ភ្នំពេញ៖ បុរសសម្នាក់បានដួលបោកក្បាលស្លាប់នៅនឹងកន្លែងកើតហេតុយ៉ាងអាណោចអាធម៌បន្ទាប់ពីបានជិះម៉ូតូមួយគ្រឿងជ្រុលទៅប៉ះរថយន្តមួយគ្រឿងមិនចាំម៉ាកបើកឆ្លងផ្លូវនៅពីមុខដួលបោកនឹងថ្នល់ពេញកំហឹង ខណៈមានរថយន្តមួយគ្រឿងទៀតមកបុកម៉ូតូជនរងគ្រោះអូសជាច្រើនម៉ែត្រទៅមុខលែងរួច។
ហេតុការណ៍នេះកើតឡើងកាលពីវេលាម៉ោង០៧និង៤០ នាទីយប់ថ្ងៃទី ១៧ខែមករាឆ្នាំ ២០២១ នៅចំណុចមុខការ៉ាស់សាំងptt តាមបណ្ដោយផ្លូវជាតិលេខ៥ ភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សពជនរងគ្រោះមានឈ្មោះ ម៉ុងគូង ភេទប្រុស អាយុ២០ឆ្នាំ មុខរបរសំណង់ មានស្រុកកំណើត ឃុំស្វាយរំពារ ស្រុកបរសេដ្ឋ ខេត្តកំពង់ស្ពឺ បច្ចុប្បន្នស្នាក់នៅ ភូមិបន្ទាយចាស់ ឃុំព្រះប្រឡាយ ស្រុកត្រពាំងប្រសាទ ខេត្តឧត្តរមានជ័យ។
ការប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញជនរងគ្រោះជិះម៉ូតូឌ្រីមសង់មួយគ្រឿងពណ៌ខ្មៅពាក់ស្លាកលេខបាត់ដំបង1AD-1820ធ្វើដំណើរតាមបណ្ដោយផ្លូវជាតិលេខ៥ ទិសដៅពីត្បូងទៅជើងលុះមកដល់ចំណុចកើតហេតុខាងលើក៏មានរថយន្តមួយគ្រឿងមិនស្គាល់ម៉ាកបានបើកឆ្លងផ្លូវកាត់ពីមុខ ខណៈនោះជនរងគ្រោះបានគេចមិនផុតជ្រុលទៅប៉ះនឹងកន្ទុយរថយន្តផ្នែកខាងក្រោយបណ្ដាលឲ្យដួលបោកទៅនឹងថ្នល់ស្លាប់ភ្លាមៗនៅនឹងកន្លែងកើតហេតុ។ខណៈនោះក៏មានរថយន្តស៊េរីទំនើបមួយគ្រឿងម៉ាកHILUX VIGOមួយគ្រឿងពណ៌ស្ករពាក់ស្លាកលេខភ្នំពេញ2AA-2121ធ្វើដំណើរមកពីក្រោយចាប់ហ្វ្រាំងមិនទាន់ជ្រុលទៅបុកកិនម៉ូតូជនរងគ្រោះអូសជាច្រើនម៉ែត្រទៅមុខលែងរួច។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំធ្វើការដោះស្រាយគ្នានៅពេលក្រោយ។ដោយឡែកសពជនរងគ្រោះសមត្ថកិច្ចធ្វើកំណត់ហេតុប្រគល់ជូនសាច់ញាតិយកទៅស្រុកកំណើតធ្វើបុណ្យតាមប្រពៃណី៕
