថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម ស សុខា តាមរយៈឯកឧត្តម ខៀវ ភារិទ្ធ តំណាងរាស្ត្រខេត្តព្រៃវែង, ឯកឧត្តម គង់ វិមាន នាយកខុទ្ទកាល័យឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹក, ឯកឧត្តម ឯក រដ្ឋ អនុរដ្ឋលេខាធិការ, លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល, លោក រិន ច័ន្ទរិទ្ធិ អគនាយកក្រុមហ៊ុន DNZ Realty លោក ខឿន វណ្ណៈ ហុង ចាន់រ៉ាទី ម្ចាស់ក្រុមហ៊ុន CHDD Beauty Co;Ltd, លោក ផែង វណ្ណៈ ចាងហ្វាងគេហទំព័រ Pheng Vannak News, ឯកឧត្តម លោកជំទាវ លោក-លោកស្រីសប្បុរសជននានា ដែលបានចូលរួមឧបត្ថម្ភជាសម្ភារៈនិងថវិកាដល់លោកនិងសហការីដើម្បីមានឱកាសបានយកអំណោយទាំងនេះមកចែកជូនបងប្អូនប្រជាពលរដ្ឋនៅព្រឹកថ្ងៃនេះ។
គួរជម្រាបថា អំណោយសប្បុរសធម៌ដែលប្រជាពលរដ្ឋទទួលបានក្នុងមួយគ្រួសារៗរួមមាន៖
– អង្ករ ២៥Kg, – មី ១កេស, – ទឹកត្រី ១យួរ,- ទឹកសុីអុីវ ១យួរ, – អាវរងារ ១,- ភួយ ១,- ម៉ាស់ ១ប្រអប់,- ទឹកអាល់កុល ១ដបនិង- ថវិកា ២មុឺនរៀល។
នៅក្នុងនោះ អំណោយរបស់៖
១- ឯកឧត្តម ស សុខា តាមរយៈឯកឧត្តម ខៀវ ភារិទ្ធ តំណាងរាស្ត្រខេត្តព្រៃវែង អង្ករ១០បេតូចនិងថវិកា២០០,០០០រៀល។
ឯកឧត្តម គង់ វិមាន នាយកខុទ្ទកាល័យឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនចំនួន២០០ដុល្លារ។
៣- ឯកឧត្តម ឯក រដ្ឋ អនុរដ្ឋលេខាធិការក្រសួងសាធារណការនិងដឹកជញ្ជូមចំនួន២០០ដុល្លារ។
៤- លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល អង្ករ ៥០បេតូច, មី៥៥កេស និងថវិកា ៥០០ដុល្លារ។
៥- ឯកឧត្តម ភឹម ភីរ៉ា អភិបាលរងខេត្តក្រចេះ ថវិកា ១០០ដុល្លា។
៦- លោក រិន ច័ន្ទរិទ្ធិ អគនាយកក្រុមហ៊ុន DNZ Realty ថវិកា ៧០០ដុល្លារ។
៧- លោក ផែង វណ្ណៈ ចាងហ្វាងគេហទំព័រ Pheng Vannak News អាវចំនួន ៨០, ភួយចំនួន ៦០, ម៉ាស់៥០ប្រអប់,ទឹកអាល់កុល១០០ដប, និងថវិកា ៥០០,០០០រៀល។
៨- លោក ខឿន វណ្ណៈ ហុង ចាន់រ៉ាទី ម្ចាស់ក្រុមហ៊ុន CHDD Beauty Co;Ltd ថវិកា ១៥០ដុល្លារ។
៩- លោក សរ កក្កដា អភិបាលស្រុកព្រៃនប់ថវិកា ១០០ដុល្លារ។
១០- លោក កន សុខកាយ អភិបាលស្រុកល្វាឯម ថវិកា ១០០ដុល្លារ។
១១- សប្បុរសជននានា បានជួយឧបត្ថម្ភជាថវិកា និងសម្ភារៈមួយចំនួនទៀតផងដែរ។
ជាថ្មីម្ដងទៀត លោក ហ៊ាង ប៊ុនថា បានគោរពបួងសួង និងគោរពជូនពរដល់ឯកឧត្តម លោកជំទាវ លោក-លោកស្រីសប្បុរសជននានា សុំបានសេចក្តីសុខចម្រើន សុខសប្បាយ សុខភាពល្អបរិបូរណ៍ ជន្មាយុយឺនយូរ ជោគជ័យគ្រប់ភារកិច្ច និងសុំជួបប្រទះតែឧត្ដមពរទាំង៥ប្រការគឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕
