ខេត្ដបន្ទាយមានជ័យ ៖ នៅព្រឹកថ្ងៃទី ២៩ខែវិច្ឆិកា ឆ្នាំ ២០២០ នេះ ក្រុមការងារឆ្លើយតបបន្ទាន់ RRT នៃមន្ទីរសុខាភិបាលខេត្តបន្ទាយមានជ័យ បាននឹងកំពុងយកវត្ថុសំណាកវិភាគ ដើម្បីបញ្ជូនទៅមន្ទីរ ពិសោធន៍នៃវិទ្យាស្ថានប៉ាស្ទ័រ រាជធានីភ្នំពេញ ដើម្បីរកមេរោគនៃជម្ងឺកូវីត១៩ លើមន្ត្រីនិងអ្នកពាក់ព័ន្ធផ្ទាល់និងប្រយោលជាច្រើននាក់នៅបន្ទាយមានជ័យ ។លោកវេជ្ជបណ្ឌិតឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមាជ័យបានឲ្យដឹងថ្ងៃថាសកម្មភាពនេះធ្វើឡើងក្រោមការដឹកនាំ សម្របសម្រួល ពីអ៊ុំ រាត្រី អភិបាកខេត្ត និងដោយមានការសហការចូលរួម ពី លោក លោកស្រី ដែលបានប៉ះពាល់ ផ្ទាល់ និងប្រយោលនឹងឯកឧត្តមអគ្គនាយកនៃអគ្គនាយកដ្ឋានពន្ធនាគារនិងអ្នកពាក់ព័ន្ធបានយ៉ាងរលូន ប្រកបដោយការទទួលខុសត្រូវ ក្នុងការបង្ការទប់ស្កាត់ កូវីដ១៩ ទាំងអស់គ្នា ។
ព្រឹកនេះនៅសាលប្រជុំសាលាបាលខេត្តបន្ទាយមានជ័យ មានមន្ត្រីថ្នាក់ដឹកនាំ មន្ត្រីរាជការសុីវិល កងកម្លាំង រួមទាំងមន្ត្រីពន្ធនាគារនុរក្សរាប់រយនាក់បានទៅសុំផ្តល់សំណាក់ធ្វើតេស្តយ៉ាងគគ្រឹក គគ្រេង ។
លោកវេជ្ជឡេ ច័ន្ទសង្វាត បានប្រកាសថា គ្រូពេទ្យនិងមន្ត្រីជំនាញក្រុមRRTនៃមន្ទីរសុខាភិបាលខេត្តបន្ទាយមានជ័យសុំធ្វើតែអ្នកទាំងឡាយណាដែលបានប៉ះពាល់ផ្ទាល់សិនប៉ុណ្ណោះ ពោលគឺប៉ះពាល់នឹងលោកព្រះរាជអាជ្ញា ព្រះរាជអាជ្ញារង លោកស្នងការស្នងការរង លោកប្រធាន អនុប្រធានពន្ធនាគារ ពន្ធនាគារនុរក្ស តែប៉ុណ្ណោះ។បន្ទាប់ពីមន្ត្រីទាំងអស់នេះដែលធ្លាប់ប៉ះពាល់ផ្ទាល់នឹងលោកឧត្តមអគ្គានុរក្ស ថ្នាក់លេខ១ ឆែម សាវុធ អគ្គនាយក នៃអគ្គនាយកដ្ឋានពន្ធនាគារក្រសួងមហាផ្ទៃកាលពីថ្ងៃទី១៣ ខែវិច្ឆិកាឆ្នាំ ២០២០ នៅទីតាំងពន្ធនាគារខេត្តបន្ទាយមានជ័យ ក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ពេលទទួលការវិលត្រឡប់មកវិញនូវអ្នកជាប់ឃុំជាង១.៦០០នាក់ ក្រោយទឹកជំនន់ស្រក ។
ក្នុងប្រតិបត្តិការទទួលអ្នកជាប់ឃុំវិលវិញនៅពន្ធនាគារខេត្តបន្ទាយមាជ័យតាំងពីថ្ងៃទី១៣ខែវិច្ឆិកា ឆ្នាំ២០២០ ក្រៅពីលោកឧត្តមអគ្គានុរក្សថ្នាក់លេខ១ ឆែម សាវុធ អគ្គនាយក ដែលភរិយាគាត់បានវិជ្ជមានកូវីត១៩ ក៏មានអគ្គនាយករង មន្ត្រី និងដោយមានការចូលរួមលោក ព្រះរាជអាជ្ញាព្រះរាជអាជ្ញារង អមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រីស្នងការនគរបាលខេត្តបន្ទាយមានជ័យ លោកឧត្តមអគ្គានុរក្ស ថ្នាក់លេខ២ ប្រធានពន្ធនាគារខេត្តបន្ទាយមានជ័យ លោក លោកស្រី កងកម្លាំង មន្ត្រីពន្ធនាគារនុរក្ស ក្រុមការងារជាច្រើនរយនាក់នាក់ទៀតបានចូលរួម ។ ក្នុងពេលនេះអ្នកពាក់ព័ន្ធដែលប៉ះពាក់ព័ន្ធផ្ទាល់និងប្រយោលជាបន្តបន្ទាប់នឹងមន្ត្រីដូចខាងលើ ក៏សម្រុកមកសុំផ្តល់សំណាកវិភាគជាមួយក្រុមការងារRRTឯមន្ត្រី ដែលបានផ្តល់សំណាកវិភាគហើយ ក៏បានចេញទៅធ្វើចត្តាឡីស័កនៅដាច់ដោយឡែកពីគេនិងរង់ចាំលទ្ធផលតេស្ត ថាតើវិជ្ជមានឬអវិជ្ជមានកូវីត១៩នៅពេលខាងមុខនេះ ៕
