ខេត្តបន្ទាយមានជ័យ៖ កាលពីថ្ងៃទី១២ ខែកញ្ញា ឆ្នាំ២០២១ នេះលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់បទបញ្ជាឱ្យតាម បណ្តាអធិការដ្ឋាននគរបាលក្រុង/ស្រុកទាំង ៩ ព្រមទាំងទីបញ្ជាការដ្ឋាននគរបាលការពារព្រំដែនគោកទាំង៤ ត្រៀមលក្ខណៈជាស្រេចគ្រឿងបំពាក់ មាន សម្ភារៈ ទូក អាវពង ឡាន និងកងកម្លាំងត្រៀមជាស្រេច ដើម្បីត្រៀមជួយ និងចុះជួយឱ្យទាន់សភាពការណ៍ មិនថាយប់ ឬ ថ្ងៃ ២៤ម៉ោង សម្រាប់ជួយបងប្អូនប្រជាពលរដ្ឋ។
លោកឧត្តមសេនីយ៍ទោ សិទ្ធិ ឡោះ បានមានប្រសាសន៍ថា ការដាក់ចេញនូវផែនការនេះ ធ្វើឡើងបន្ទាប់ពីប៉ុន្នានថ្ងៃចុងក្រោយនេះ មានភ្លៀងធ្លាក់ឥតឈប់ឈរ បានបង្កឲ្យមានជាជំនន់ទឹកភ្លៀង មួយភាគគឺភ្លៀងធ្លាក់នៅក្នុងស្រុក និងមួយភាគទៀតគឺជំនន់ទឹកភ្លៀងហូរធ្លាក់មកពីប្រទេសថៃ បានធ្វើឲ្យទឹកឡើងខ្លាំងបង្កឲ្យមានការជន់លិចស្រុកម៉ាឡៃ ស្រុកថ្មពួក ក្រុងប៉ោយប៉ែត ស្រុកអូរជ្រៅ ជាពិសេសតំបន់នៅជាប់ព្រំដែនកម្ពុជា-ថៃ ហើយកម្លាំងនគរបាលខេត្តបន្ទាយមានជ័យ នៅតាមគោលដៅក៏បានចេញជួយសង្គ្រោះ បានជួយជម្លៀសពលរដ្ឋរកទីទួលសុវត្ថិភាព និងសាងសង់ជំរកថ្មីដល់គាត់ដើម្បីស្នាក់នៅបណ្ដោះអាសន្នផងដែរ។
លោកឧត្តមសេនីយ៍ទោស្នងការ ក៏បានអំពាវនាវបងប្អូនប្រជាពលរដ្ឋ សូមមានការប្រុងប្រយ័ត្នខ្ពស់ និង សូមទាក់ទងនគរបាលយើងខ្ញុំដែលនៅជិតបងប្អូន ដើម្បីភាពងាយស្រួលជួយអន្តរាគមន៍ឱ្យបានទាន់ពេលវេលា៕ ដោយ៖លោកចាន់ពុធ
