ខេត្ដស្វាយរៀង ៖ អាជ្ញាធរស្រុករំដួលដឹកនាំដោយលោក ហែម សុីណា បានចុះផ្អាកសកម្មភាពក្រុមរថយន្ដជីកដីដឹកដីមួយកន្លែងរបស់លោក ហុក សុខា ដែលជាម្ចាស់គ្រឿងចក្រកាយដីចំណីព្រែកដែលជាកម្មសិទ្ធរបស់រដ្ឋមកចាក់ចូលដីព្រែក ហើយគ្មានច្បាប់ ត្រូវបានអាជ្ញាធរស្រុករំដួល ឲ្យកាយដីឡើងវិញ កាលពីថ្ងៃទី១៩ ខែមករា ឆ្នាំ២០២៣នេះ ចំណុចតាមបណ្ដោយផ្លូវជាតិលេខ១៣ ស្ថិតនៅភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង។
លោកហែម សុីណា អភិបាលស្រុករំដួលបានប្រាប់ឲ្យដឹងថា ការជីកដីព្រែក និងចាក់ចូលដីព្រែក កាលពីថ្ងៃទី១៨ខែមករា ឆ្នាំ២០២៣ លោក បានចាត់ឱ្យលោក នួន ឧត្ដម អភិបាលរងស្រុក ដឹកនាំមន្ត្រីជំនាញរបស់សាលាស្រុក កម្លាំងសមត្ថកិច្ច និងអាជ្ញាធរភូមិ ឃុំ ចុះពិនិត្យជាក់ស្តែងឃើញថា មានការជីកដីព្រែកនិងចាក់ចូលដីព្រែកពិតមែន ដោយក្រុមម្ចាស់គ្រឿងចក្រ ពុំបានសុំច្បាប់ឲ្យបានត្រឹមត្រូវនោះទេ ដូច្នេះហើយអាជ្ញាធរស្រុកក៍ផ្អាកសកម្មភាពកាយដីនេះជាបន្ទាន់ ផងដែរ។
លោកអភិបាលស្រុកបានបន្ដទៀតថានៅថ្ងែទី១៩ខែមករាឆ្នាំ២០២៣នេះ លោកបានដឹកនាំកម្លាំងគណៈបញ្ជាការឯកភាពស្រុករំដួល ចុះទៅពិនិត្យមើលដោយផ្ទាល់ហើយបានដកហូតគ្រឿងចក្រយកមករក្សាទុករង់ចាំការដោះស្រាយគ្នាតាមផ្លូវច្បាប់ ចំណែកឯដីចាក់ចូលដីព្រែកត្រូវកាយដីឡើងវិញហើយរង់ចាំចំណាត់ការរបស់ថ្នាក់លើសិន។ ចំពោះការចុះផ្អាកសកម្មភាពនិងដករហូតគ្រឿងចក្រនេះព្រោះថាគ្រឿងចក្រគ្មានច្បាប់អនុញ្ញាតហើយចាក់ដីចូលព្រែកមិនគោរពតាមអាជ្ញាធរមានសមត្ថកិច្ចក្នុងមូលដ្ឋានភូមិ ឃុំនិងស្រុក ។
លោកបានបញ្ចាក់ថា ការកាយដីចេញវិញនេះមិនមែនបញ្ចប់រឿងនោះទេគឺអាស្រ័យទៅលើថ្នាក់ដឹកនាំលោកជាអ្នកសម្រេច ។
លោកបានបញ្ចាក់ទៀតថា នាពេលចុះផ្អាកនោះ គឺបានដកហូត គ្រឿងចក្រផ្អាកសម្មភាពកាយដីព្រែកនិងចាក់ដីចូលព្រែក ហើយឱ្យម្ចាស់គ្រឿងចក្រទៅសុំច្បាប់និងឲ្យម្ចាស់ដីយកឯកសារពាក់ព័ន្ធចូលទៅសាលាស្រុករំដួលដើម្បីពិនិត្យជាក់ស្តែងសិន ចំណែករឿងកាយដីព្រែក និងចាក់ដីដចូលព្រែក ត្រូវរង់ចាំថ្នាក់លើលោកជាអ្នកសម្រេច ៕
