ភ្នំពេញ៖ នៅថ្ងៃពុធ ៩រោច ខែមិគសិរ ឆ្នាំ ជូត ទោស័ក ព.ស. ២៥៦៤ ត្រូវនឹងថ្ងៃទី០៩ ខែធ្នូ ឆ្នាំ២០២០ វេលាម៉ោង១៤និង៣០នាទី អធិការដ្ឋាននគរបាលខណ្ឌដង្កោ សូមថ្លែងអំណរគុណយ៉ាងជ្រាលជ្រៅដល់សប្បុរសជនលោក ផែន សុធា និងលោកស្រី នឹម សុភាព្រមទាំងក្រុមគ្រួសារម្ចាស់ស្ថានីយប្រេងឥន្ធនៈ PTT សុខសាន្ត ជិតរោងចក្រថៃហ្គ័រ ទល់មុខហង្សមាស ដែលបានឧបត្ថម្ភម៉ាសចំនួន ៥០០០ ម៉ាស និងអាល់កុលចំនួន ៦០លីត្រ ដល់កងកម្លាំងសម្រាប់ប្រើប្រាស់ ក្នុងការបង្ការ និងទប់ស្កាត់ការរីករាលដាលវីរុសកូវីដ-១៩។
ក្រោយពីទទួលបានម៉ាសពីសប្បុរសជនរួច លោកអធិការបានចែកម៉ាសជូនដល់លោកនាយប៉ុស្ដិ៍នគរបាលរដ្ឋបាលទាំង១២ ដោយក្នុងមួយប៉ុស្ដិ៍ទទួលបានម៉ាសចំនួន ៣០០ម៉ាស និងផ្នែកទាំង១១ ទទួលបាន ១០០ម៉ាសក្នុងមួយផ្នែក ដើម្បីយកទៅប្រើប្រាស់។
បន្ទាប់មកលោកអធិការបានដឹកនាំកម្លាំងចុះចែកម៉ាសដែលទទួលពីសប្បុរសជនដល់បងប្អូនកម្មករស៉ីនទ្រី និងប្រជាពលរដ្ឋដែលរស់នៅជិតក្រុមហ៊ុនស៉ីនទ្រី បឹងតាម៉ាត សង្កាត់ដង្កោ ខណ្ឌដង្កោ រាជធានីភ្នំពេញ ដោយក្នុង ០១នាក់ទទួលបានម៉ាស ០២ ដើម្បីពាក់ក្នុងការបង្ការ និងទប់ស្កាត់ការរីករាលដាលវីរុសកូវីដ-១៩។
ឆ្លៀតក្នុងឱកាសនោះដែរ លោកអធិការក៏បានណែនាំផ្សព្វផ្សាយដល់បងប្អូនកម្មករស៉ីនទ្រី និងប្រជាពលរដ្ឋដែលរស់នៅជិតក្រុមហ៊ុនស៉ីនទ្រីពីវិធានការទប់ស្កាត់នៃការរីករាលដាលនៃជម្ងឺកូវីដ-១៩ តាមការណែនាំរបស់ក្រសួងសុខាភិបាលដោយតម្រូវឲ្យពួកគាត់ត្រូវថែរក្សាអនាម័យ ត្រូវពាក់មា៉ស់ លាងសម្អាតដៃជាមួយទឹកសាប៊ូ អាល់កុល ឬជែលលាងដៃ ជាប្រចាំ ។
