ខេត្តព្រៃវែង៖ ប្រជាពលរដ្ឋជាច្រើន គ្រួសារ រស់នៅឃុំរកា ស្រុកពារាំង ខេត្តព្រៃវែង បានចោទអាជ្ញាធរមូលដ្ឋានឃុំរកាថាបានឃុបគិតជាមួយឈ្មួញ បន្លំធ្វើឯកសារក្លែងក្លាយ លួចលក់ដីព្រៃលិច ដែលជាដីសាធារណៈ របស់រដ្ឋ និងជាជម្រកត្រីពងកូន ព្រមទាំងជាប្រភពទឹក ដ៏សំខាន់ ដែលពលរដ្ឋរស់នៅមូលដ្ឋាននេះ ប្រើប្រាស់បង្កបង្កើនផលតាំងពីដូនតាមក ទៅឲ្យឈ្មួញស្ងាត់ៗ ដោយប្រជាពលរដ្ឋ មិនបានដឹងខ្លួន ស្ថិតនៅភូមិភូមិត្រកៀត ភូមិរកា ឃុំរកា ស្រុកពារាំង ខេត្ដព្រៃវែង។
ប្រជាពលរដ្ឋជាច្រើន គ្រួសារ នៅឃុំរកា បានលើកឡើងថា លោក ចេស ហៀប ជាឈ្មួញដី និងលោក នេត នឿន មេឃុំកោះរកា ថាប៉ុនប៉ងក្លែងឯកសារ រំលោភយកដីប្រភពទឹក និងជាជម្រកតី្រពងកូន ដែលប្រជាពលរដ្ឋរាប់រយគ្រួសារ រស់អាស្រ័យផលជារៀងរាល់ឆ្នាំ។
ជាការឆ្លើយតបការចោទប្រកាន់របស់ប្រជាពលខាងលើលើកឡើង លោក នេត នឿន មេឃុំកោះរកា បានប្រាប់មកអង្គភាពសារព័ត៌មាន BPNC News យើងថា ពាក់ពន្ធ័ការចោទប្រកាន់មកលើរូបលោកជា រឿងមិនពិតទេ លោកសូមបដិសេធទាំងស្រុង ដោយលោកទើបតែឡើងជាមេឃុំក្នុងឆ្នាំ២០១៧ ហើយចំពោះការចោទប្រកាន់ថា គាត់មានការឃុបគិតជាមួយឈ្មួញនោះ រឹតតែមិនពិតទៅទៀត ពីព្រោះនេះជារឿងតាំងពីមេឃុំចាស់មកម្ល៉េះ គាត់ជាមេឃុំថ្មី គ្រាន់តែមានសិទ្ធិរក្សាឯកសារចាស់តែប៉ុណ្ណោះ ដូច្នេះសូមមហាជនកុំមានការយល់ច្រឡំជាពិសេសប្រជាពលរដ្ឋក្នុងភូមិត្រគៀត។
ចំពោះលោក ចេស ហៀប បានប្រាប់អ្នកសារព័ត៌មានយើងថា ចំពោះអ្វីដែលប្រជាពលរដ្ឋបានលើកឡើងចោទប្រកាន់នេះ ជារឿងមិនពិតទេ ព្រោះគាត់មានឯកសារត្រឹមត្រូវតាំងពីឆ្នាំ២០០៨ មកម្ល៉េះ លោក ចេស ហៀប បានបន្តទៀតថា ដីដែលគាត់ទៅដាំបង្គោលនោះ គឺសំអាងទៅលើឯកសារគ្រប់គ្រាន់ ហើយលោកបានបញ្ជាក់ទៀតថាទីតាំងនោះ ជាទឹកដីភូមិរកា មិនមែនទឹកដីភូមិត្រគៀតទេ ចុះហេតុអ្វីបានជាប្រជាពលរដ្ឋទាំងនោះទៅដកបង្គោលរបស់គាត់។
ចំណែកឯលោក ហ៊ី ធួក អភិបាលស្រុកពារាំងបានឲ្យអ្នកសារព័ត៌មានយើងដឹងថា ជាគោលជំហររបស់អាជ្ញាធរស្រុកគឺត្រូវរក្សាដីមេទឹកនេះអោយនៅដ៏ដែលប៉ុន្តែអាជ្ញាធរស្រុកសំណូមពរដល់ប្រជាពលរដ្ឋកុំទៅទន្រ្ទានយកហើយក្រោមឡេះថាជារបស់អ្នកនេះរបស់អ្នកនោះប៉ុន្តែចំពោះប្រជាពលរដ្ឋដែលបានទិញលក់កន្លងមកអាជ្ញាធរមិនមានសិទ្ធិហាមឃាត់ទេអោយតែជារបស់ប្រជាពលរដ្ឋពិតប្រាកដហើយសូមកុំអោយមានការចោទប្រកាន់មកលើអាជ្ញាធរថាមានការឃុបឃិតជាមួយឈ្មួញព្រោះការចោទប្រកាន់កន្លងមកវាជារឿងមិនពិតដូច្នេះសូមកុំមានការយល់ច្រឡំ។
ទោទោះជាយ៉ាងណាក្ដីពលរដ្ឋសំណូមពរដល់ លោក ជា សុមេធី អភិបាលខេត្តព្រៃវែងសូមពិនិត្យមើល ដីសាធារណៈ របស់រដ្ឋ ដែលជាប្រភពទឹក និងជម្រកត្រីបន្តពូជ ដែលពលរដ្ឋសហគមន៍នេះ រស់អាស្រ័យផល ដើម្បីធ្វើជាកម្មសិទ្ធិឯកជនផ្តាច់មុខ ផងទាន៕
