ខេត្តបន្ទាយមានជ័យ ៖ អាជីវកម្មរណ្តៅដី របស់ក្រុមឈ្មួញរកស៊ីលក់អាចម៍ដី ដុះស្លែ នៅក្រុងប៉ោយប៉ែត កំពុងបំផ្លាញផ្លូវជាតិ ៥៨ និងផ្លូវជាតិ ៥៩ ហើយបើនិយាយពីតៃកុងរថយន្ត បើកបរវិញ គឺប្រជាពលរដ្ឋដែលរស់នៅតាមបណ្តោយផ្លូវនោះនិងអ្នកធ្វើដំណើរតាមបណ្តយផ្លូវនោះរអ៊ួរទាំស្ទើតែគ្រប់គ្នាទៅហើយថាបើកបរគ្នាសណ្តាប់ធ្នាប់ ។
ប្រជាពលរដ្ឋបានឲ្យដឹងថាឈ្មួញរកស៊ីលក់ អាចម៍ដីដុះស្លែ នៅក្រុងប៉ោយប៉ែត បាន ប្រើប្រាស់រថយន្តធំៗដឹកអាចម៍ដី ផ្ទុកលើសចំណុះធ្វើឲ្យធ្លាក់ដីពេញផ្លូវសាធារណៈ រួចយកគ្រឿងចក្រអាលីវឡឺ មកកៀរ យកអាច៍ដីចេញ សកម្មភាពនេះ ធ្វើឲ្យខូចផ្លូវបន្តិចម្ដង ៗដោយមិនដឹងមូលហេតុ ។ និងផ្លូវជាច្រើនខ្សែក្នុងសង្កាត់ផ្សារកណ្តាល សង្កាត់និមិត្ត ក្រុងប៉ោយប៉ែត បានរងការខូចខាត ជាបណ្ដើរៗ ព្រមទាំង បង្កឲ្យមានគ្រោះថ្នាក់ចរាចរណ៍កើតឡើងញឹកញាប់ផងដែរ។
ប្រភពខ្លះបានលើកឡើងឲ្យដឹងថា ការដែលឈ្មួញអាចធ្វើអាជីវកម្មរណ្តៅដីខុសបទដ្ឋានបច្ចេកទេស គឺមានការគុបគិតបើកដៃពីសំណាក់ មន្ត្រីជំនាញអង្គភាពពាក់ព័ន្ធ ខេត្តបន្ទាយមានជ័យ ទើបអ្វីៗអាចប្រព្រឹត្តទៅដោយរលូនដូចសព្វថ្ងៃនេះ។
តាមការអះអាងរបស់ប្រជាពលរដ្ឋ បានឲ្យដឹងថា ឈ្មួញម្ចាស់ក្រុមហ៊ុនធ្វើអាជីវកម្មរណ្តៅដីក្នុងមូលដ្ឋានពួកគាត់គិតតែពីរឿងផលប្រ យោជន៍ផ្ទាល់ខ្លួនទេហើយមិនខ្វល់ពីផលប៉ះពាល់ដល់ការរស់នៅរបស់ប្រជាពលរដ្ឋឡើយ។ ដោយមិនអនុវត្តឲ្យបានត្រឹមត្រូវតាមបទដ្ឋានបច្ចេកទេសឡើយ ហើយប្រើប្រាស់រថយន្តធំៗដឹកអាចម៍ដីលើសចំណុះមិនគ្របតង់ឲ្យបានត្រឹមត្រូវធ្វើឲ្យខូចផ្លូវក្នុងក្រុងប៉ោយប៉ែត ជាច្រើនខ្សែ។
ប្រជាពលរដ្ឋក្នុងសង្កាត់ផ្សារកណ្តាល សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានលើកឡើងថា អាជីវកម្មរណ្តៅដី របស់ ក្រុមឈ្មួញ ដុះស្លែ កំពុងធ្វើឲ្យប៉ះពាល់ដល់ការរស់នៅរបស់ពួកគាត់យ៉ាងពេញបន្ទុក ហើយមន្ត្រីអង្គភាព ជំនាញមិនចាត់វិធានការទប់ស្កាត់ទាល់តែសោះ ប្រជាពលរដ្ឋសូមអំពាវនាវដល់ លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្តបន្ទាយមានជ័យ និង លោក សុត វឌ្ឍនា ប្រធានមន្ទីររ៉ែ និងថាមពលខេត្តបន្ទាយមានជ័យ មេត្តាជួយពិនិត្យរាល់បញ្ហាមួយនេះផងទាន។
អង្គភាពសារព័ត៌មានយើងផ្សាយលម្អិតជាបន្តបន្ទាប់ទៀត ប្រសិនបើមានការពន្យល់បកស្រាយពីស្ថាបន ឬសាម៉ីភាគីពាក់ព័ន្ធទាំងអស់៕
