ខេត្តបន្ទាយមានជ័យ៖ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសបានឱ្យដឹងថា ជនសង្ស័យទាំង០៥នាក់ រួមនឹងវត្ថុតាងត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថ ខេត្តបន្ទាយមានជ័យ បញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ហើយនៅព្រឹកថ្ងៃសុក្រ ទី១៤ ខែឧសភា ឆ្នាំ២០២១នេះ ។
ដោយទទួលបានការអនុញ្ញាតពីលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងយោងតាមពាក្យបណ្ដឹង ចុះថ្ងៃទី១២ ខែឧសភា ឆ្នាំ២០២១ របស់ម្ដាយជនរងគ្រោះឈ្មោះ ខាន់ លីហ័ង អាយុ៣៤ឆ្នាំ បច្ចុប្បន្ន រស់នៅភូមិក្បាលស្ពាន១ សង្កាត់ និងក្រុងប៉ោយប៉ែត ខេត្តបន្ទាយមានជ័យ ស្ដីពីករណីក្រុមក្មេងពាល០១ក្រុមបានយកកាំបិតមកកាប់លើកូនប្រុសរបស់គាត់ឈ្មោះ ឌឿន រ៉ានុត អាយុ១៧ឆ្នាំ បណ្ដាលឱ្យដាច់កដៃខាងឆ្វេង និងរងរបួសក្បាលយ៉ាងធ្ងន់ធ្ងរជាច្រើនកន្លែង កាលពីវេលាម៉ោងប្រហែល១៨ ថ្ងៃទី១១ ខែឧសភា ឆ្នាំ២០២១ ក្នុងខណ:កូនប្រុសរបស់គាត់ទៅលេងបាល់នៅក្លិបបាល់ទាត់ស្ពតវើល ស្ថិតក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
ក្រោយពីទទួលបានពា្យបណ្ដឹង លោកវរសេនីយ៍ត្រី នួន នីណារ៉ូ មេបញ្ជាការ មូលដ្ឋានកងរាជអាវុធហត្ថក្រុងប៉ោយប៉ែត បានចាត់តាំងកម្លាំងជំនាញចុះធ្វើប្រតិបត្តិការស្រាវជ្រាវដល់កន្លែងកើតហេតុដើម្បីសួរនាំរហូតកំណត់មុខសញ្ញាបាន ទើបឈានដល់ការឃាត់ខ្លួនជនសង្ស័យជាបន្តបន្ទាប់បានចំនួន០៥នាក់មានឈ្មោះដូចខាងក្រោម?
១/.ឈ្មោះ ស៊ុន រ៉ាម៉ី ភេទប្រុស អាយុ១៧ឆ្នាំ
២/.ឈ្មោះ ហៃ ម៉េងហាក់ ភេទប្រុស អាយុ១៧ឆ្នាំ
៣/.ឈ្មោះ ផាត ប្រុស ភេទប្រុស អាយុ១៦ឆ្នាំ
៤/.ឈ្មោះ ជិន មិថុនា ភេទប្រុស អាយុ១៨ឆ្នាំ
៥/.ឈ្មោះ ថន អារុណប្រាថ្នា (ហៅពេជ្រ) ភេទប្រុស អាយុ១៩ឆ្នាំ ព្រមទាំងដកហូតវត្ថុតាងរួមមាន កាំបិតកែឆ្នៃដងដែកប្រវែង១៨៥សង់ទីម៉ែត្រចំនួន០១ដើម, កាំបិតប័ុងតោ ពណ៌ស ដងដែក០១ដើម, ពូថៅ ដងឈើ០១ដើម និងម៉ូតូចំនួន០២គ្រឿង ហើយបញ្ជូនមកមូលដ្ឋានកងរាជអាវុធហត្ថក្រុងប៉ោយប៉ែតដើម្បីសាកសួរចម្លើយ។
លោកវរសេនីយ៍ត្រី នួន នីណារ៉ូ មេបញ្ជាការ មូលដ្ឋានកងរាជអាវុធហត្ថ ក្រុងប៉ោយប៉ែត បានឱ្យដឹងថា ជនសង្ស័យទាំង០៥នាក់ ក្រោយពីកម្លាំងជំនាញសាកសួរចម្លើយរួចមកបានឆ្លើយសារភាពថា ពួកគេមានគំនុំជាមួយឈ្មោះ ឌឿន រ៉ានុត ជាជនរងគ្រោះរូបនេះដោយសារតែឈ្មោះ ឌឿន រ៉ានុត ធ្លាប់បានវាយ និងកាប់មកលើពួកគេ និងដណ្ដើមយកសង្សារបស់ឈ្មោះ ស៊ុន រ៉ាម៉ី ទៀតផង ហើយឈ្មោះ ឌឿន រ៉ានុត បានទូរស័ព្ទមកពួកគេដើម្បីណាត់កាប់គ្នាផងដែរ។
ពេលនោះពួកខ្លួនបានប្រមូលគ្នាបានចំនួន០៩នាក់ ហើយជិះម៉ូតូចំនួន០៣គ្រឿង ព្រមទាំងមានកាំបិត ពូថៅ គ្រប់ៗគ្នា ពេលជិះម៉ូតូទៅដល់ក្លិបហាត់ប្រាណស្ពតវើល ក៏បានជួបជាមួយក្រុមឈ្មោះ ឌឿន រ៉ានុត ហើយក្រុមឈ្មោះ ឌឿន រ៉ានុត បានគប់ដុំថ្មមកលើក្រុមរបស់ខ្លួនមុន ទើបក្រុមរបស់ខ្លួនស្ទុះចុះពីលើម៉ូតូដេញកាប់ទៅលើក្រុមឈ្មោះ នុត វិញ ហើយឈ្មោះ សារ និងហ័រ ជាអ្នកកាប់ទៅលើឈ្មោះ នុត ជាច្រើនកាំបិត ចំណែកឈ្មោះ ស៊ុន រ៉ាម៉ី បានដេញកាប់ទៅលើបក្សពួករបស់ឈ្មោះ នុត ផ្សេងទៀត ហើយពួកគេក្រោយពីធ្វើសកម្មភាពរួចពួកគេបាននាំគ្នារត់គេចរៀងៗខ្លួន។
ដោយផ្អែកលើពាក្យបណ្ដឹងរបស់ម្ដាយជនរងគ្រោះ និងផ្អែកលើចម្លើយសារភាពរបស់ជនសង្ស័យទាំង០៥នាក់ និងមានវត្ថុតាងផងនោះទើបកម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត កសាងសំណុំរឿងបញ្ជូនជនសង្ស័យទាំង០៥ នាក់ និងវត្ថុតាងមកបញ្ជាការដ្ឋានកងរាជអាវុធហត្ថ ខេត្តបន្ទាយមានជ័យចាត់ការបន្ត ចំណែកបក្សពួករបស់ជនសង្ស័យផ្សេងទៀតកម្លាំងកងរាជអាវុធហត្ថ ក្រុងប៉ោយប៉ែត កំពុងធ្វើការស្រាវជ្រាវចាប់ខ្លួនបន្ត ៕
