ខេត្ដស្វាយរៀង ៖ លោកស្រី ហ៊ឹម ម៉ាលី ក្រុមការងារថ្នាក់កណ្តាលចុះជួយស្រុករំដួល ខេត្តស្វាយរៀង បានបន្តជួបសំណេះសំណាល និងចែកអំណោយដល់ប្រជាពលរដ្ឋជាង១០០នាក់ នាព្រឹកថ្ងៃទី២៨ ខែតុលា ឆ្នាំ២០២២ បន្ទាប់ពីលោកស្រី ហែអង្គកឋិនទានចូលវត្តលក្ខរាជា ស្ថិតនៅក្នុងភូមិលក្ខរាជា ឃុំកំពង់ចក ស្រុករំដួល ខេត្តស្វាយរៀង បានចំណាយនូវទ្រព្យសម្បត្តិផ្លាល់ខ្លួនទៅវេរប្រគេនព្រះសង្ឃចៅអធិការនៅវត្តលក្វរាជាព្រះនាម យឹម សារិន ។
សូមបញ្ជាក់ផងថា ពិធីចែកអំណោយរបស់លោកស្រី ហ៊ឹម ម៉ាលី និងក្រុមការងារក៏មានការចូលរួមពីលោកហែម ស៊ីណា អភិបាលស្រុករំដួល និងមន្ត្រីរាជការប្រជាពលរដ្ឋជាច្រើននាក់ផងដែរ ។
លោក ហែម ស៊ីណា អភិបាលស្រុករំដួលបានថ្លែងអំណរគុណ និងកោតសរសើរចំពោះលោកស្រី ហ៊ឹម ម៉ាលី ដែលជាក្រុមការងារថ្នាក់កណ្ដាលចុះជួយ ឃុំសង្កែ ស្រុករំដួលដែលតែងតែផ្ដល់នូវទេយ្យទានដល់ព្រះសង្ឃក៏ដូចជាចែកអំណោយដល់ប្រជាពលរដ្ឋដែលមានជីវភាពខ្វះខាតនិងចាស់ជរាបានជាបន្តបន្ទាប់ ជាពិសេសបានចូលរួមការងារសង្គមរួមចំណែកក្នុងការអភិវឌ្ឍមូលដ្ឋានស្រុករំដួលឲ្យមានការរីកចម្រើនទាំងវិស័យពុទ្ធចក្រ និងអាណាចក្រ ។
លោកអភិបាលស្រុករំដួលក៏បានស្នើដល់ប្រជាពលរដ្ឋទាំងអស់ត្រូវចូលរួមគោរពច្បាប់ចរាចរណ៍ ចៀសឆ្ងាយពីគ្រឿងញៀន និងអំពើល្បែងស៊ីសងខុសច្បាប់គ្រប់ប្រភេទ ម្យ៉ាងទៀតរាល់ការសំណូមពរ ក៏ដូចតម្រូវការនានានៅមូលដ្ឋានត្រូវរាយការណ៍ឲ្យអាជ្ញាធរ ឲ្យបានដឹងជាពិសេសអាចទាក់ទងមកលោកផ្ទាល់ ដើម្បីដោះស្រាយបានទាន់ពេលវេលាគឺធ្វើយ៉ាងណាមិនឲ្យប្រជាពលរដ្ឋនៅមូលដ្ឋានថ្នាក់នោះឡើយ។
លោកស្រី ហ៊ឹម ម៉ាលីបានថ្លែងថា ដោយផ្សារភ្ជាប់នូវសេចក្តីស្រលាញ់ជាមួយប្រជាពលរដ្ឋ នៅឃុំកំពង់ចក ស្រុករំដួលនាពេលនេះ ហើយក៏ជាថ្ងៃបានហែអង្គឋិនទានចូលវត្តលក្ខរាជា និងបាននាំអំណោយចែកជូនដល់ចាស់ជរាផងដែរ ។
លោកស្រីបានបន្តថា ថ្នាក់ដឹកនាំគណបក្សប្រជាជនកម្ពុជា គឺតែងតែនៅរួមសុខរួមទុក្ខជាមួយប្រជាពលរដ្ឋគ្រប់ពេលវេលា ដោយបានដោះស្រាយទុក្ខលំបាកផ្សេងៗជូនប្រជាពលរដ្ឋជានិច្ច និងមិនដែលរត់ចោលប្រជាពលរដ្ឋឡើយ ទោះក្នុងកាលៈទេសៈបែបណាក៏ដោយ។
លោកស្រីក៏បានជំរុញដល់ប្រជាពលរដ្ឋ រាល់មានបញ្ហាអ្វីនៅមូលដ្ឋានត្រូវរាយការណ៍មកអាជ្ញាធរ ក៏ដូចជាសមត្ថកិច្ចពាក់ព័ន្ធ ដើម្បីធ្វើការដោះស្រាយឲ្យទាន់ពេលវេលា ហើយសូមកុំជឿក្រុមអគតិមួយចំនួនដែលមិនដែលធ្វើអ្វីសោះបានតែភូតភរកុហកបោកប្រាស់ ដូច្នេះមានតែគណបក្សប្រជាជនតែមួយគត់ ដែលបានរំដោះប្រទេសជាតិពីរបបប្រល័យពូជសាសន៍ប៉ុលពត និងនាំមកនូវសុខសន្តិភាពនិងការអភិវឌ្ឍលើគ្រប់វិស័យ ហើយយើងមានអ្វីៗដូចសព្វថ្ងៃនេះ គឺមិនមែនជារឿងចៃដន្យទេ តែវាជាជោគវាសនាដ៏ល្អដែលប្រទេសកម្ពុជា មានសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី។
លោកស្រីបានផ្តាំផ្ញើដល់ប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់បំផុតក្នុងការថែរក្សា សុខភាព ហើយកត្តាដែលសំខាន់នោះ គឺត្រូវប្រកាន់យក ការរស់នៅស្អាត ពិសារទឹកដាំពុះ ហូប ស្អាត សម្អាតបរិស្ថានជុំវិញផ្ទះ ណែនាំកូនចៅឲ្យគេងក្នុងមុងដើម្បីការពារជំងឺគ្រុនឈាម ហើយត្រូវដាំដំណាំ ចិញ្ចឹមសត្វ ដើម្បីផ្គត់ផ្គង់ជីវភាពប្រចាំថ្ងៃផងដែរ។
សូមបញ្ជាក់ថា អំណោយចែកជូនដល់ប្រជាពលរដ្ឋជាង១០០ នាក់នេះរួមមានសារ៉ុង ក្រមា និងថវិកាមួយចំនួនផងដែរផងដែរ ៕
